SJEJEL 59
Ojni bʼobʼ kuchukawuj ja yajni x-iji apatik
Chikani jas tyempo, yibʼanal ja snochumanik Kristo oj iljuke kontra, asta oj ijuk spatike. ¿Sbʼej maʼ oj xiwkotik?
1. ¿Jas yuj mi cham xkabʼtik ja wa x-iji jpatiktik?
Ja Biblia wa xyala jaman lek ke «yibʼanal ja matik wa xyiʼaje ja sakʼanile jastal snochuman ja Kristo Jesús sok wa xyaʼteltaye ja Dyosi ojni ijuk spatike» (2 Timoteo 3:12). Ja Jesús iji spatik yujni mi sbʼajuk ja sluʼumkʼinal ja Satanás. Sok jachuk ja keʼntiki, ja yuj mi cham xkilatik ke ja gobyernoʼik sok ja organisacionik bʼa relijyonik wa xyiʼaje jpatiktik (Juan 15:18, 19).
2. ¿Jastal oj ajyukotik chapan ja yajni x-iji jpatiktik?
Tʼilan oj katik tsatsbʼuk ja sjipjel jkʼujoltik bʼa Jyoba. ¿Jastal? Spiljel tyempo kada kʼakʼu bʼa yajelyi orasyon sok skʼumajel ja Yabʼal. Sok kʼajyel wajel ja bʼa reunionik. Spetsanil ja jaw, oj yawi ja ipal wa xmakuni awuj bʼa mini tʼun xiwel oj kuchukawuj chikan jas wokol, ama ja maʼ xyilawa kontra jaʼa wa pamilya. Ja jekabʼanum Pablo, bʼa tikʼanxta iji spatik, stsʼijbʼan: «Ja Jyoba yeʼnani ja jkoltanumi. Mini oj xiwkon» (Hebreos 13:6).
Pilan jasunuk wa skoltayotik bʼa mi oj xiwkotik jani xcholjel tikʼan. Ja xcholjeli wa sjeʼakitik bʼa oj jipjkʼujoltik bʼa Jyoba sok bʼa yajelkan ja xiwel soka kristyano (Proverbios 29:25). Ta ja wego mi la xiwi, chapan lek oj ajyan bʼa mi oja wakan xcholjel ama ja gobyerno wa skʼana oj ya kʼot tekʼan ja kaʼteltik (1 Tesalonicenses 2:2).
3. ¿Wan maʼ xkatik el slekil ja kuchelkujtik ja wa x-iji jpatiktiki?
Mini lek xkabʼtik ja wa x-iji jpatiktik. Pe yajni wa xkuchkujtik, wa stsatsbʼi mas ja jkʼuʼajeltik. Cha mas mojan wa xkabʼ ayotiksok ja Jyoba yujni wa xkilatik wa skoltayotik ja yajni wa xkabʼtik mixa oj bʼobʼkujtik (kʼuman ja Santiago 1:2-4). Ja Jyoba yaj xyabʼ ja wa xkiʼajtik wokol, pe wa xgustoʼaxi yuja mi x-el jganatik. Ja Biblia wa xyala: «Ta wa xkuchawujilex ja wokolik yuj skʼulajel ja bʼa leki, ja jaw jelni xya gustoʼaxuk ja Dyosi» (1 Pedro 2:20). Spetsanil ja maʼ oj kuchyuj sok x-ajyi toj, ja Jyoba oj yayi ja stsʼakol soka sakʼanil bʼa tolabida bʼa jun luʼum bʼa mixa oj ajyuk ja skontraʼik ja sakal stoyjel (Mateo 24:13).
LA JNEBʼTIK MAS
La kiltik jujuntik modo wa sjeʼa wa xbʼobʼ ajyukotik toj soka Jyoba ama x-iji jpatiktik. Sok la kiltik jastal oj stupkitik yuja wa xkuchkujtiki.
4. Oj bʼobʼ kuchukawuj ja wa xyilawa kontra jawa pamilya
Ja Jesús snaʼa lek ke jujuntik ja bʼa jpamilyatik kontra oj ajyuke yuja wa xtoyotik ja Jyoba. Kʼumanik ja Mateo 10:34-36 sok loʼilananik sbʼaja jas ti nochani:
-
Yajni ay maʼ wa stsaʼa oj yaʼteltay ja Jyoba, ¿jastal oj bʼobʼ yabʼ ja spamilya?
Bʼa snajel sbʼaj jujuntik bʼa jach ekʼ sbʼaje, kʼelawik ja BIDEO. Tsaʼan loʼilananik sbʼaja jas ti nochani:
-
¿Jas oja kʼuluk ta june bʼa wa pamilya ma wamigo sleʼa modo oj ya kʼokxan bʼa yajelkan ja Jyoba?
Kʼumanik ja Salmo 27:10 sok Marcos 10:29, 30. Yajni akʼumanexta kada teksto, loʼilananik sbʼaja jas ti nochani:
-
¿Jastal oj skoltaya ja kʼapjelal jaw bʼa oj kuchukawuj ta yilawa kontra jawa pamilya ma wamigoʼik?
5. Moka wakan oj stima bʼa yaʼteltajel ja Jyoba jawa x-iji apatik
Tʼilan mok xiwkotik bʼa yaʼteltajel ja Jyoba yajni ja tuk sleʼawe oj stim-otike. Kʼelawik ja BIDEO sok loʼilananik sbʼaja jas ti nochani.
-
¿Jastik junuk ja bʼa bideo wa xyawi awip bʼa mi oj xiwan?
Kʼumanik ja Hechos 5:27-29 sok Hebreos 10:24, 25. Yajni akʼumanexta kada teksto, loʼilananik sbʼaja jas ti nochani:
-
¿Jas yuj jel tʼilan mok katikan yaʼteltajel ja Jyoba ama ja matik ay xchol stimawe oj jcholtik ma stsomjel jbʼajtik?
6. Ja Jyoba oj skoltaya bʼa kuchelawuj
Ja testigoʼik bʼa Jyoba bʼa tuktukil sjabʼile sok país bʼobʼelyujile ajyel toj soka Jyoba ama ijel spatike. Bʼa snajel jastal lajxelyujile, kʼelawik ja BIDEO. Tsaʼan loʼilananik sbʼaja jas ti nochani:
-
¿Jasa koltajiye bʼa oj kuchyujile ja yajni wan ijel spatike?
Kʼumanik ja Romanos 8:35, 37-39 sok Filipenses 4:13. Yajni akʼumanexta kada teksto, loʼilananik sbʼaja jas ti nochani:
-
¿Jastal wa xya kʼuʼuk ja teksto ke ojni bʼobʼ kuchukawuj chikan jas prueba?
Kʼumanik ja Mateo 5:10-12 sok loʼilananik sbʼaja jas ti nochani.
-
¿Jas yuj ojni bʼobʼ ajyan gusto ama x-iji apatik?
Miyonik yaʼtijumik ja Jyoba bʼobʼel kuchyujile ja wa x-iji spatike. ¡Cha ojni bʼobʼukawuj ja weʼn!
JA JAS WA XYALAWE JUJUNTIK: «Mi oj kuchkuj ja oj iljukon kontra».
-
¿Jas tekstoʼik oj bʼobʼ koltajukyuj ja maʼ wa spensaran jachuki?
JA JASA NEBʼA
Ja Jyoba jel chaʼanyabʼal xyila ja wa xkʼujolantik bʼa yaʼteltajel ama wa x-iji jpatiktik. ¡Ojni kuchkujtik soka skoltaneli!
Yajel juljkʼujoltik
-
¿Jas yuj ja nochumanotik mi cham xkilatik ja wa x-iji jpatiktik?
-
¿Jas oj bʼobʼa kʼuluk bʼa chapanxa oj ajyan ja yajni xkʼe ijuk jpatiktik?
-
¿Jasa wa xya kʼuʼuk ke ojni bʼobʼa waʼteltay ja Jyoba chikan jas x-ekʼi?
LEʼA TUK JASTIK
Ila jastal ja Jyoba skoltay jun kerem ajyi lutan yuja mi och soldado.
Paklay jasa koltajiyuj jun nupanum bʼa oj yaʼteltay toj lek jitsan jabʼil ja Jyoba ama yuja tsatsal wokoli.
Kaʼteltaytikon ja Jyoba ja bʼa tyempoʼik jel jas tukbʼi (7:14)
Nebʼa jastal oj kuchukawuj sok mini tʼun xiwel ja xkʼe ijuk jpatiktik.
«Chapan la ajyitik ja x-iji jpatiktik» (Ja Juʼun Cholumani, julio bʼa 2019)
¿Jastal oj kiltik ja kontraʼal ja bʼa pamilya? ¿Sok jastal oj bʼobʼ katik ajyuk ja lamanil sok ajyel toj soka Jyoba?
«Ja smeranili mi xyiʼajan lamanil, wa xya ‹qʼue pleito›» (Ja Juʼun Cholumani, octubre bʼa 2017)
Bʼobʼta cha ojni akʼul gusto
SJOBʼJELIK MAS TIKʼANIK WA X-AXI
¿Jastal ja estudio b’a Biblia wa skʼapawe ja testigo’ik b’a Jyoba?
Ja bʼa estudio kʼebʼubʼal wa xyaʼawe ja testigoʼik bʼa Jyoba, ja weʼn wani xbʼobʼa wa makunuk chikan jas Biblia. Cha wani xbʼobʼa lok yibʼanal jawa pamilya sok jawa wamigoʼiki.
