Oj bʼobʼa naʼ sbʼaj ja Jiʼoba skʼumajel ja Bibliʼa. Axa tiʼempo, Diʼos stsaʼa jujuntik kristiʼano bʼa oj stsijbʼuke ja jasa spensar ja yeʼn. Ja jaw stsibʼaye sbʼiʼil: Bibliʼa. Ja bʼa tiʼempo wego oj bʼobʼ natik sbʼaj ja Diʼosi skʼumajel ja Bibliʼa, jasyuj ayiʼo yabʼal ja Jiʼoba, ma ja jas wax yala ja yeʼn, ja yuj chomajkil sbʼiʼil: Yabʼal Diʼos. Oj bʼobʼ jkʼuʼuktik ja jasa wax yala Bibliʼa bʼa Jiʼoba nunka xyala abʼal. “Ja Diʼosi mix bʼobʼ sleʼe mentira.” (Hebreos 6:18.) Ja Yabʼal Diʼos ay yiʼo ja smeranili (Juan 17:17).

Diʼos yaʼojkitik ja Bibliʼa: ja jujune majtanal jel xmakuni. Jachʼ jastal ja juʼun bʼa jun tatal jel ja syajal skʼujol wa sjekayiʼa yuntikili. Wax yala kabʼtik ja jas alubʼal mix ekʼlom ja bʼa Diʼosi bʼa oj yaʼ paxuk ja Luʼum bʼa jun tsamal lugar bʼa oj ajyukotik sakʼan: jun paraʼiso. Wax yala kabʼtik ja jasa Diʼos skʼulan, jasa wa skʼulan soka jasa oj skʼuluk soka yuntikil miʼ skʼulan payar. Chomajkil, oj skoltayotik oj jtoj bʼes bʼajtik soka wokoli sok ojtatik tsamalil (2 Timoteo 3:16, 17).

 Ja taʼuman tiʼ jumasaʼ bʼa Jiʼoba yamigoʼe ja Diʼosi; oj skoltana bʼa ja nebʼ jasa wa sjeʼa ja Bibliʼa. Kechan aliʼabʼi waxa kʼana oja nebʼ ja bʼa Bibliʼa; miʼ oj skʼan stsakoleʼ (Mateo 10:8). Chomajkil, oj bʼobʼ wa jan ja bʼa tsomjel bʼa nochuman jumasaʼ bʼa Kristo ja bʼa lugar bʼaj wax kʼulxi adorari sbʼiʼil: Naʼits bʼa Reʼino. Ta wala waj ja bʼa spetsanil tsomjel, oja nebʼ jitsan bʼa jel tʼusan tiʼempo.

Oj bʼobʼa naʼ sbʼaj ja Diʼosi yuj ja jastik junuk skʼuluneji. Kʼulan pensar ja itiʼ, ja Bibliʼa wax yala: “Diʼos skʼulan ja satkʼinali sok ja luʼumiʼ” (Génesis 1:1, NM). Yajni ja Jiʼoba “skʼulan ja satkʼinali”, stojbʼes ja Kʼakʼu. Jachuk, ¿jas wa sjeʼa kitik ja it sbʼa Diʼosi? Jiʼoba jel niwan ja yipi; kechan yeʼn bʼobʼ skʼuluk jun jastik junuk bʼa jel ja yipi jastal ja Kʼakʼu. Chomajkil, wax yala kʼabʼtik Jiʼoba jel snaʼa, pes wa skʼana oj snaʼ jitsan bʼa ostojbʼes ja Kʼakʼu, wax yaʼa jkʼixnaltik sok wax ijlabʼani sok nunka xtupi.

Yibʼanal ja jasa skʼulunej ja Jiʼoba wa sjeʼa wa syajtayotik. Pensaran tuktukil tekʼul ay ja bʼa Luʼumiʼ. Jiʼoba bʼobʼ yakitik juntikʼe tekʼul, ma mini june. Pe Jiʼoba yaʼojkitik jitsan tekʼul, bʼa tuktukil bʼa sbʼobʼelal, sniwakil, yelaw sok yajbʼal. Ja jawi wa skʼana yal leʼ Jiʼoba wa syajtayotik, wa skʼulan gusto oj yaʼ, miʼ tsatsuk sok wax koltani (Salmo 104:24).