Jpetsaniltik tuktukil ja jastal wa xkʼanatik skʼutesel jbʼajtik sok xchapjel jbʼajtik. Ojni bʼobʼ jetik jastal wa xkʼanatik sok yajel gustoʼaxuk ja Jyoba ta wa xnochotik jujuntik rason mi jel wokoluk bʼa Biblia. La jpaklaytik jujuntik.

1. ¿Jas rasonik oj skoltayotik ja jastal oj jchap jbʼajtik?

Ja snochumanik Kristo tʼilan oj «skʼutes sbʼaje toj sok mok jelxuke ja jastal oj xchap sbʼajeʼi sok a-spensaraʼuke lek». Cha tʼilan asyado skʼeljele bʼa wa xchiktes ke wa «xiwyeyuj ja Dyosi» (1 Timoteo 2:9, 10). Ila chane rason wa xkatik eluk ja bʼa tekstoʼi. 1) Ja jkʼutiki tʼilan «toj» ma lek skʼeljel. Ja bʼa xchonabʼil ja Jyoba tuktukil ja gustoʼil, jastalni awilata ja bʼa reunionik, pe ja jkʼutik sok ja jastal wa xjixa jbʼajtiki wa sjeʼa wa xkisatik ja Dyos wa xtoyotiki. 2) Ja mi oj ‹jelxukotik ja jastal wa xchapa jbʼajtik› tini chʼikan mi oj jlaptik jastik jel xpaywani. 3) Wa xjeʼatik wa ‹xpensarantik lek› ja mi xnochotik jastik bʼa moda ay. 4) Ja jkʼeljeltiki tolabida a-sjeʼ ke wala ‹xiwtikyuj ja Dyos›, yujni jach wa xjeʼatikyi ja tuk ke wa xkatikyi stoyjel ja Dyos smeranil (1 Corintios 10:31).

2. ¿Jas yuj tʼilan oj jpensaraʼuktik ja tuk yuja jastal jkʼeljeltik?

Keʼn kiʼojtik ja derecho stsajel jastal skʼutesel jbʼajtik. Pe tʼilan oj jpensaraʼuktik ja tuk ta mi tuk oj yil-e ja jkʼeljeltik. Wa xkʼulantik ja janekʼ wa xbʼobʼkujtik bʼa mi maʼ oj katik jom yolom. Jani wa xnochotik ja rason it: «Kada jujune ja keʼntiki la katik gustoʼaxuk ja jmojtiki sok la jkʼuluktik ja bʼa jas lek bʼa stsatsankʼujolajele» (kʼuman ja Romanos 15:1, 2).

3. ¿Jastal oj bʼobʼ skʼan ja tuk oj snaʼe sbʼaj ja Jyoba yuja jkʼeljeltik?

Wa xlapatik kʼuʼalik ja jastal wa xkan sbʼaj kada ekʼele. Pe wani stsaʼatik lek ja jas wa xlapatik ja bʼa reunioniki sok ja bʼa xcholjel. Mini xkʼanatik ke yuja jastal jkʼeltik mixa oj skʼan oj smaklaye ja jas wa xcholotik. Jaʼuktoma, wani xkʼanatik ke ja tuk oj skʼan oj snebʼ-e ja smeranil sok a-xchiktes «ja sjejelik sbʼaja jKoltanumtiki» (Tito 2:10).

 LA JNEBʼTIK MAS

4. Ja lek jkʼeljeltik wa sjeʼa wa xkisatik ja Jyoba

¿Jas rason mas tʼilan oj cham jkʼujoltik ja jastal jkʼeljeltik? Kʼumanik ja Salmo 47:2 sok loʼilananik sbʼaja jas ti nochani:

• ¿Jastal tʼilan oj jkʼutes jbʼajtik yuja yaʼtijumotik ja Jyoba?

• ¿Ay maʼ sbʼej oj jtsatik lek ja jastal oj jchap jbʼajtik ja oj wajtik ja bʼa reunionik sok ja xcholjel? ¿Jas yuj jach waxa pensaran?

 5. Ja jastal stsajel lek ja jkʼutik sok ja wa xchapa jbʼajtik

Kʼelawik ja BIDEO.

Mi tʼilanuk janekʼ stsʼakol ja jkʼutik. Ja mas tʼilani ta asyado sok lek skʼeljel ja bʼa ekʼele jaw. Kʼumanik ja 1 Corintios 10:24 sok 1 Timoteo 2:9, 10. Tsaʼan alawik jas yuj mi oj jlaptik kʼuʼal bʼa...

• ... jel tuk skʼeljel ma mi asyadoʼuk.

• ... jel pitan sok jel xpaywani.

Ama ja nochumanotik Kristo mixa ja wa xkiʼajtik ja Ley ajiyile ja Moisés, ja ley jaw wa sjeʼakitik ja jas wa spensaran ja Jyoba. Kʼumanik ja Deuteronomio 22:5 sok loʼilananik sbʼaja jas ti nochani:

• ¿Jas yuj mi lek oj jchap jbʼajtik sok skʼutesel jbʼajtik bʼa jun ixuk oj slaj jun winik ma jun winik oj slaj jun ixuk?

Kʼumanik ja 1 Corintios 10:32, 33 sok 1 Juan 2:15, 16, sok loʼilananik sbʼaja jas ti nochani:

• Ta ja jkʼeljeltik mi lek xyilawe ja kristyano bʼa jlugartik ma ja kongregasyon, ¿tʼilan maʼ oj cham jkʼujoltik? ¿Jas yuj?

• ¿Jastal wa skʼutes sbʼaje sok wa xchapa sbʼaje ja bʼa wa lugar?

• ¿Wan maʼ xa kʼuʼan ja tikʼe jaw mi lekuk bʼa jun nochuman Kristo? ¿Jas yuj jach waxa pensaran?

 JA JASA NEBʼA

Yajni wa stsaʼatik lek jastal oj jkʼutes jbʼajtik sok ja xchapjel jbʼajtik, wa sjeʼa wa xkisatik ja Jyoba sok ja tuk.

Yajel juljkʼujoltik

• ¿Jas yuj tʼilan xyila ja Jyoba ja jastal wa xchapa jbʼajtik?

• ¿Jas jujuntik rasonik oj skoltayotik ja bʼa jastal oj jchap jbʼajtik?

• ¿Ay maʼ jas oj bʼobʼ spensaraʼuke ja bʼa meran stoyjel ja jastal jkʼeljeltiki? ¿Jastal?