Wax makuniwuj oja kʼumuk wa wamigoʼ bʼa miʼ ja chʼayiʼ. Weʼn waxa maklay sok yeʼn wa smaklaya. Chomajkil, wala kʼumani lek sbʼa ja yeʼn. Jachʼ junxta oja kʼul yajni oja wamigoʼuk ja Diʼosi. Kʼela ja jasa wax yala ja Bibliʼa oja kʼuluki.

Ayiʼ orasiʼon ja Jiʼoba tolabida. “Kʼumanik tolabida ja Diʼosi.” (Romanos 12:12.)

Kʼuman ja Yabʼal Diʼos, ja Bibliʼa. “Spetsanil ja yabʼal ja Diʼosi, Diʼos ni yaʼ jak skʼujol ja maʼ stsʼijbʼa kani. Sbʼej ni oj jetika. Ta mikʼa tojuk ayotik, was skomowotik. Wa sjeʼa kitik ja bʼa leki bʼa oj kitik jun jbidatik bʼa mas toj.” (2 Timoteo 3:16.)

Jeʼayiʼ ja kristiʼano jumasaʼ soka bʼa Diʼosi. “Jaxa weʼnlexi, kaʼaxik, kaʼax ja bʼa spetsanil ja lugari bʼa jachuk oj och jnebʼumanil ja kristiʼano jumasaʼ [...]. Jeʼawik bʼa oj skʼuʼuke spetsanil ja jmandari.” (Mateo 28: 19, 20.)

 Tsomo bʼaj soka yamigo jumasaʼ bʼa Diʼosi. “Ja ma wan bʼejyel soka kristiʼano jumasaʼ ma wa snaʼa mas, ojni cha snaʼ masa.” (Proverbios 13:20, NM.)

Kaʼax ja bʼa tsomjel bʼa Naʼits bʼa Reʼino. “La jkʼultik pensar ja yaltsil ja otro jmojtiki. Mi ni sbʼejuk kechan keʼntik mismo oj kʼul jbʼajtik pensara. Sbʼej ni oj yajtatik ja jmojtika. Laxa jletik modo jastal oj kolta jbʼajtik. [...] Sbʼej wax ka jbʼajtik niwankʼujol.” (Hebreos 10:24, 25.)

Koltanan bʼa oj snoch ja atel bʼa Reʼino. “Pero kada jujuneʼotik, keʼntik mismo oj kʼultik pensar. Miʼ sbʼejuk puersa oj katik ja jlimosnatiki porke ta jachʼ kʼa, mala gana ni wax katik ja jastal jawa. Ja Diʼosi wa skʼana oj katik ja jlimosnatiki, pero sok spetsanil ja jkʼujoltik ja jgustotiki.” (2 Corintios 9:7.)