SJEJEL 37
Ja jas wa xyala ja Biblia sbʼaja aʼtel sok ja takʼin
¿Ay maʼ bʼa awabʼunej jel chamkʼujol aya yuja wa waʼteli ma yuj takʼin? Bʼobʼta jelni wokol slejel ja jas wa xmakunikujtiki sok yaʼteltajel ja Jyoba sok spetsanil jkʼujoltik. Ja Biblia wa xyakitik rasonik ke oj skoltayotik bʼa oj lajxukujtik.
1. ¿Jas wa xyala ja Biblia sbʼaja aʼtel?
Ja Dyos wa skʼana oj kabʼtik stsamalil ja kaʼteltik. Pes ja Biblia wa xyala ke «mini ay jun jasunuk mas lek oj skʼuluk ja winiki ke [...] yabʼjel stsamalil ja bʼa tsatsal yaʼteli» (Eclesiastés 2:24). Ja Jyoba jel tsats x-aʼtiji. Yajni wa xnochotik sok jel la aʼtijitik, wantik skʼulajel ja jas lek xyila sok gusto wala ajyitik.
Ja aʼteli jel tʼilan, pe mini jaʼuk mas tʼilan oj kiltik yuja yaʼteltajel ja Jyoba (Juan 6:27). Ja yeʼn wa skʼapa oj yakitik ja jas wa xmakunikujtik ta wa xkaʼatik bʼajtan bʼej ja bʼa jsakʼaniltik.
2. ¿Jastal tʼilan oj kiltik ja takʼin?
Ama ja Biblia wani xchiktes ke «ja takʼini wa xkoltani», cha wani xyalakabʼtik ke ja takʼini mini oj yakitik ja gustoʼil ja stuchʼilta (Eclesiastés 7:12). Ja yuj, ja Biblia wa xyalakabʼtik ke mok jyajtaytik ja takʼini sok wa xyakitik ja rason it: «Gusto ajyanik soka jastika wiʼojexi» (kʼuman ja Hebreos 13:5). Yajni gusto ayotik soka janekʼ kiʼojtiki, mini oj cham jkʼujoltik bʼa slejel mas. Cha mi xkatik kʼe jeltik bʼa mey stʼilanil (Proverbios 22:7). Sok mini oj skʼulukotik ganar ja kʼankʼunel bʼa tajnel soka takʼini sok ja slejel modoʼik kʼeʼel wego rikoʼil.
3. ¿Jastal sjejel jaman jkʼujoltik soka jtakʼintiki?
Ja Jyoba jaman skʼujol, sok wa xnochotik ja yajni ‹jaman jkʼujoltik› sok ‹puesto ayotik skʼepjel› ja jas kiʼojtik (1 Timoteo 6:18). Jun modo sjejel jaman jkʼujoltik soka jtakʼintik jani koltanel soka gastoʼik bʼa kongregasyon sok skoltajel ja maʼ ay snesesida, pe mastoni ja kermanotik snochumane Kristo. Ja mas tʼilan xyila ja Jyoba jani jas yuj wa xkaʼatik, mini jaʼuk janekʼ wa xkaʼatik. Ta wa xkaʼatik sok spetsanil jkʼujoltik, gusto oj ajyukotik sok oj katik gustoʼaxuk ja Jyoba (kʼuman ja Hechos 20:35).
LA JNEBʼTIK MAS
La kiltik ja slekilal ja mi oj jelxukotik soka aʼteli sok ja gusto ajyel soka janekʼ kiʼojtik.
4. Ayi stoyjel ja Jyoba kʼotel jun lekil aʼtijum
Ja jastal wa xkila jbʼajtik soka Jyoba tʼilani oj sjeʼ ja jastal wa xkilatik ja aʼtel. Kʼelawik ja BIDEO sok loʼilananik sbʼaja jas ti nochani:
-
¿Jasa mas wa spayawa ja jastal wa xyila ja yaʼtel sok ja smodo ja Jason?
-
¿Jas skʼulan bʼa mi oj jelxuk ja jastal wa xyila ja aʼtel?
Kʼumanik ja Colosenses 3:23, 24 sok loʼilananik sbʼaja jas ti nochani:
-
¿Jas yuj tʼilan oj aʼtijukotik ‹sok spetsanil jkʼujoltik›?
Ja aʼteli tʼilaniʼa, pe mini jaʼuk mas tʼilan la kiltik yuja stoyjel wa xkatikyi ja Jyoba.
5. Ja jastik slekilal ja ajyel gusto soka jas kiʼojtik
Jitsan kristyano wa sleʼa modo oj ajyukyuj jitsan takʼin, pe ja Biblia tuk lek ja rason wa xyaʼa. Kʼumanik ja 1 Timoteo 6:6-8 sok loʼilananik sbʼaja jas ti nochani:
-
¿Jas rason wa xyaʼakitik ja Biblia?
Oj bʼobʼ ajyukotik gusto ama jel tʼusan kiʼojtik. Kʼelawik ja BIDEO sok loʼilananik sbʼaja jas ti nochani:
-
¿Jas yuj gusto aye ja pamilyaʼik jaw ama tʼusanta takʼin yiʼoje?
¿Jaxa taʼ jel kiʼojtik pe wa xkʼanatik mas? Ja Jesús yaʼa jun sjejel bʼa xcholjel ke xiwelani sbʼaj ja modoʼal jaw. Kʼumanik ja Lucas 12:15-21 sok loʼilananik sbʼaja jas ti nochani:
-
¿Jas wa sjeʼawi ja slajel yaʼa ja Jesús? (Kʼelawik ja bersikulo 15).
Kʼumanik ja Proverbios 10:22 sok kʼelawik ja 1 Timoteo 6:10. Tsaʼan loʼilananik sbʼaja jas ti nochani:
-
¿Bʼaya waxa kʼuʼan mas tʼilan: yamigoʼajel ja Jyoba, ma ajyelkujtik jitsan takʼin? ¿Jas yuj?
-
¿Jas wokolik wa xyiʼajan ja skʼanjel ajyelkujtik jitsan takʼin?
6. Ja Jyoba oj yakitik ja jas wa xmakunikujtik
Ja wokolik yuja mey lek aʼtel sok mey kiʼojtik lek takʼin oj bʼobʼ skoltayotik snajel ta wa xjipa jkʼujoltik bʼa Jyoba. Kʼelawik ja BIDEO bʼa snajel jas skʼulajel ja bʼa wokolik jaw sok loʼilananik sbʼaja jas ti nochani:
-
¿Jastik wokol ekʼ sbʼaj ja hermano bʼa bideo?
-
¿Jas skʼulan bʼa mi oj kʼulajuk ganar?
Kʼumanik ja Mateo 6:25-34 sok loʼilananik sbʼaja jas ti nochani:
-
¿Jas wa skʼapayi ja Jyoba ja matik wa xyaʼawe bʼajtan bʼej bʼa yaʼteltajel?
JA JAS WA XYALAWE JUJUNTIK: «Tʼilan oj aʼtijukon jitsan tyempo bʼa smakʼlajel ja jpamilya. Mi oj bʼobʼ wajkon kada semana ja reunión».
-
¿Jas teksto bʼa Biblia wa xya kʼuʼuk ke yajel bʼajtan bʼej ja yaʼteltajel ja Jyoba jani tolabida mas lek?
JA JASA NEBʼA
Tʼilani ja aʼtel sok ja takʼini, pe nunka mok katikan oj spilotik ja bʼa yaʼteltajel ja Jyoba.
Yajel juljkʼujoltik
-
¿Jasa oj skoltaya yiljel ja aʼtel jastalni sbʼej?
-
¿Jastik slekilal ja ajyel gusto soka jas ayxa wiʼoji?
-
Ta ja Jyoba wa skʼapa oj yayi ja jas wa xmakuniyuj ja yaʼtijumik, ¿jastal oj bʼobʼa jeʼ waxa jipa akʼujol bʼa yeʼna?
LEʼA TUK JASTIK
Ila ta ja Biblia wa xyala malo ja takʼini.
«¿Yeʼn maʼ smul ja takʼin ja tuktukil jastik malo?» (Artikuloʼik bʼa jw.org)
Ila jas modo yajel bʼa wa xgustoʼaxi ja Jyoba.
«¿Jasa wa xyala ja Biblia sbʼaja yajeli?» (Artikuloʼik bʼa jw.org)
¿Ay maʼ smaloʼil ja tajnel yuj takʼin?
«Ja jas wa xyala ja Biblia: Ja tajnelik bʼa suerteʼal» (¡Kʼeʼan!, marzo bʼa 2015)
Kʼuman jasa nikji stukbʼesel ja sakʼanil june wa xtajni yuj takʼin sok elkʼanum.
«Jel xkʼulan gusto ja ajnelik sok kawuj» (Ja Juʼun Cholumani, 1 bʼa noviembre bʼa 2011)
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
