Ojni bʼobʼa wakan ja mayi

KʼOT ja styempoʼil bʼa ‹mok xiwan sok aʼtijanan› (1 Crónicas 28:10). ¿Jas mas wa xbʼobʼa kʼuluk bʼa oja wakan ja mayi?

Tsaʼa jun yajtabʼ. Ja Departamento bʼa matik wa skʼelawe ja chamel sok tuk jastik sbʼaja kristyanoʼik ja bʼa Estados Unidos, wa xyala ke yajni oja tsaʼ yajelkan yabʼjel may, tʼilani oja tsaʼ jun yajtabʼ ja bʼa yojol ja chabʼ semanaʼik nochani. Jachuk, ja kʼankʼunel bʼa oja wakani mini oj yopijuk. Aʼochuk ja kʼakʼu jaw ja bʼa wa kalendario, alayabʼ jawa wamigoʼik sok moka wakan skʼulajel ama chʼikan jas x-ekʼi.

A och juʼun. Tsʼijbʼan ja jastik ti nochani sok ja jastik waxa pensaraʼan ja weʼn oj skoltaya.

● Ja rasonik wiʼoj bʼa oja wakan yabʼjel may

● Ja snumero bʼa stelepono ja kristyanoʼik bʼa oja leʼ akoltajel yajni waxa kʼana oj cha wabʼ may

● Pensarik oj skoltaya bʼa oja taʼ jawa kʼelsatik, (bʼobʼta tekstoʼik bʼa Biblia jastal ja bʼa Gálatas 5:22, 23)

Iʼaj ekʼ tolabida ja yala juʼuni sok kʼuman jitsan ekʼele ja kʼakʼu. Ama waʼatakan yabʼjel may, kʼuman ja yala juʼun kada ekʼele waxa kʼana oja wabʼ.

Ayxani jas oj bʼobʼa kʼuluk bʼajtanxa lek. Bʼajtanto oj kʼotuk ja yajtabʼ wa tsaʼa, tukbʼes ja jas waxa kʼulan bʼa wa x-yiʼaja och yabʼjel may. Jun sjejel, ta kʼajyel waxa wabʼ may kechan ja wala kʼeʼi, majlay aʼekʼ jun ora bʼajtanto oj yiʼaj och bʼa oja wabʼ. Ta yajni wana waʼel sok wala chʼak waxa wabʼan may, mokxa kʼuluk. Mok wajan ja bʼa lugarik wa x-abʼxi mayi. Yajni wa tuchʼili ala tsats lek ja yaljel it «Miyuk tsʼakatal. Mixa xkabʼan may». Bʼa mini kechanta oja chapabʼaj ja bʼa kʼakʼu wa tsaʼunejxa oja wakan yabʼjel mayi, skʼulajel ja it cha ojni ya julukakʼujol ke mojanxa oj kʼotan june maʼ mixa xyabʼan may.

Tuk jastik jel tʼilan. Yajni wan mojxel ja skʼakʼujili, mana jastik bʼa oja wabʼe: zanahoriaʼik, chicleʼik, sat tekʼulik sok tuk jastik. Ajulyi skʼujol jawa wamigoʼik sok jawa pamilyaʼik ja yajtabʼ wa tsaʼaʼi sok ja jas oj skʼuluke bʼa oj skoltaya. Bʼajtanto oj kʼotuk ja skʼakʼujili, chʼaya snajel ja mayik tey bʼa wa naji, ja bʼa wa karro, ja bʼa sbolsaʼil jawa kʼuʼi, ja bʼa wala aʼtiji, cha jachuk ja bʼa waxa nolo, ja bʼa jas waxa tsanasoki sok bʼa chikan jasunuk wa xya kʼan bʼa oja wabʼe. Ja smeranili masni wokol elel bʼa smanjel jun yal kaja may ma skʼanjelyi juna wamigo ke yuja tita oj wa eluk ja bʼa wa noluneji. Chomajkil, moka wakan skʼanjelyi ja Dyos a-skoltaya, pe mas ja yajni jaxta tsaʼan may oja wabʼi (Lucas 11:13).

Jitsan Kristyano yawetakan yamigoʼajel bʼa june maʼ wa skʼuʼane ke yamigoʼe, pe mini jun meran amigoʼuk sok jelni malo: jani ja mayi. Ja weʼn cha ojni bʼobʼa wakan yabʼjel may sok weʼni oj bʼobʼa kʼulabʼaj mandar. Ojxani ajyuk juna lekila sakʼanil.

[Dibujo]

Iʼaj ekʼ tolabida ja yala juʼuni sok kʼuman jitsan ekʼele ja kʼakʼu