Jun amigo mi meranuk

Ja weʼn ay juna «wamigo» wa naʼa sbʼaj yajni keremato. Mini kechanta wa skoltaya bʼa oj takʼanbʼanan, cha wani skoltaya bʼa oj kʼajyan soka tuk smojiki. Tolabida waxa leʼa akoltajel bʼa yeʼna bʼa yajel lamxuk ja estrés sok jelni tʼilan kʼot bʼa weʼna bʼa jitsan ekʼele.

Pe ekʼ ja tyempo kʼota naʼ jelni xiwela sbʼaj. Ja yeʼn wani skʼana oj ajyan ekʼ sok chikan bʼaʼa ama wani xyakan mi lek oj iljan sok mi oj kisjan ja bʼa wala ajyi ekʼi. Bʼobʼta ja smojtajeli skoltuneja bʼa takʼanbʼel, pe xiwelani sbʼaj yaʼunej ajyuk jawa sakʼanili. Sok mini kechanuk, cha xchʼakunejni lek jawa takʼini.

Ja weʼn wa leʼunejxani modo yajelkan yamigoʼajel, pe ja yeʼn mini xyaʼawakani. Bʼa tuk yaljel, kʼotelxa wa wajwal. Ja wego waxa wala mokxtabʼi jnaʼa sbʼaja.

JANI jaw ja jas wa x-ekʼ sbʼaje jitsan soka yabʼjel mayi. Jachni ekʼ sbʼaj ja Earline, jun ixuk bʼa ayxa 50 jabʼil wan yabʼjel may. Ja yeʼn wa xjul skʼujol: «Ajyelkuj jun may ja bʼa jkʼabʼi mastoni lek wa xkabʼ ke ajyel sok jun kristyano. Wani xkila jastal jun poko kamigo, sok ay ekʼele kechantani yeʼn tey jmoka». Pe ekʼ ja tyempo yaʼa sbʼaj kuenta ke ja mayi mini jun meran amigoʼuk sok jel malo. Ja bʼa skʼeʼulabʼil ja artikulo it wa xcholo ja jas ekʼ sbʼaj ja Earline, elni libre bʼa jun jasunuk: yajni snebʼa ke ja yabʼjel may mi lekuk ja bʼa stiʼ sat ja Dyos yuja wa sjomo ja kuerpoʼal yaʼunej ja yeʼni, yaʼakan yabʼjel may (2 Corintios 7:1).

Jun winik sbʼiʼil Frank jachni junxta skʼulan bʼa yajel gustoʼaxuk ja Dyosi. Pe jujuntik kʼakʼu bʼajtanto oj yakan ja yabʼjel mayi, och sleʼ ja bʼa snaj ja sobraʼik ja may mokʼel ja bʼa skolik ja spisoʼil ja snaji. Yala: «Jani ekʼele jaw ja ay jas stsaʼa skʼulajeli. Ja wanon sjokʼjel luʼum ja tiw bʼa slejel sobraʼik may bʼa jitsanxa tyempo teya, jelni tuk ya kabʼe. Nunka xa kabʼan may».

¿Jas yuj jelni wokol yajelkan ja mayi? Ja paklanumiki staʼuneje ja rasonik it: 1). Ja jastik yiʼoj ja mayi jelni ja yip jastal ja droga. 2) Ja stabʼili kechan wa x-ekʼ juke segundo ja ti wa xkʼot ja bʼa jchijnakʼtiki. 3) Ja mayi juni parte jel tʼilan ja bʼa sakʼanil ja kristyano pes yujni tʼusan mi ti chʼikanuk bʼa yibʼanal ja jastiki: bʼa waʼel, yujel, loʼil, yajel lamxuk ja estrés sok bʼa tuk jastik.

Pe ama jachuk, jastalni kilatik ja sjejel bʼa Earline sok Frank, wani xbʼobʼ katikan ja yabʼjel mayi. Ta waxa kʼana oja wakan yabʼjel may, skʼumajel ja artikuloʼik ti jakumi ojni skoltaya bʼa oj kʼe awiʼ juna yajkʼachil sakʼanil.