Yajni ay awiʼoj juna wamigo waxa kʼana lek sok waxa kisa, wa maxa kʼana oja kʼul jastal ja yʼen. “Lek sok toj ja Jiʼoba”, xchi ja Bibliʼa (Salmo 25:8, NM). Bʼa oj kamigoʼuktik ja Diʼosi, oj kʼul jbʼajtik lek sok toj. Ja Bibliʼa wax yala: “Komo yuntikilotik xa ja Diʼosi —jel ni yaj wax yabʼyotika— [...] kʼultik puersa oj tsajlatik ja smodo ja yeʼn” (Efesios 5:1, 2). Ja itiʼ jujuntik smodoʼil jastal oj nochtik ja Jiʼoba:

Koltan ja kristiʼano jumasaʼ. “Laxa jkʼultikyiʼ lek spetsanil ja kristiʼano.” (Gálatas 6:10.)

Tʼilan oja kʼula bʼaj lekil atiʼjum. “Ja maʼ wax elkʼani ajyiʼ, aʼxa yakta kan ja yelkʼali. Asleʼe jun atel bʼa oj bʼobʼ smakʼla sbʼaj.” (Efesios 4:28.)

Jawa kuʼerpoʼi soka wa modo wala bʼej yiʼiʼ aʼ ajyuk sak. “Jayuj sbʼej xa ni oj kʼultik lek puʼersa bʼa toj oj ajyukotik porke ta mikʼa [...] wantik sleʼejel yajkʼachil ja jmultiki. Laxa kaktatik kan juntiro ja jpiʼero modotik ajyiʼ. Sbʼej ni oj xiʼukotik yuj ja Diʼosi.” (2 Corintios 7:1.)

 Tʼilan oja kiseʼ sok oja yajta jawa pamiliʼa jumasaʼ. “Winikex, ja jastal yaj waxa wabʼyex ja wa kuʼerpoʼex ja weʼnlex mismo, sbʼej ni jachʼ yaj oja wabʼyex ja wa cheʼumexi. Jaxa weʼnlex ixukex, sbʼej ke oja kʼuʼukex yabʼal ja wa tatamexi. [...] [Untik jumasaʼ, NM] ja tiʼ to ayex ja bʼa yibʼ skʼabʼ ja wa nan atatexi, kʼuʼanik.” (Efesios 5:33-6:1.)

Yajta ja kristiʼano jumasaʼ. “Sbʼej ke yaj oj kabʼ jbʼajtik porke ta ay kʼa syajal ja jkʼujoltiki, ja jawi, yuj ni akʼubʼal xa kitik yuj ja Diʼosa.” (1 Juan 4:7.)

Kʼuʼan ja ley jumasaʼ ja bʼa wa lujmali. “Kada kreyente, sbʼej ni oj kʼuʼaxuk ja maʼ ay yatel [mandar] [...]. Aʼawik yiʼ ja bʼa tʼilan ni oja waʼex yiʼ. Sbʼej ni oja tupex ja kontribusiʼoni, jayuj aʼawik niʼa. Chikan jas pago wax kʼanji awilex, tupuwik.” (Romanos 13:1, 7.)