SJEJEL 54
Ja xchol ja «moso jel toj sok wa spensaraʼan leki»
Ja Jesús yeʼn «olomal ja bʼa kongregasyon» bʼa snochumanik (Efesios 5:23). Ja bʼa jtyempotik, jaʼ wa xyamakunuk ja «moso jel toj sok wa spensaraʼan leki» bʼa oj stoj ja snochumanik bʼa Luʼumi (kʼuman ja Mateo 24:45). Ja «moso» jaw ja tsajiye yuja Jesús, ja yuj chaʼan xchole. Ama jachuk, kʼotele mosoʼal bʼa Kristo sok wa skoltaye ja yermanoʼik bʼa Kristo. ¿Machunkiluk ja moso jaw? ¿Jastal wa stalnayotike?
1. ¿Machunkiluk ja «moso jel toj sok wa spensaraʼan leki»?
Ja Jyoba tolabida yaʼunej makunuk jun winik ma jun tsome winik bʼa stojel ja xchonabʼi (Malaquías 2:7; Hebreos 1:1). Jun sjejel, yajni cham ja Jesús, yeʼn stojowe ja kongregasyon ja jekabʼanumik sok ja ansyanoʼik (Hechos 15:2). Jastalni skʼulane, ja bʼa jtyempotik jun chʼin tsome ansyano, ja Tsome Tojwanum bʼa Testigoʼik bʼa Jyoba, wa xyaʼawe ja waʼelal bʼa Dyos sok wa stojowe ja xcholjeli. Ja tsome jaw jaʼa «moso jel toj sok wa spensaraʼan leki bʼa aji bʼa skʼabʼ [...] yuja yajwali» ja Jesús ja cholalik jaw (Mateo 24:45a). Ja Tsome Tojwanum, tsaʼubʼale yuja espíritu santo sok wa smajlaye ja tyempo oj yaʼe mandar soka Kristo ja bʼa sGobyerno bʼa satkʼinal, ja yajni xchʼak ja sakʼanile bʼa Luʼum.
2. ¿Jas waʼelal bʼa Dyos wa xyaʼa ja moso jel toj?
Ja Jesús yala ke ja moso jel toji oj ajyukyuj ja cholal bʼa oj «yayi swaʼel [ja tuk snochuman Kristo] ja bʼa mero styempoʼili» (Mateo 24:45b). Jastalni ja waʼelal bʼa jkuerpotik tsats wa xya ajyukotik sok lek, ja waʼelal bʼa Dyos, wa xkʼan kaltik ja tojelal ja bʼa Yabʼal ja Dyos, wa xyaʼa kiptik bʼa toj ajyel soka Jyoba sok skʼulajel ja aʼtel yaʼunejkitik ja Jesús (1 Timoteo 4:6). Ja waʼelal jaw wa x-ajikitik bʼa reunionik, bʼa asambleaʼik, bʼa juʼunik sok bʼa bideoʼik ti elel bʼa Biblia. Ja jastik jaw wa skoltayotik yabʼjel stojol ja jas wa skʼana ja Jyoba sok bʼa mas oj tsatsbʼuk ja jastal wa xkila jbʼajtiksok.
LA JNEBʼTIK MAS
La kiltik jas yuj wa xkʼanatik ja skoltanel ja «moso jel toj sok wa spensaraʼan leki», ja Tsome Tojwanum.
Ja Tsome Tojwanum wa xyayi waʼelal bʼa Dyos, tojelal sok wa skoltay ja testigoʼik bʼa Jyoba bʼa sutanal ja luʼum.
3. Ja xchonabʼ ja Jyoba tʼilan chapan oj ajyuk
Ja Jesús wa stojo ja Tsome Tojwanum bʼa oj xchap ja yaʼtele ja testigoʼik bʼa Jyoba. Ja bʼa bʼajtan siglo, jachni skʼulane ja kongregasyoni. Kʼelawik ja BIDEO.
Kʼumanik ja 1 Corintios 14:33, 40 sok loʼilananik sbʼaja jas ti nochani:
-
¿Jastal wa xchiktes ja bersikuloʼiki ke ja Jyoba wa skʼana chapan oj ajyuk ja sTestigoʼik?
4. Ja moso jel toj wa xchapa ja xcholjel
Ja xcholjeli jani ja aʼtel mas tʼilan yilawe ja bʼajtan nochumanik. Kʼumanik ja Hechos 8:14, 25 sok loʼilananik sbʼaja jas ti nochani:
-
¿Maʼ stojo ja xcholjel ja bʼa bʼajtan siglo?
-
¿Jas skʼulane ja Pedro sok ja Juan soka tojelalik ajiyile yuja tuk jekabʼanumik?
Ja xcholjeli jaʼa aʼtel mas tʼilan wa xchapa ja Tsome Tojwanum. Kʼelawik ja BIDEO.
Ja Jesús xchiktes ja stʼilanil ja xcholjel. Kʼumanik ja Marcos 13:10 sok loʼilananik sbʼaja jas ti nochani:
-
¿Jas yuj ja Tsome Tojwanum jel wa xyayi stʼilanil ja xcholjel?
-
¿Jas yuj wa xkʼanatik ja «moso jel toj sok wa spensaraʼan leki» oj xchap ja aʼtel bʼa sutanal ja luʼum?
5. Ja moso jel toj wa stojowotik
Ja Tsome Tojwanum wa stojowe ja snochuman Kristo bʼa sutanal ja luʼum. ¿Jastal wa stsaʼa jas tojelal oj yaʼ? Ila ja jas skʼulan ja Tsome Tojwanum bʼa bʼajtan siglo. Kʼumanik ja Hechos 15:1, 2 sok loʼilananik sbʼaja jas ti nochani:
-
¿Jasa mi akuerdo ajyiye jujuntik snochuman Kristo ja bʼa bʼajtan siglo?
-
¿Maʼ sleʼa skoltajele ja Pablo, Bernabé sok ja tuk bʼa stojbʼesel ja kʼumal jaw?
Kʼumanik ja Hechos 15:12-18, 23-29, sok loʼilananik sbʼaja jas ti nochani:
-
Bʼajtanto ay jas oj stsaʼe, ¿jasa skʼulan ja tsome tojwanum bʼa bʼajtan siglo bʼa oj tojukeyuj ja Dyos ja bʼa kʼumal jaw? (Kʼelawik ja bersikuloʼik 12, 15 sok 28).
Kʼumanik ja Hechos 15:30, 31 sok 16:4, 5, sok loʼilananik sbʼaja jas ti nochani:
-
¿Jasa skʼulane ja bʼajtan nochumanik ja yajni ajiyile ja tojelal yuja tsome tojwanum?
-
¿Jastal wa xnaʼatik ke ja Jyoba ya koʼ slekilal yuja skʼuʼane?
Kʼumanik ja 2 Timoteo 3:16 sok Santiago 1:5, sok loʼilananik sbʼaja jas ti nochani:
-
Yajni ay jas wa stsaʼa ja Tsome Tojwanum ja bʼa jtyempotik, ¿jas wa skʼulan bʼa oj ajukyi ja tojelal wa xmakuniyuj?
JA JAS WA XYALAWE JUJUNTIK: «Kechantani snochjel kristyano ja skʼuʼajelyi ja Tsome Tojwanum».
-
¿Jasa wa xya kʼuʼuk ke ja Jesús wan stojel ja Tsome Tojwanum?
JA JASA NEBʼA
Ja Tsome Tojwanum jaʼa «moso jel toj sok wa spensaraʼan leki» ke stsaʼa ja Kristo. Ja moso jaw wa xyayi tojelal sok waʼelal bʼa Dyos ja snochumanik Kristo.
Yajel juljkʼujoltik
-
¿Maʼ stsaʼa ja «moso jel toj sok wa spensaraʼan leki»?
-
¿Jas modo wa stalnayotik ja Tsome Tojwanum?
-
¿Wan maʼ xa kʼuʼan ke ja Tsome Tojwanum jaʼa «moso jel toj sok wa spensaraʼan leki»?
LEʼA TUK JASTIK
Ila jastal wa xchapa sbʼaj ja Tsome Tojwanum bʼa skʼulajel ja xcholi.
«¿Machun kʼotel ja Tsome Tojwanumi ja bʼa taʼumantiʼik bʼa Jyoba?» (Artikuloʼik bʼa jw.org)
Nebʼa jas wa skʼulan ja Tsome Tojwanum bʼa seguro oj ajyuke oj jipxuk kʼujolal ja waʼelal bʼa Dyos wa xyaʼawekitik.
¿Jastal wa xyilawe ja Tsome Tojwanum ja cholal akʼubʼalyile yuja Jesús?
¿Jastal wa x-ilxi ja bʼa reunionik sok asambleaʼik ke ja Jyoba wan stojel ja Tsome Tojwanum?
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
