Ja wokol jumasaʼ wax ekʼi ja jun senya ja Paraʼiso tixa ay mojan. Ayxa aʼay tiʼempo ja Bibliʼa yala oj ajyuk niwak wokol jumasaʼ yajni tixa ay mojan ja Paraʼiso, sok wan xa ekʼel ja itiʼ. Ja itiʼ ja jujuntik wokol yala ja Bibliʼa oj ekʼuk:

Niwak gerra jumasaʼ. “Ja lugar jumasaʼ, puro koraja oj yil sbʼaje. Ja gobiʼerno jumasaʼ oj ochuke pleʼito”. (Mateo 24:7.) Ja jas alubʼal mix ekʼlom tsʼikwitaj. Masanto bʼa jabʼil 1914 ajyel chabʼ gerra bʼa spetsanil luʼumkʼinal sok aʼay pilan gerra chʼinik. Aʼay miyon bʼa kristiʼano jumasaʼ chameleʼ ja tiwi.

Ja junxta chamel jumasaʼ bʼa tuktukil lugar. “Oj ayuk jitsan chamel ja bʼa tuktukil lugari” (Lucas 21:11). ¿Tsʼikwel ma senya it? Ojo. Ja kanseri, ja chamel jumasaʼ ja bʼa kʼujoli, ja sak ojobʼi, ja paludismo, ja sida sok pilan chamel jumasaʼ smilunej aʼay miyon bʼa kristiʼano.

Tʼusan waʼel. Bʼa spetsanil ja Luʼumiʼ ay kristiʼano jel tʼusan swaʼele. Miyon jumasaʼ bʼa kristiʼano wax cham waʼin kada jabʼil. Ja itiʼ juni cha senya ja Paraʼiso tixa ay mojan. Bibliʼa wax yala: “Jel oj ajyuk ja waʼini” (Marcos 13:8).

 Jel oj kʼitkʼunuk ja luʼumiʼ. “Jel oj ajyuk ja temblori.” (Mateo 24:7.) Ja it chomajkil tsʼikwitaj ja bʼaj jtiʼempo il tiki. Masanto bʼa 1914 man ili, ayxa chamel mas jun miyon ja kristiʼano jumasaʼ yuj wax kʼitkʼuni ja luʼumiʼ.

Kristiʼano malo jumasaʼ. Ja Bibliʼa wax yalaj ja kristiʼano jumasaʼ oj syajtaye ja takʼini, oj syajta sbʼaje yeʼnxta sok oj syajtaye ja sgustoʼe, pe miʼ skisawe ja Diʼosi. Ja untiki miʼ oj skʼuʼuke yiʼ ja snan stateʼi (2 Timoteo 3:1-5). ¿Miʼ maxa kʼuʼana tiʼempo it ay jitsan kristiʼano jachuk? Miʼ skisawe ja Diʼosi sok wax yiʼa jejan wokol sbʼaj ja maʼtika wa skʼana oj snebʼ sbʼa ja yeʼn.

Mulal. Chomajkil “oj jelxuk juntiro ja maloʼili” (Mateo 24:12). ¿Ja wilatama ja jabʼil jumasaʼ itiʼ ay mas kristiʼano wa sleʼa smule? Bʼa spetsanil lugar bʼa bʼaya kristiʼano jel xiwela sbʼaj oj staʼe elkʼanum, lolajel ma oj yaj bʼe sjuke.

Spetsanil ja itiʼ jun senya ja Reʼino bʼa Diʼosi tixa ay mojan. Ja Bibliʼa wax yala: “Jachuk kuʼando waxa wilawex ja kosa jumasaʼ itiʼ, naʼawik tʼusan ke ojxa jakuk ja Diʼos ja maʼ wa skʼulan mandari” (Lucas 21:31). ¿Jasa ja Reʼino bʼa Diʼosi? Ja smandar Diʼos bʼa satkʼinali; oj skʼuluk ja bʼa Luʼumiʼ jun paraʼiso. Oj yiyiʼ ja slugar spetsanil smandar bʼa kristiʼano jumasaʼ (Daniel 2:44).