SJEJEL 42
¿Jas wa xyala ja Biblia sbʼaja ajyel soltero sok ja nupanel?
Bʼa jujuntik kultura, wa spensarane ke tʼilan oj nupanuk june bʼa gusto oj ajyuk. Pe mi spetsaniluk gustoʼaye ja nupanumiki cha mi spetsaniluk ja solteroʼik ja mi gustoʼayuke. Ja smeranili ja Biblia wa xyala ke jun majtanal ja ajyel soltero sok ja nupanel.
1. ¿Jastik slekilal yiʼoj ja ajyel soltero?
Ja Biblia wa xyala: «Ja maʼ wa xnupani lekni wa skʼulan, pe ja maʼ mi xnupani masto lek wa skʼulan» (kʼuman ja 1 Corintios 7:32, 33, 38). ¿Jas wa xkʼan yal ke «masto lek wa skʼulan» ta mi xnupani? Ja nochumanik Kristo bʼa solteroʼaye mi xcham skʼujol bʼa snupe. Ja yuj, masni ayiʼoje libreʼil. Bʼa jujuntik mas pasil wa xbʼobʼ yaʼteltajel ja Jyoba bʼa tuktukil modo. Jun sjejel, jastal wajel pilan lugar bʼa xcholjel. Cha mas wa xbʼobʼ spil-e tyempo bʼa mojxel soka Jyoba.
2. ¿Jastik slekilal ja nupanel bʼa leyi?
Jastalni ja ajyel soltero, ja nupaneli cha ayiʼoj slekilal. Ja Biblia wa xyala ke «mas lek ja chawane yuja juneʼi» (Eclesiastés 4:9). Ja it merani lek pe mastoni ja nupanumik bʼa wa xyawe makunuk ja rasonik bʼa Biblia. Ja matik nupanele bʼa leyi wa skʼapawe ke tolabida oj skʼan sbʼaje, oj skis sbʼaje sok yajxta oj stalnay sbʼaje. Ja yuj masni seguro wa x-ajyiye yuja matik mi nupaneluke bʼa leyi. Cha masni seguro wa x-ajyiye ja yuntikile.
3. ¿Jas wa spensaran ja Jyoba sbʼaja nupanel?
Yajni ja Jyoba ya kujlajuk ja bʼajtan nupanum, yala: «Ja winik oj yakan ja stat soka snan sok jaxa oj ajyuk soka xcheʼumi» (Génesis 2:24). Ja Jyoba wa skʼana ke ja tatamal sok ja cheʼumal oj syajtay sbʼaje sok aʼajyuke lajan ja yajni sakʼaneto. Sok kechanta wa xyaʼakan skʼutsjel ja nupanel ta ay maʼ xchʼaykʼujolan ja snupanel. Ja bʼa ekʼele jaw, ja Dyos wa xyaʼakan ke yeʼn oj stsaʼ ta oj skʼuts ja snupanel ja maʼ mi koʼeluk mulali (Mateo 19:9). a Ja Jyoba wa skʼana ke ja yaʼtijumik kechanta oj ajyuk jun snupe (1 Timoteo 3:2).
LA JNEBʼTIK MAS
La kiltik jas oj bʼobʼa kʼuluk bʼa gusto oj ajyan sok oja wa gustoʼaxuk ja Jyoba ama solteroʼaya ma nupanela.
4. Amakunuk lek ja majtanal bʼa solteroʼil
Ja Jesús yila jastal jun majtanal ja ajyel soltero (Mateo 19:11, 12). Kʼumanik ja Mateo 4:23 sok loʼilananik sbʼaja jas ti nochani:
-
¿Jastal ya makunuk ja ajyi soltero ja Jesús bʼa yaʼteltajel ja sTat sok skoltajel ja tuk?
Ja snochumanik Kristo oj bʼobʼ ajyuke gusto ta yawe makunuk lek ja solteroʼaye, jastalni skʼulan ja Jesús. Kʼelawik ja BIDEO sok loʼilananik sbʼaja jas ti nochani:
-
¿Jastal oj bʼobʼ yawe el slekilal ja snochumanik Kristo ja ajyel soltero?
¿Wan maʼ xa naʼa ajyi?
Ja Biblia mi xyala jas jabʼil lekxa nupanel. Pe wa xyala ke la jmajlaytik man ‹julta jkʼujoltik›, yujni ekʼta ja styempoʼil ke jel tsats ja kʼankʼunel bʼa stajel sbʼajsok jun ixuk winik sok mas wanxa xpensarantik (1 Corintios 7:36).
5. Tsaʼa lek jawa nupi
Stsajel ja maʼ oj nupansok jani june ja mas tʼilan oja kʼuluk ja bʼa wa sakʼanil. Kʼumanik ja Mateo 19:4-6, 9 sok loʼilananik sbʼaja jas ti nochani:
-
¿Jas yuj jun snochuman Kristo tʼilan oj spensaraʼuk lek bʼajtanto oj nupanuk?
Ja Biblia oj skoltaya snajel jas modoʼalik tʼilan oj ajyukyuj jun lekil tatamal ma cheʼumal. Pe ja mas tʼilan, leʼa june maʼ wa syajtay ja Jyoba. b Kʼumanik ja 1 Corintios 7:39 sok 2 Corintios 6:14. Tsaʼan loʼilananik sbʼaja jas ti nochani:
-
Ta jun meran nochuman stsaʼa oj nupanuk, ¿jas yuj jel tʼilan oj stsaʼ june bʼa junxta skʼuʼajel yiʼoje?
-
Ta nupaniya sok june ke mi syajtay ja Jyoba, ¿jastal waxa kʼuʼan oj yabʼ ja yeʼn?
Ta aji ochuk bʼa junxta yuko chabʼ tuktukil chante, lajan wa xyiʼaje wokol. Junxta soka jaw, ja snochuman Kristo bʼa wa xnupanisok june mi syajtay ja Jyoba oj ajyukyuj jitsan wokol.
6. Ila ja nupanel jastal wa xyila ja Jyoba
Ja bʼa poko Israel, jujuntik skʼutsu ja snupanele yuj kechan wa spensaran bʼa yeʼnle. Kʼumanik ja Malaquías 2:13, 14, 16 sok loʼilananik sbʼaja jas ti nochani:
-
¿Jas yuj ja Jyoba mi lek xyila ta june skʼutsu ja snupanel yuj jun rason bʼa mi ja wa xyala ja Biblia?
Ja xchaykʼujolajel ja nupanel sok ja skʼutsjel jel xya yiʼ wokol ja maʼ chʼaykʼujolaji sok ja untiki.
Kʼelawik ja BIDEO sok loʼilananik sbʼaja jas ti nochani:
-
Ta nupanelasok june bʼa mi syajtay ja Jyoba, ¿jas oja kʼuluk bʼa gusto oj ajyuk jawa nupanel?
7. Kʼuʼan ja jas yaʼunejkan kulan ja Jyoba sbʼaja nupanel
Jujuntik bʼobʼta jel wokol oj yabʼye yajel makunuk ja jas yaʼunejkan kulan ja Jyoba sbʼaja nupanel. c Pe wani xya koʼyi slekil ja matik wa skʼujolane. Kʼelawik ja BIDEO.
Kʼumanik ja Hebreos 13:4 sok loʼilananik sbʼaja jas ti nochani:
-
¿Wan maʼ xa kʼuʼan ke ja jas yaʼunej kujlajuk ja Jyoba sbʼaja nupanel ay sbʼej? ¿Jas yuj jach waxa pensaran?
Ja Jyoba wa skʼana ja snochuman Kristo oj ajyuk sjuʼunil ja snupanel cha jachuk ta ay bʼa skʼutsu, yujni jach wa skʼana ja gobyernoʼik bʼa tʼusan mi yibʼanaluk ja luʼumi. Kʼumanik ja Tito 3:1 sok loʼilananik sbʼaja jas ti nochani:
-
Ta ja weʼn nupanelaxa, ¿seguro maʼ aya ke nupanela ja jastal wa skʼana ja ley sok wa snaʼa ja gobyerno?
JA JAS WA SJOBʼOWE JUJUNTIK: «¿Jas yuj nupanel? ¿Meran maʼ wa xkʼanxi jun juʼun?».
-
¿Jas oja wale?
JA JASA NEBʼA
Ja ajyel soltero sok ja nupanel majtanalik bʼa Jyoba. Junuk ja bʼa jaw ojni bʼobʼ yijan gustoʼil sok stsamalil ta wa xkʼulaxi ja jas wa skʼana ja Jyoba.
Yajel juljkʼujoltik
-
¿Jastal oj bʼobʼ ya makunuk lek june ja solteroʼil?
-
¿Jas yuj ja Biblia wa xyala ke ja snochuman Kristo kechan oj nupanukesok june maʼ junxta skʼuʼajel yiʼojsok?
-
Jastalni wa xyala ja Biblia, ¿jas rason wa xyaʼa bʼa oj bʼobʼ skʼuts june ja snupanel?
LEʼA TUK JASTIK
¿Jas wa stojolan ja kechan nupanelsok jun «snebʼuman ja Kajwaltiki»?
«Sjobʼjelik yiʼoje ja matik wa skʼumani» (Ja Juʼun Cholumani, 1 bʼa julio bʼa 2004)
Ila chabʼ sjejel sbʼaja makbʼenal sok ja nupanel bʼa oj bʼobʼ skoltaya stsajel lek jas skʼulajel.
Ila jas yuj jun hermano skʼuʼunej lek ke akʼubʼalyi yuja Jyoba jun jasunuk mas chaʼanyabʼal yuja jas yaʼakani.
Bʼajtanto oj skʼuts ja snupanel ma oj spil sbʼaj, ¿jasa tʼilan oj ya tʼabʼan skʼujol jun snochuman Kristo?
«La jkistik ja jasa yaʼunej staʼ sbʼaj ja Dyosi» (Ja Juʼun Cholumani, diciembre bʼa 2018)
a Ja bʼa nota 4 wa xcholo sbʼaja spiljel sbʼaj soka snup june (yajni mi maʼ xchʼaykʼujolanunej ja snupanel).
b Bʼa jujuntik kultura, ja nantatalik wa stsaʼawe maʼ oj nupanuksok ja yakʼix ma ja skerem. Pe ja lekil nantatalik jani bʼajtan wa skʼelawe ta wa syajtay ja Jyoba. Jani jaw ja jas mas tʼilan bʼa yeʼnle yuja takʼin ma ja jastik sbʼaj.
c Ta ja weʼn soka wa nupi mi nupanelukex bʼa ley, weʼn oja tsaʼex ta oja kʼulukex ma oja wakana bʼajex.
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
