Pensaran bʼa jun nanal jel xyajtani bʼa wan xchapjel ja yal skerem bʼa oj wajuk bʼa eskuela. Wa skʼulan sbʼaj asegurar ke atnita, sak ay ja skʼuʼi sok lek skʼeljel. Ja it wa xkoltaji bʼa mi oj koʼ chamel sok wa sjeʼayi ja tuk ja janekʼto wa xcham skʼujole ja snantat. Jastalni ja nantatalik wa skʼanawe ke ja yuntikile asyado oj ajyuke, ja jTatik Jyoba, wa skʼana ke asyado oj ajyuk ja jkuerpotik, cha mi kuxuk ja jsakʼaniltik. Ja ajyel asyado wa xkatik el slekilal sok wa xtaji tiʼal lek ja Dyos.

1. ¿Jastal oj bʼobʼ ajyukotik asyado?

Ja Jyoba wa xyala kabʼtik: «Tʼilani oj kʼotanik sak» (1 Pedro 1:16). Bʼa oj ajyukotik sak, tʼilan oj ajyukotik asyado sok mi kuxuk oj ajyuk ja jsakʼaniltik. Ja it wa xjeʼatik yajni tikʼan wala atnitik sok asyado wa xkatik ajyuk ja jkʼutik, ja jnajtik sok ja jkarrotik sok tulan jachan. Cha wala koltanitik sakʼjel ja Naʼits bʼa Tsomjelal. Ta asyado wala ajyitik, bʼobʼta ja tuk ojni yaweyi stoyjel ja Jyoba (2 Corintios 6:3, 4).

2. ¿Jasa tʼilan oj katikan bʼa sak oj ajyukotik?

Ja Biblia wa xyakitik ja rason it: «La katik eluk yibʼanal ja jas wa xya kuxbʼuk ja kuerpoʼal sok ja kʼujolali» (2 Corintios 7:1). Ja yuj, mi xkʼulantik jastik bʼa oj yixtalaʼuk ja jkuerpotik ma ja jpensartik. Sok yuja wa xkʼanatik ke gusto oj ajyuk jmoktik ja Jyoba ja bʼa jastik wa xpensarantik, wa xkʼujolantik yajelkan ja kuxil pensarik (Salmo 104:34). Cha tolabida wa xleʼatik modo ke sak ja jas wa xkalatik (kʼuman ja Colosenses 3:8).

¿Jas mas oj bʼobʼ ya kuxbʼuk ja jkuerpotik ma ja jsakʼaniltik? Jujuntik jasunuk ojni bʼobʼ ya kuxbʼuk ja jkuerpotik. Ja yuj mok kabʼtik may, mok jchʼachʼtik spowil coca, cha mok jelxukotik soka anik sok mok kabʼtik droga. Yajni mi xkabʼtik ja jastik jaw, wa xtalnaytik ja jkuerpotik sok wa xkisatik ja majtanal bʼa sakʼanil. Chomajkil, bʼa mi kuxuk oj ajyuk ja jsakʼaniltik, wa xkʼulantik luchar bʼa mi oj jkʼuluktik jastik jel kistal, jastal yixtalajel ja jwinkiltik ma skʼeljel ixuk winik bʼasan (Salmo 119:37; Efesios 5:5). Bʼobʼta wokol yajelkan ja jastik jaw, pe ja Jyoba puesto ay oj skoltayotik (kʼuman ja Isaías 41:13).

 LA JNEBʼTIK MAS

3. Ja ajyel asyado wa xyayi stoyjel ja Jyoba

Yajni wa xkʼumantik ja leyik ajiyi ja poko Israel, wa xkabʼtik stojol ja stʼilanil wa xyila ja Jyoba ja ajyel asyado. Kʼumanik ja Éxodo 19:10 sok 30:17-19, sok loʼilananik sbʼaja jas ti nochani:

• ¿Jasa wa sjeʼa ja bersikuloʼik it ja jastal wa xyila ja Jyoba ja ajyel asyado?

• ¿Jastik kostumbre wa skoltayotik ajyel asyado?

Ja ajyel asyado wa skʼana tyempo sok skʼujolajel. Pe wa xbʼobʼi chikan bʼa kulanotika ama rikoʼotik ma pobreʼotik. Kʼelawik ja BIDEO sok loʼilananik sbʼaja jas ti nochani:

• Ta ja matik wa xcholotik yabʼi, xyilawe asyado ay ja jastik jbʼajtiki, ¿oj maʼ koltajuke bʼa oj skis-e mas ja Jyoba? ¿Jas yuj?

4. Kʼulan ganar ja jastik kux skʼulajel

Ta waxa wabʼ may, wala jelxisok ja aniki ma waxa wabʼ droga, bʼobʼta wani xa naʼa jel wokol yajelkan. Jun jasunuk oj bʼobʼ skoltaya jaʼ spensarajel jastal wa xtax jawa sakʼanil yuja jaw. Kʼumanik ja Mateo 22:37-39 sok loʼilananik jastal ja yabʼjel may sok ja jelxelxa yabʼjel jastik bʼa wa xkʼajyi ja kuerpoʼal wa sjomo...

• ... ja jastal wa xyila sbʼaj june soka Jyoba.

• ... ja spamilya jun kristyano sok ja tuk.

Pensaran jastik oj bʼobʼa kʼuluk bʼa yajelkan skʼulajel ja jas kʼajyiyata. a Kʼelawik ja BIDEO.

Kʼumanik ja Filipenses 4:13 sok loʼilananik sbʼaja jas ti nochani:

• ¿Wan maʼ xa kʼuʼan ja kʼajyel yajelyi orasyon, skʼulajel estudiar ja Biblia sok wajel ja bʼa reunionik oj yayi yip june bʼa yajelkan ja jastik kʼajyelxa wa skʼulan? ¿Jas yuj jach waxa pensaran?

 5. Kʼulan luchar soka jastik kistal sok ja pensarik kux

Kʼumanik ja Colosenses 3:5 sok loʼilananik sbʼaja jas ti nochani:

• ¿Jastal wa xnaʼatik ja skʼeljel ixuk winik bʼasan, mensajeʼik bʼa kux sok yixtalajel ja jwinkiltik jelni kux bʼa stiʼ sat ja Jyoba?

• ¿Wan maʼ xa kʼuʼan ke sbʼej ja wa skʼanakitik ja Jyoba mi kux oj ajyuk ja jsakʼaniltiki? ¿Jas yuj?

Naʼa jastal skʼulajel luchar soka pensarik bʼa kuxi. Kʼela ja BIDEO.

Ja Jesús ya makunuk jun sjejel bʼa oj sjekitik jel tʼilan oj jkʼultik chikan jasa ta wa xkʼanatik sak oj ajyuk ja jsakʼaniltik. Kʼumanik ja Mateo 5:29, 30 sok loʼilananik sbʼaja jas ti nochani:

• Ja Jesús mi kʼan yal ke oj jyajbʼes jbʼajtik, jani tʼilan ay jas oj jkʼuluktik. ¿Jastik junuk tʼilan oj jkʼuluktik bʼa mi oj jpensaraʼuktik jastik bʼa kux? b

Ta wanaxa skʼulajel luchar soka pensarik bʼa kuxi, wa xbʼobʼ ajyan seguro ja Jyoba jel chaʼanyabʼal xyila ja janekʼto waxa kʼujolan. Kʼumanik ja Salmo 103:13, 14 sok loʼilananik sbʼaja jas ti nochani:

• Ta wana lucha bʼa yajelkan jun jasunuk bʼa kux, ¿wan maʼ xa kʼuʼan ke ja bersikuloʼik jaw oj yawi awip bʼa mi oj eluka gana? ¿Jas yuj?

 JA JASA NEBʼA

Wa xkatik gustoʼaxuk ja Jyoba ta wa xkatik ajyuk sak ja jkuerpotik, ja jpensartik sok ja jmodotik.

Yajel juljkʼujoltik

• ¿Jas yuj jel tʼilan oj ajyukotik sak?

• ¿Jasa tʼilan oj jkʼuluktik bʼa oj ajyuk asyado ja jkuerpotik?

• ¿Jasa tʼilan oj jkʼuluktik bʼa oj ajyuk sak ja jmodotik sok ja jpensartik?