Chamel chʼakel miʼ oj slaj ja sakʼanaltiki. Chamel chʼakel jachʼ jastal wala waytik toj chamel (Juan 11:11-14). Chamwinik mix bʼobʼ yabʼyeʼ, miʼ xilwaniye, miʼ xkʼumaniye mini pensar (Eclesiastés 9:5, 10). Relijiʼon miʼ meranuk wax yala ja chamwinike tiʼ wax wajye bʼa luʼumkʼinal bʼa espiritu jumasaʼ, oj waj sakʼan soka ma ekʼta yuji. Ja Bibliʼa miʼ wa sjeʼa ja jawi.

Kristiʼano jumasaʼ chamelxa miʼ jbʼobʼ skoltayotik sok mini oj yixtalanotik. Kristiʼano jumasaʼ wax kʼaj yiye yajelyiʼ skis jel sok majtanal jasyu wa skʼuʼane ja jawi wa skʼana ja chamwiniki. Pe Diʼos miʼ skʼana jasyuj ja kostumbre itiʼ wa snocho bʼa jun abʼal bʼa Satanas. Sok, mix bʼobʼ kʼan juke yuj ja kristiʼano jumasaʼ maʼtik chamelxa mey saʼkanile. Ja yuj, mix bʼobʼ xiwkotiʼ yuj mini jkʼultik adorar ja chamwiniki jumasaʼ; kechan oj kʼultik adorar ja Diʼosi (Mateo 4:10).

Chamwinik jumasaʼ oj sakʼwukejani. Jiʼoba oj syujkes jani ja chamwinik jumasaʼ bʼa oj sakʼwuke jani bʼa jun paraʼiso bʼa Luʼumiʼ (Juan 5:28, 29, Hechos 24:15). Jachuk jastal ja weʼn oj bʼobʼa yujkes jun maʼ wan wayel, Diʼos oj bʼobʼ syujkes ja kristiʼano jumasaʼ chamelxa (Marcos 5:22, 23, 41, 42).

Satanas Diʼablo skʼulunej bʼa skʼuʼuke jitsan kristiʼano ja abʼal miʼ bʼi la chamtik. Satanas soka pukuj jumasaʼ wax yaʼ we skʼuʼuk ja kristiʼano jumasaʼ ja chamwinik jumasaʼ ayiʼoje espiritu, sok sakʼane bʼi, sok wax yaʼ och chamel sok tuk wokol jumasaʼ. Satanas wa slola ja kristiʼano jumasaʼ soka wayich sok snajsatin. Ja yuj, Jiʼoba wax yila malo ja machʼtika wax kʼan lolanuk soka chamwinik jumasaʼ (Deuteronomio 18:10-12).