Satanas soka spukuj miʼ skʼanaweʼ oja wateltay ja Diʼosi. Oj sjits el bʼa Diʼos spetsanil ja janekʼ oj bʼobʼ yuji. ¿Jastal? Jun modo janiʼa oj yaʼ makunuk ja relijiʼon miʼ meranuk (2 Corintios 11:13-15). Jun relijiʼon jaʼi miʼ meranuk ta miʼ sjeʼa ja smeranil bʼa Bibliʼa. Relijiʼon wa sjeʼa jas miʼ meranuk jachʼ jastal takʼin bʼa miʼ meranuk: lajan sok meran lek, pe mix makunij, sok oj bʼobʼ yijan wokol.

Jiʼoba, Diʼos bʼa smeranil, miʼ skʼana ja jas miʼ meranuki ja bʼa relijiʼoni. Ja yora Jesus tiʼ ajyiʼ bʼa Luʼumiʼ, jujuntik jeʼa bʼej bʼa relijiʼon wa skʼana oj smileʼ. Wa spensaraneʼ ajyiʼ waneʼ skʼuljel ja sleki. Wax yalaweʼ: “Cho jtatikon ni ja Diʼosi”. ¿Aj yima akuʼerdo ja Jesusi? Miyuk, sok yal yabʼyeʼ: “Ja weʼnlexi jaʼ [...] atatex ja tan Diʼablo” (Juan 8:41, 44). Ja bʼa tiʼempo itiʼ, aʼay kristiʼano wa skʼuʼan wa skʼulan adorar ja Diʼosi, pe jas meranili ja wax yateltaneʼ ja Satanasi soka spukuj jumasaʼ (1 Corintios 10:20).

 Jachʼ jastal jun teʼ kʼaʼelxa bʼa yojol wax yaʼa sat bʼa malo, relijiʼon miʼ meranuk wax yaʼ ajyuk kristiʼano wa skʼulan jastik malo. Luʼumkʼinali bʼutʼel wokol yujila jastik malo wa skʼulan ja kristiʼano jumasaʼ. Jujuntik wa skʼulane jastik kistal, tiroʼanel, elkʼanel, tʼenwanel, milwanel sok yixta lajel ixuk. Aʼay kristiʼano ja ma wa skʼulan ja jastik junuk malo itiʼ ay srelijiʼone, pe miʼ skisawe, sok mix aj yiye toj. Ta mikʼa stuk bʼes bʼaje sok mikʼa xyawekan skʼuljel ja jasa malo, ja yeʼnleʼi miʼ oj bʼobʼ skʼul sbʼaje yamigo bʼa Diʼos (Mateo 7:17, 18).

Relijiʼon miʼ meranuk wa sjeʼa yija kristiʼano jumasaʼ oj yaweyiʼ orasiʼon tan kʼulubʼal diʼos. Diʼos wax yalaj miʼ oj katiyiʼ orasiʼon ja tantik kʼulubʼal diʼosi, sok ja it stojolil. ¿Ojma yawi gusto ta ayma wa skʼuman ja wa poto pe nunka skʼumana aweʼni? ¿Ojma wa wamigoʼuk ajyiʼ ayma oj skʼulukawi ja jawi? Miyuk, mix bʼobʼi. Jiʼoba wa skʼana ja kristiʼano jumasaʼ oj kʼuma jukyuj, miʼ jaʼuk oj skʼumuke jun splanta ma jun dibujo miʼ sakʼanuk (Exodo 20:4, 5).

Relijiʼon miʼ meranuk wa sjeʼa wax bʼobʼ milxuk ja kristiʼano jumasaʼ ja yajni teya gerra. Jesusi yala ja yamigo jumasaʼ ja Diʼosi oj syajta sbʼaje ajyiʼ. Mix mila tik ja kristiʼano jumasaʼ wax yaj tatik (Juan 13:35). Mini chalekuk smiljel ja kristiʼano malo. Yajni yiʼaj je och ja Jesusi ja skontra ja yeʼn, miʼ yaʼ kani ja snebʼuman jumasaʼ oj smak sbʼaje bʼa miʼ oj ijuk och bʼa preso (Mateo 26:51, 52).

Relijiʼon miʼ meranuk max yala ja kristiʼano jumasaʼ maloʼi oj yiʼe syajal bʼa yoj impiʼerno. Ja Bibliʼa wa sjeʼa ja mulali wax yiʼa och bʼa chamel chʼakel (Romanos 6:23). Jiʼoba jun Diʼos bʼa yajtanel. ¿Ojma syajbʼes juntiro ja kristiʼano jumasaʼ jun Diʼos bʼa jel syajtanel? Pes miyuk. Ja bʼa Paraʼiso kechan oj ajyuk jun relijiʼon, ja relijiʼon Jiʼoba wax yala leki (Apocalipsis 15:4). Spetsanil ja tuk relijiʼon jumasaʼ, wax tax abʼal bʼa Satanas, mixa oj ajyuk.