SJEJEL 46
¿Jas yuj tʼilan yajel ja jsakʼaniltik sok yijel jaʼ?
Yajni ay maʼ wa xyayi ja sakʼanil ja Jyoba, wa skʼapayi bʼa jun orasyon kechanta yeʼn oj stoye sok ja jas mas tʼilan ja bʼa sakʼanili jani jas wa skʼana ja Dyos (Salmo 40:8). Tsaʼan, yajni wa xyiʼaj jaʼ, wa sjeʼayi ja tuk ke yatayi ja sakʼanil ja Dyos. Yajelyi ja jsakʼaniltik ja Jyoba jani stsajel mas tʼilan wa xbʼobʼ jkʼuluktik. Jelni tʼilan asta wa stukbʼes ja jsakʼaniltik. ¿Jas oj bʼobʼ snik-a bʼa skʼulajel ja jaw?
1. ¿Jasa wa snikawotik yajel ja jsakʼaniltik?
Ja yajalkʼujoli jaʼ wa snikawotik yajelyi ja jsakʼaniltik ja Jyoba (1 Juan 4:10, 19). Ja Biblia wa xyalakabʼtik: «Yajtay ja Jyoba wa Dyos sok spetsanil jawa kʼujol, spetsanil jawa pensar, spetsanil jawa wipi sok awenteroʼil» (Marcos 12:30). Wa xchiknaji wa xyajtaytik yuja jas wa xkalatik sok wa xkʼulantik. Ja nobioʼalik bʼa meran wa skʼana sbʼaje wa xnupaniye, yajni meran wa xyajtaytik ja Jyoba wa xkatikyi ja jsakʼaniltik sok wa xkiʼajtik jaʼ.
2. ¿Jastik slekilal wa xyayi ja Jyoba ja sTestigoʼik?
Yajni xa wiʼaj jaʼ, ojxa kʼot ajyan bʼa spamilya ja Jyoba, jun pamilya bʼa jel gustoʼaye. Anto oja wabʼ ja syajtanel ja Jyoba bʼa tuktukil modo sok masto mojan oj ajyansok (kʼuman ja Malaquías 3:16-18). Chomajkil ja ajyelawuj ja Jyoba jastala tat, oja wabʼ stsamalil ja ajyel bʼa jun pamilya bʼa sutanal ja luʼum bʼa wa syajtaye ja Dyos sok ja weʼn (kʼuman ja Marcos 10:29, 30). Meran, bʼajtanto oja wi jaʼ, tʼilani ay jas oja kʼuluk. Tʼilan oja naʼ sbʼaj ja Jyoba, oja yajtay sok oja jeʼ ke aya wiʼoj skʼuʼajel ja bʼa Yunin. Tsaʼan, tʼilan oja kʼapyi ke oja wayi jawa sakʼanil. Ta akʼulan spetsanil ja jaw sok xa wiʼaj jaʼ, oj bʼobʼa wabʼ stsamalil ja sakʼanil bʼa tolabida. Ja Yabʼal ja Dyos wa xyala: «Ja yijel jaʼ, [...] ja wego cha wan yajel akoltajelex» (1 Pedro 3:21).
LA JNEBʼTIK MAS
La kiltik jas yuj tʼilan oja wayi jawa sakʼanil ja Jyoba sok oja wi jaʼ.
3. Tʼilan stsajel maʼ oj kaʼteltaytik
Ja bʼa poko Israel, jujuntik kristyano spensarane ke oj bʼobʼ stoy-e ja Jyoba sok cha jachuk ja dyos Baal. Pe chʼayelni aye. Ja yuj ja Jyoba sjeka ja yaluman Elías bʼa oj tojuke. Kʼumanik ja 1 Reyes 18:21 sok loʼilananik sbʼaja jas ti nochani:
-
¿Jasa tʼilan stsaʼawe ja israʼelenyoʼik?
Jastalni ja yeʼnle, ja keʼntiki cha tʼilan oj jtsatik maʼ oj kaʼteltaytik. Kʼumanik ja Lucas 16:13 sok loʼilananik sbʼaja jas ti nochani:
-
¿Jas yuj mi xbʼobʼ jtoytik ja Jyoba ta wa xtoyotik june ma jun jasunuk?
-
¿Jas oj bʼobʼ jkʼuluktik bʼa oj yil ja Jyoba yeʼnxa jtsaʼatikta stoyjel?
4. Pensaran ja janekʼto wa syajtaya ja Jyoba
Ja Jyoba yaʼunejkitik jitsan majtanalik. ¿Sok jas oj bʼobʼ katikyi ja keʼntik? Kʼelawik ja BIDEO.
¿Jas jujuntik modo sjeʼunejawi ja Jyoba wa syajtaya? Kʼumanik ja Salmo 104:14, 15 sok 1 Juan 4:9, 10, sok loʼilananik sbʼaja jas ti nochani:
-
Ja bʼa majtanalik yaʼunejkitik ja Jyoba, ¿jasa mas waxa waʼa tsʼakatal?
-
¿Jas waxa wabʼ bʼa yeʼn yajni waxa pensaran ja bʼa majtanaliki?
Wani xkʼanatik oj snaʼ ke jel xkatikyi tsʼakatal, ja yajni ay maʼ wa xyakitik jun majtanal jel xkʼanatik. Kʼumanik ja Deuteronomio 16:17 sok loʼilananik sbʼaja jas ti nochani:
-
Yajni waxa pensaran ja jastik yaʼunejawi ja Jyoba, ¿wan maʼ xa kʼana ay jas oja wayi? ¿Jasunkiluk?
5. Ja yajel ja jsakʼaniltik wa xkilatik jitsan slekilal
Jitsan wa skʼuʼane oj ajukyile ja gustoʼil ja jel oj najuk sbʼaje, jun lekil carrera ma ja takʼin. ¿Pe meran maʼ? Kʼelawik ja BIDEO sok loʼilananik sbʼaja jas ti nochani:
-
Ama ja tajnumi jel xyiʼaj gusto ajyi ja fútbol, ¿jas yuj yaʼakan?
-
Stsaʼa yajelyi ja sakʼanil ja Jyoba sok miyuk ja fútbol. ¿Wan maʼ xa kʼuʼan ke lekni ja jas stsaʼa? ¿Jas yuj?
Bʼajtanto oj och nochuman Kristo ja Pablo, ajyini jun lekil scarrera. Ajiyi estudio yuj jun maestro bʼa ley judío ke jel naʼubʼal sbʼaj. Pe chʼak yakan bʼa oj och snochuman Kristo. ¿Snaʼato maʼ malaya? Kʼumanik ja Filipenses 3:8 sok loʼilananik sbʼaja jas ti nochani:
-
¿Jas yuj yala ja Pablo kʼotel «jun monton tsʼilel» ja jas skʼulan bʼajtanto oj och nochuman?
-
¿Jas skʼulan ganar yuja jas yaʼakan?
-
¿Oj maʼ tojbʼuk jawa sakʼanil ta atsaʼa yaʼteltajel ja Jyoba? ¿Jas yuj?
Yajni ja Pablo och nochuman Kristo, skʼulan ganar mas yuja jas xchʼaya.
JA JAS WA XYALAWE JUJUNTIK: «Mey stojolil yajelyi jawa sakʼanil ja Dyos».
-
¿Wan maʼ xa pensaran ayni stojolil yajelyi jawa sakʼanil ja Jyoba? ¿Jas yuj?
JA JASA NEBʼA
Ja yajalkʼujol kiʼojtik bʼa Jyoba wa snikawotik yajelyi ja jsakʼaniltik sok yijel jaʼ.
Yajel juljkʼujoltik
-
¿Jas yuj wa sbʼajin ja Jyoba syajtajel sok spetsanil jkʼujoltik sok stoyjel?
-
¿Jas majtanal yaʼunejyi ja Jyoba ja sTestigoʼik?
-
¿Wan maʼ xa kʼana oja wayi jawa sakʼanil ja Jyoba?
LEʼA TUK JASTIK
Ila jas yuj jun tsʼebʼanum sok tajnum stsaʼawe yajelyi ja sakʼanile ja Jyoba.
Naʼa mas jas yuj yajelyi ja jsakʼaniltik ja Jyoba.
«¿Jas yuj yajelyi ja jsakʼaniltik ja Jyoba?» (Ja Juʼun Cholumani, 15 bʼa enero bʼa 2010)
Ila ja bideo sokan sok kʼin ja gustoʼil wa xyaʼa ja yajelyi ja jsakʼaniltik ja Jyoba.
Kʼuman jas yuj jun ixuk yila jasa mas tʼilanyuj ja bʼa wa xcholo ja sakʼanil «Jitsan jabʼil jobʼo jbʼaj jas yuj teytik il».
«Ja Biblia stukbʼes ja sakʼanile» (Ja Juʼun Cholumani, 1 bʼa noviembre bʼa 2012)
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
