SJEJEL 41
¿Jas wa xyala ja Biblia sbʼaja stajel sbʼaj jun ixuk sok winik?
Jitsan jel tuk xyabʼye yajni wa staʼawe tiʼal sbʼaja stajel sbʼaj jun ixuk sok winik. Pe yajni ja Yabʼal ja Dyos wa staʼa tiʼal ja bʼa jaw, wa xyala jaman lek sok wa xkiswani. Ja jas wa xyala jelni xkoltani. Sok ayni sbʼej, yujni ja Biblia ti jakel bʼa Jyoba, ja jkʼulumantik sok wa snaʼa jasa mas lek bʼa keʼntik. Wa sjeʼakitik jastal oj bʼobʼ katik gustoʼaxuk soka jmodotik sok ja jas oj skoltayotik bʼa oj kabʼtik stsamalil bʼa tolabida ja sakʼanili.
1. ¿Jastal wa xyila ja Jyoba ja stajel sbʼaj jun ixuk sok winik?
Ja jaw jun majtanal bʼa Jyoba. Wa skʼana ke jun winik sok jun ixuk bʼa nupanelexa ayabʼye stsamalil. Ja majtanal jaw mi kechan wa xyaʼakan ke aʼajyuk yuntikile, cha wa skʼana ke a-sjeʼ sbʼaje yajalkʼujol sok yajtanel bʼa jun modo toj sok tsamal. Ja yuj, ja Yabʼal ja Dyos wa xyala: «Abʼan stsamalil soka wa cheʼum maʼ nupaniyasok ja yajni keremato» (Proverbios 5:18, 19). Ja Jyoba wa smajlay ke ja yaʼtijumik nupanelexa aʼajyuke toj ja bʼa snupanele. Ja yuj mini nunka oj xchʼay kʼujoluke ja snupanele (kʼuman ja Hebreos 13:4).
2. ¿Jasunkiluk ja koʼel mulal sok ixuk winik?
Ja Biblia wa sjeʼa ke «ja kristyanoʼik bʼa wa xkoye mulal sok ixuk winik [...] mini oj sbʼajuke ja sGobyerno ja Dyosi» (1 Corintios 6:9, 10). Ja yaljel griego yawe makunuk ja tsʼijbʼanumik bʼa Biblia ja yajni staʼawe tiʼal ja koʼel mulal sok ixuk winik jaʼa pornéia. Ja yaljel jaw ti chʼikan 1) jaʼ wa staʼa sbʼaje bʼa mi nupaneluke, a 2) jaʼ wa xwaye soka smoj winike sok 3) ja stajel sbʼajsok chanteʼik. Yajni mi xkʼulantik ja jastik jaw, wa xkatik gustoʼaxuk ja Jyoba sok wa xkabʼtik stsamalil jitsan jastik lek (1 Tesalonicenses 4:3).
LA JNEBʼTIK MAS
La kiltik jas oj bʼobʼa kʼuluk bʼa mi oj koʼan ja bʼa mulalik jaw sok jastik oja wabʼ stsamalil ta ajyiya sak ja bʼa wa sakʼanil.
3. Paka ajnel ja bʼa koʼel mulal sok ixuk winik
Jun winik toj sbʼiʼil José skʼulan luchar bʼa oj ajyuk sak ja bʼa sakʼanil. Kʼumanik ja Génesis 39:1-12 sok loʼilananik sbʼaja jas ti nochani:
-
¿Jas yuj spaka ajnel ja José? (Kʼelawik ja bersikulo 9).
-
¿Stojol maʼ ja jas skʼulani? ¿Jas yuj?
¿Jastal oj bʼobʼ snoch-e ja José ja keremtik akʼixuk sok spakjel ajnel ja bʼa koʼel mulal? Kʼelawik ja BIDEO.
Ja Jyoba wa skʼana ke mok kokotik ja bʼa mulal sok ixuk winik. Kʼumanik ja 1 Corintios 6:18 sok loʼilananik sbʼaja jas ti nochani:
-
¿Jastik oj bʼobʼ ijuk june ja bʼa koʼel mulal sok ixuk winik?
-
¿Jastal oj bʼobʼa pak ajnel ja bʼa jaw?
4. Ojni bʼobʼa kʼul ganar
¿Jastik oj bʼobʼ ya wokolanukotik ja jluchatik bʼa koʼel mulal sok ixuk winik? Kʼelawik ja BIDEO sok loʼilananik sbʼaja jas ti nochani:
-
Yajni ja hermano snaʼa ke ja jas wa spensaran sok ja jas wa skʼulani oj bʼobʼ ijuk bʼa oj xchʼay kʼujoluk ja xcheʼum, ¿jasa skʼulan?
Asta ja snochumanik Kristo bʼa toje, ay ekʼele wa skʼulane luchar bʼa oj ajyuk sak ja spensare. ¿Jas oj bʼobʼa kʼuluk bʼa mi oja pensaraʼuk jastik bʼa kux? Kʼumanik ja Filipenses 4:8 sok loʼilananik sbʼaja jas ti nochani:
-
¿Jastik junuk ja tʼilan oj jpensaraʼuktik?
-
¿Wan maʼ xa kʼuʼan ta wa xkʼumantik ja Biblia sok latsan wala ajyitik yaʼteltajel ja Jyoba mas pasil oj kuchkujtik ja prueba? ¿Jas yuj?
5. Ja jastik yaʼunejkan kulan ja Jyoba wa xyaʼa jlekilaltik
Ja Jyoba wa snaʼa jasa mas lek bʼa keʼntik. Ja yuj wa xyalakabʼtik jastal ajyel sak ja bʼa jsakʼaniltik sok ja slekilalik ja skisjel. Kʼumanik ja Proverbios 7:7-27 sok kʼelawik ja BIDEO. Tsaʼan loʼilananik sbʼaja jas ti nochani:
-
¿Jastal xchʼika sbʼaj bʼa jun niwan wokol ja kerem jaw? (Kʼumanik ja Proverbios 7:8, 9).
-
Jastalni wa xyala ja Proverbios 7:23, 26, ja koʼel mulal sok ixuk winik wa xyiʼajan tsatsal wokolik. ¿Jastik wokolik mi oj kiltik ta ajyitik sak ja bʼa jsakʼaniltik?
-
¿Jastal wa skoltayotik ja jaw bʼa yabʼjel stsamalil bʼa tolabida ja jsakʼaniltik?
Jujuntik wa skʼuʼane ke ja jas wa xyala ja Biblia sbʼaja wayelsok smoj winike mi tʼun wa sjeʼa yajalkʼujol. Pe ja Jyoba yeʼn ja Dyos bʼa yajalkʼujol sok wa skʼana oj kabʼtikik stsamalil ja sakʼanil bʼa tolabida. Bʼa oj ajukitik ja majtanal jaw, tʼilan oj jkʼuʼuktik ja jastik yaʼunejkan kulan. Kʼumanik ja 1 Corintios 6:9-11 sok loʼilananik sbʼaja jas ti nochani:
-
¿Kechanta maʼ mi lek xyila ja Dyos ja kʼankʼunel wayelsok smoj winike?
Bʼa yajel gustoʼaxuk ja Dyos, jpetsaniltik ayni jas oj tukbʼestik. ¿Oj maʼ katik el slekil ja skʼujolajel? Kʼumanik ja Salmo 19:8, 11 sok loʼilananik sbʼaja jas ti nochani:
-
¿Wan maʼ xa kʼuʼan ke ja jastik yaʼunejkan kulan ja Jyoba mini wa xjelxi? ¿Jas yuj jach waxa pensaran?
Ja Jyoba jitsan skoltunej bʼa oj skʼuʼuke ja jastik yaʼunejkan kulani, sok ojni cha bʼobʼ skoltaya ja weʼn.
JA JAS WA XYALAWE JUJUNTIK: «Mey smaloʼil jaʼ oj staʼ sbʼaj jun ixuk sok winik taʼ wa skʼana sbʼaje».
-
¿Jas oja wale?
JA JASA NEBʼA
Ja stajel sbʼaj jun ixuk sok winik jun majtanal bʼa Jyoba sok wa skʼana ke ayabʼye tsamalil ja matik nupanelexa.
Yajel juljkʼujoltik
-
¿Jastik ti chʼikan ja koʼel mulal sok ixuk winik?
-
¿Jas oj skoltayotik bʼa mi oj kokotik mulal sok ixuk winik?
-
¿Jastal wa xkatik el slekilal ja skʼuʼajel ja jastik yaʼunejkan kulan ja Jyoba?
LEʼA TUK JASTIK
Paklay jas yuj ja Jyoba wa skʼana ke anupanuke jun ixuk sok winik ta wa skʼanawe oj ajyuke lajan.
«¿Jas wa xyala ja Biblia sbʼaja ajyel lajan jach mi nupaneluke?» (Artikuloʼik bʼa jw.org)
Ila jas yuj ja jas wa xyala ja Biblia sbʼaja wayelsok smoj winike mini wa spuku ja ilkʼujol cha mini ja tsawanel.
«¿Malo maʼ ja oj wayan soka moj winikil?» (Artikuloʼik bʼa jw.org)
Kʼuman jastal wa xbʼobʼ skoltayotik ja jastik yaʼunejkan kulan ja Dyos bʼa mi oj kokotik mulal sok ixuk winik.
«Ja yixtalajel ja swinkil june sok tiʼal, ¿meran maʼ stajel sbʼajsok june?» (Artikuloʼik bʼa jw.org)
¿Jasa nikji stukbʼesel ja sakʼanil june bʼa wa xyiʼaj gusto ja smoj winikil sok yajel gustoʼaxuk ja Dyos? Kʼuman ja bʼa wa xcholo ja sakʼanil «Lekni iljiyon».
«Ja Biblia stukbʼes ja sakʼanile» (Ja Juʼun Cholumani, 1 bʼa abril bʼa 2011)
a Ja mulalik jaw ti chʼikan ja stajel sbʼajsok june, ja yixtalajelyi ja swinkil june sok tiʼal, ja tajnel bʼa stop sok smasjelyi ja swinkil june bʼa jun modo stajel sbʼajsok.
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
