Ayijbʼuk ja kʼankʼunela wiʼoj bʼa yajelkani

«Jun jasunuk mas tʼilan wa xkoltajiye ja matik wa xyawekan bʼa yabʼjel mayi, jani wa xyawe yijbʼuk ja kʼankʼunel yiʼoje bʼa yajelkani» (Stop Smoking Now! [¡Deje de fumar ahora!]).

BA PILAN yaljel, ta waxa kʼana oja wakan ja mayi, tʼilani oj wa yijbʼuk ja kʼankʼunela wiʼoj bʼa yajelkani. ¿Sok jastal oj wa yijbʼuk ja kʼankʼunela wiʼoj bʼa yajelkani? Bʼajtan, pensaraʼan ja slekilalik oj yijan bʼa yajelkan ja mayi.

Masni mi oja chʼak takʼin. Yabʼjel jun yal kaja may kada kʼakʼu ojni chʼak jitsan takʼin ja jabʼili. «Mini xkaʼa jbʼaj kuenta ja janekʼto takʼin jchʼakunej yuja mayi» (Gyanu, bʼa Nepal).

Masni oja wabʼ stsamalil jawa sakʼanili. «Wani xbʼobʼ kal kʼe tojbʼuk ja jsakʼanili yajni kakan ja yabʼjel mayi, sok wanxtani tojbʼel» (Regina, bʼa Sudáfrica). Yajni june wa xyakan ja mayi, ja gustoʼil sok ja bʼa yijel ikʼi wani xtojbʼi mas bʼa yeʼna, wa x-ajyi mas yip sok wa xtukbʼi ja sniʼ sati.

Slekilalik ja bʼa wa sakʼanil. «Yajelkan yabʼjel may wani xyijan slekilalik ja bʼa sakʼanil ja ixuk winik bʼa chikan jas sjabʼile» (Centros para el Control y la Prevención de Enfermedades, de Estados Unidos).

Maxani oja jipakʼujol bʼa weʼna. «Kakan yabʼjel may yujni mi xkʼana ayaʼon mandar, keʼni wa xkʼana oj kaʼ jbʼaj mandar» (Henning, bʼa Dinamarca).

Jawa pamilya sok jawa wamigoʼik ojni yawe el slekilal. «Yabʼjel may [...] wani sjomo ja sakʼanil ja matik mas kʼubʼan ayasoki. [...] Ja estudioʼik sjeʼunej ke ja stabʼil ja mayi yaʼunej chamuk jitsan kristyanoʼik yuja cánser bʼa pulmón sok ja chamelik bʼa kʼujolal» (Sociedad Americana contra el Cáncer).

Oj wa gustoʼaxuk ja Kʼulumani. «Kala kamigo jumasaʼ, [...] la katik eluk yibʼanal ja jas wa xya kuxbʼuk ja kuerpoʼal» (2 Corintios 7:1). «Oja waʼex jawa kuerpoʼex [...] bʼa sak ay sok bʼa lek xyila ja Dyosi» (Romanos 12:1).

«Yajni jnebʼa ke ja Dyos mi lek xyila ja jastik wa sjomo ja kuerpoʼali, kala oj kakan ja mayi» (Sylvia, bʼa España).

Pe bʼa jitsan ekʼele mini malanta yajel ajyuk jun kʼankʼunel bʼa yajelkani. Wani xmakuni ja skoltanel ja tuk, jastal ja jpamilyatik sok ja kamigotik. ¿Jasa oj skʼuluke ja yeʼnle?