Ja maʼtika was yajta sbʼajeʼi, wa skʼulan sbʼaje amigo. Oja yajta mas ja Jiʼoba ja yajni xanebʼa mas sbʼa ja yeʼn. Ja itiʼ oj stsatsal kʼujolanaj bʼa ja kʼula bʼa snebʼumanil bʼa Jesukristo (Mateo 28:19). Oj bʼobʼa kʼulabʼaj yamigo Diʼos bʼa juntiro ta waxa kʼulanabʼaj bʼa spamiliʼa ja taʼuman tiʼ jumasaʼ bʼa Jiʼoba. ¿Jasa oja kʼuluk ja bʼa jawi?

Wax makuniwuj oja jeʼe waxa yajtay ja Diʼosi skʼuʼajel ja sleyʼ jumasaʼ. “Ta yaj kʼa wax kabʼtik meran ja Diʼosi, ojni jkʼuʼuktik meran ja smandari. Y miʼ wokoluk wax kabʼtik wax kʼuʼantik ja jas wax yala ja yeʼni.” (1 Juan 5:3).

Kʼuʼan ja jasa waxa nebʼa. Jesus xcholo jun loʼil wa skoltayotik bʼa oj natik stojol ja itiʼ. Jun winik wa snaʼa mas skʼulan jas snaji bʼa jun patakʼ, sok jun winik sonso skʼulan bʼa yoj jijkabʼ. Ja yajni jaka tsatsal jaʼi ja naʼits tiʼ tojbʼel ja bʼa patakʼ kan tekʼan, pe ja naʼits tiʼ tojbʼel bʼa yoj jijkabʼ mokʼniʼa jex juʼulji koʼij. Jesus yala ja kristiʼano jumasaʼ wa smakla ja jas wan seʼjeli jachʼ jastal ja winik wa snaʼa masi ja it skʼulan ja snaj bʼa patakʼ. Chomajkil yala ja maʼtik wa smakla ja jas wa sjeʼa pe miʼ wa skʼuʼane jachʼ jastal ja winik sonso skʼulan ja snaj bʼa yoj jijkabʼ. ¿Bʼaya xchabʼil winik wax kʼana laj ja weʼni? (Mateo 7:24-27.)

 Aʼaj. Ja itiʼ wa xkʼan yal oja wayiʼ orasiʼon ja Jiʼoba bʼa oja walyabʼi wa xkʼana kʼulyiʼ ja jas wa skʼana bʼa juntiro. Oja jeʼa bʼa snebʼuman bʼa Jesukristo ta wan kʼaxa kʼulan ja jas wa skʼana Diʼosi (Mateo 11:29).

Iʼaj jaʼ. “Oja wi jaʼ. Kʼuʼan xa ke miʼ tajneluk ja sbʼiʼil ja Kajwaltiki. Oj ni skʼul perdonar spetsanil ja wa mula.ʼʼ (Hechos 22:16.)

Ateltay ja Diʼosi tsʼikanlek. “Chikan jasunkʼa ja wa watelexi, pero kʼulanik sok spetsanil ja wa kʼujolexi porke ja mero smeranili, lajan sok ja wanex yateltajel ja Kajwaltiki [Jiʼoba, NM], miʼ jaʼuk ja yeʼnleʼi.” (Colosenses 2:23.)