Sjejelik wa xbʼobʼ skoltayotik:

• Gé 24:​1-4, 7. Ja Abrahán, bʼa awelxa, puesto ajyi bʼa slejelyi jun xcheʼum ja skerem Isaac bʼa wa xyaʼteltay ja Jyoba; mini skʼana ke oj nupanuk soka swinkil ja Canaán, yujni ja cananeoʼiki wa xyaʼteltaye tuk dyosik.

• Gé 28:​1-4. Ja Isaac yala yabʼ ja Jacob ke mok nupanuk soka swinkil ja Canaán, masni lek a-sleʼ jun xcheʼum bʼa wa xyaʼteltay ja Jyoba.

Sjejelik wa xbʼobʼ skoltayotik:

• 1Re 11:​1-6, 9-11. Ja Jyoba tajki soka rey Salomón yujni mi skisa ja sleyiki sok nupani soka ixuke bʼa tuk país bʼa iji och yaʼteltajel tuk dyosik.

• Ne 13:​23-27. Junxta jastal ja Jyoba, ja mandaranum Nehemías jelni tajki yuja winike israʼelenyoʼik nupaniye soka ixuke bʼa tuk país bʼa mi xyaʼteltaye ja Dyosi; ja yuj stojoni.

Sjejelik wa xbʼobʼ skoltayotik:

• 1Sa 25:​2, 3, 14-17. Ama ja Nabal ja statam ja Abigaíl jel ajyiyuj jastik sbʼaj, mini ajyiyuj ja jas wa skʼana bʼa kʼotel jun lekil tatamal, yujni jel kʼakʼ sok jel malo.

• Pr 21:9. Ta mi jtsaʼatik lek ja maʼ oj nupanukotiksoki, jelni oj bʼobʼ yijankitik wokol sok mi oj ajyukotik laman.

• Ro 7:2. Ja jekabʼanum Pablo xcholo ke yajni jun ixuk oj nupanuk, ja statam bʼa kʼotel jun winik mulanum ojni ajyukyuj jujuntik cholal sbʼaja yeʼni; ja yuj jun ixuk bibo ojni spensaraʼuk lek bʼajtanto oj stsaʼ maʼ oj nupanuksok.

Sjejelik wa xbʼobʼ skoltayotik:

• Pr 24:27. Bʼajtanto oj nupanuk jun winik sok bʼobʼta oj ajyuk yuntikil, tʼilani oj sjeʼ ke wa x-aʼtiji sok chapan ay bʼa oj stalnay ja spamilya.

Sjejelik wa xbʼobʼ skoltayotik:

• Rut 2:​4-7, 10-12. Ja Boaz snaʼa jas tikʼe ixuk waj ja Rut, yujni yila jel lek x-aʼtiji, skisa ja jas yalawe ja tuk bʼa yeʼna sok waj skʼujol ja bʼa jastal wa xtax soka Dyos sok ja bʼa jastal wa skʼulan tratar ja spamilyaʼi.

• Rut 2:​8, 9, 20. Ja Rut snaʼa jas tikʼe winik waj ja Boaz yajni yila ke jel lek ja smodo sok jaman skʼujol, sok wa syajtay ja Jyoba.

Sjejelik wa xbʼobʼ skoltayotik:

• Pr 5:​18, 19. Ayni jujuntik modoʼik bʼa wa xbʼobʼ sjeʼe wa skʼana sbʼaje june bʼa kechanta wa xbʼobʼ skʼuluke ja matik nupanelexa.

• Can 1:2; 2:6. Yajni snobio sbʼaje, ja talnachej sok ja sulamita tolabida sjeʼawe ke wa skʼana sbʼaje bʼa jun modo toj sok sak.

• Can 4:12; 8:​8-10. Ja sulamita tolabida sak ajyi sok skomo sbʼaj, ja Biblia wa xya slaj kʼot jastal jun jardín bʼa makan ay.

 Sjejelik wa xbʼobʼ skoltayotik:

• Gé 21:​8-12. Ja Jyoba yala yabʼ ja Abrahán ke a-skʼuʼukyi ja xcheʼumi, ja Sara, ama mi lek yabʼ ja jas aljiyabʼi.

• Pr 31:​10, 11, 16, 28. Jun winik bibo mini stima bʼa yibʼanal ja xcheʼumi sok mi jaxta wa xwaj skʼujol ja spalta; jaʼuktoma, jachni jastal ja statam ja ixuk bʼa chapani: jun winik bʼa wa sjipa skʼujol ja xcheʼumi sok wa stoyo.

• Ef 5:33. Ja jas yalakan ja jekabʼanum Pablo wa xchiktes ke jun ixuk wani skʼana oj snaʼ ke wa xyajtajiyuj ja statami.

Sjejelik wa xbʼobʼ skoltayotik:

• Pr 1:8; 1Co 7:4. Ja Dyos yaʼunejyi jujuntik cholal ja cheʼumalik sok ja nanalik tanto ja bʼa nupanel sok ja bʼa stalnajel ja yuntikileʼi.

• 1Co 11:3. Ja jekabʼanum Pablo xcholo ke jpetsaniltik ay maʼ ibʼ kʼabʼal aytiksok, kechani miyuk ja Maʼ jel ja yipi.

• Heb 13:​7, 17. Sea winike sok ixuke tʼilani oj skʼuʼukeyi ja matik tsaʼubʼale bʼa stojel ja kongregasyon sok oj skoltaye.

Sjejelik wa xbʼobʼ skoltayotik:

• Gé 18:12; 1Pe 3:​5, 6. Ja Sara jelni skʼulan respetar ja statami, sok asta yila jastal ‹yajwal›: ja maʼ olomalyuj sbʼaja jastal wa xtax soka Dyosi.

Sjejelik wa xbʼobʼ skoltayotik:

• Gé 24:​62-67. Ja Rebeca skoltay ja Isaac bʼa yajelyi kulan skʼujol yajni cham ja snani.

• 1Sa 25:​14-24, 32-38. Ja Abigaíl yaʼa sbʼaj chʼin yajni waj yil ja David bʼa skoltajel ja statami, bʼa juni sonso; stsʼakatal yuja jawi bʼobʼ skoltay ja sakʼanil ja matik tey ja bʼa snaji.

• Est 4:​6-17; 5:​1-8; 7:​1-6; 8:​3-6. Bʼa skoltajel ja xchonabʼ ja Dyos, ja reina Ester chabʼ ekʼele peligro ya ajyuk ja sakʼanil yuja waj yil ja statami, ja reyi, bʼa mi yeʼn payjiyuj.