Ja meran snochumanotikon Kristo puesto ayotikon bʼa mi jas oj stimotikon yajelyi stoyjel ja Jyoba. Seguro ke cha jach waxa wabʼ, sok ja Jyoba jel chaʼanyabʼal xyila ja toj aya (kʼuman ja 1 Crónicas 28:9). ¿Jastik oj bʼobʼ ya och probar yuja toj aya soka Dyos? ¿Sok jastal oj bʼobʼa talnabʼaj?

1. ¿Jastik oj bʼobʼ skʼuluke ja tuk bʼa oj ya och probar ja toj aytik soka Jyoba?

Jujuntik oj sleʼe modo oj katikan yaʼteltajel ja Jyoba. ¿Maʼ oj skʼuluk? Jun sjejel, jujuntik yaʼunejekan ja smeranil sok wane yaljel abʼalik sbʼaja xchonabʼ ja Dyos bʼa oj xchʼak-e ja jkʼuʼajeltik. Ja yeʼnle sbʼiʼile apóstataʼik. Cha ay olomalik bʼa relijyon wa spukuwe abʼalik sbʼaja keʼntik bʼa oj yaʼekan ja smeranil ja matik mi tsatsuk ja skʼuʼajele. Jel xiwela sbʼaj kʼeʼel kʼumal soka skontraʼik ja xchonabʼ ja Dyos, skʼumajel ja slibroʼe, ochel ja bʼa spaginaʼe bʼa internet ma skʼeljel ja sbideoʼe. Yaljel sbʼaja matik wa skʼana oj yaʼ yopijuk ja skʼanjel ajyel toj soka Jyoba, ja Jesús yala: «Aktayikani. Kʼotele tojwanumik bʼa mi xyilawe kʼinal. Sok ta june maʼ mi xyila kʼinal wa stojo pilan maʼ mi xyila kʼinal, xchawanile oj mokʼuke bʼa jun kʼeʼen» (Mateo 15:14).

¿Sok jasa wa x-ekʼ ta june wa xnaʼatik sbʼaj pe mixa skʼana oj ajyuk Testigo bʼa Jyoba? Yajni june wa xnaʼatik sbʼaj, jelni yaj yabʼjel. Bʼobʼta mini xnaʼatik maʼ ajyelsok toj: ja Jyoba ma yeʼna. Pe tʼilan puesto oj ajyukotik ajyel toj soka Jyoba chikan ja x-ekʼi (Mateo 10:37). Ja yuj wa xkʼuʼantik ja smandar ja Jyoba bʼa mi xmojtaytik ja kristyanoʼik jaw (kʼuman ja 1 Corintios 5:11).

2. ¿Jastik stsajel oj bʼobʼ ya och probar ja jastal toj aytik soka Jyoba?

Yuja wa xyajtaytik ja Jyoba, mini tʼun xkʼana oj jchʼik jbʼajtik soka relijyonik mi meranuk. Mini ja bʼa kaʼteltik, mini bʼa tsomeʼik, cha tʼilani mi jas ti chʼikanuk soka relijyonik mi meranuk ja jas wa xkʼulantik. Ja Jyoba wa xyala yabʼ ja it ja xchonabʼ: «Elanik ja tiw», ja bʼa relijyon mi meranuk (Apocalipsis 18:2, 4).

 LA JNEBʼTIK MAS

3. Talnabʼaj soka jeʼumanik bʼa loʼlanumik

¿Jasa tʼilan oj jkʼuluktik ta ay kabʼtik jastik mi lekuk sbʼaja xchonabʼ ja Jyoba? Kʼumanik ja Proverbios 14:15 sok loʼilananik sbʼaja jas ti nochani:

• ¿Jas yuj tʼilan bibo ajyel sok mok chʼak jkʼuʼuktik ja jastik wa xkabʼtiki?

Kʼumanik ja 2 Juan 10 sok loʼilananik sbʼaja jas ti nochani:

• ¿Jastal tʼilan oj kil jbʼajtik soka apóstataʼik?

• Bʼobʼta mini oj jtatike loʼil ja apóstataʼik, ama jachuk, ¿jastal oj bʼobʼ sjomotik ja jas wa xyalawe?

• Ta jkisatik ja jastik mi lek wa xyalawe sbʼaja Jyoba ma ja xchonabʼi, ¿jastal waxa wabʼ oj yabʼ?

4. Ajyan toj soka Dyos yajni jun hermano wa xkoʼ jun mulal

Ta kabʼtik june ja bʼa kongregasyon ke koʼel jun chaʼan mulal, ¿jasa cholal kiʼojtik? Paklay jun rason wa xtaʼatik ja bʼa ley ajiyi ja poko Israel yuja Dyos. Kʼumanik ja Levítico 5:1.

Jastalni wa xyala ja bersikulo, ta kabʼtik june koʼel jun chaʼan mulal, tʼilani oj jcholtikyabʼ ja ansyanoʼik ja jas wa xnaʼatik. Bʼajtanto oj jkʼuluktik ja jaw, ja mas leki la jniktikyi skʼujol ja maʼ koʼel chaʼan mulal ke ayalyabʼ ja ansyanoʼik. Pe mi kʼa skʼulan, anto keʼn oj kaltikyabʼ ja ansyanoʼik yuja toj aytik soka Jyoba. ¿Jas yuj skʼulajel ja jastik jaw juni sjejel bʼa yajalkʼujol sok ajyel toj soka...

• ... Jyoba?

• ... maʼ koʼel mulal?

• ... kongregasyon?

 5. Ajyan najat soka Niwan Babilonia

 JA JASA NEBʼA

Ta wa xkʼanatik ajyel toj soka Jyoba, tʼilan mok jmojtaytik ja matik wa xyaʼawekan. Cha tʼilan oj pil jbʼajtiksok juntiro ja relijyonik mi meranuk.

Yajel juljkʼujoltik

• ¿Jas yuj tʼilan mi oj kiltik, oj jkʼumuktik ma mi oj jmaklaytik ja jas wa xyala ja apóstataʼik?

• ¿Ojto maʼ jmojtaytike ja matik mixa skʼana oj ajyuke testigo bʼa Jyoba?

• ¿Jasa tʼilan skʼulajel bʼa skʼuʼajel ja mandar spiljel jbʼajtiksok juntiro ja relijyonik mi meranuk?