Cholokabʼtikon sbʼaja wa chʼinili.

Pojkiyon bʼa Italia bʼa 1943. Ja keʼn soka kermanoʼik ti kʼitikon bʼa jun yal lugar. Ja jtati juni aʼtijum bʼa alaj sok karpintero. Ja jnantati tini yawe kʼikotikon bʼa relijyon católica.

¿Jas yuj wa kʼana ochel sacerdote?

Man jchʼinil jel gusto wajel bʼa misa bʼa smaklajel ja yajni wa xkʼumani ja sacerdote. Jel tsamal xkabʼ ja skʼumale sok jel spayawon ja jastik wa skʼulaneʼi. Yuja jaw jkʼana ochel sacerdote. Yajni ayxa kiʼoj 13 jabʼil, ja jnani yiʼajon bʼa jun naʼits wa xchapji yal untik bʼa oj yiʼe jun estudio mas chapan wa xyaʼa ja sacerdote.

¿Wa kʼulan maʼ estudiar ja Biblia yajni wana chapjeli?

Mini jeluk. Yajni ayxa kiʼoj 15 jabʼil, june ja bʼa jmaestro yaki jun libro yiʼoj ja Evangelioʼik, wa xkʼan alxuk, loʼilik wa xcholo ja sakʼanil ja Jesús sok jitsan ekʼele jkʼuman. Yajni ayxa kiʼoj 18 jabʼil, wajyon man Roma bʼa ochel ja bʼa universidad católica, bʼa tey bʼa skʼabʼ ja papa. Ja tiw jkʼulan estudiar latín, griego, historia, filosofía, psicología sok teología. Ja bʼa misa, ama wa xtaʼatikon tiʼal bersikuloʼik sok wa xmaklaytikon skʼumajelik bʼa Biblia ja bʼa domingo, ja smeranili mini xkʼulantikon estudiar.

Yajni aji ochan jastal olomal ja bʼa eskuela, ¿wan maʼ xcha jeʼayi ja tuki?

Ja jas mero wa xkʼulani jani ja yaʼtel bʼa jun olomal, pe cha jeʼaniyi ja tuk sbʼaja leyik ja bʼa Concilio Vaticano II.

¿Jas yuj kʼe ajyuka duda sbʼaja wa relijyon?

Yuj oxe modo: wa xkila ke ja bʼa relijyon wa xchʼika sbʼaje bʼa politika, lekni wa xyilawe ja smodo’e mi lekuk ja sacerdoteʼik, ja kʼoleʼik spilunej sbʼaje ja b’a relijyon católica sok bʼa jujuntik skʼu’ajel yiʼoje mi meranuk. Jun sjejel, ¿jastal modo jun Dyos bʼa ay syajal skʼujol oj yayi kastigo jun kristyano yajni wa xchami? ¿Meran maʼ lek tʼilan wa skʼana oj katik makunuk rosario bʼa yaljel jitsan ekʼele ja junxta yaljelik ja bʼa orasyoni? *

¿Jasa wa tsaʼa skʼulajel?

Wanoni okʼel jpatayi skʼujol ja Dyos bʼa a-skoltayon; jmana jun Biblia de Jerusalén bʼa ajkʼachto akʼubʼal eluk bʼa italiano sok kʼe jkʼumuk. Jun saʼan sakbʼel domingo, yajni wanon yajel lokan ja jpal kʼuʼi tsaʼan ja chʼakyon ja misa, kʼotye chabʼ winike ja bʼa eskuela. Yalawekabʼ ke testigoʼe bʼa Jyoba sok kʼe loʼilanukotikon. Mas ja jun ora loʼilanitikon sbʼaja Biblia sok ja bʼa jas wa sjeʼa ja relijyon smeranili.

¿Jasa jel spayawa ja bʼa Testigoʼiki?

Jani jel spayawon ja jastal skʼuʼuneje lek sok ja jastal pasilxta wa xyalawe jun teksto ja bʼa Biblia católica. Mas tsaʼan, jun Testigo sbʼiʼil Mario kʼe yulatayon. Jelni spasensya, sok kada sábado bʼa las 9 bʼa saʼan sakbʼel, ama wan jaʼ ma ay chawuk wa xjak kʼumanuk ja bʼa puerta wa x-ajyi eskuela.

¿Sok jas wa spensarane ja tuk sacerdote ja bʼa ulatanelik jaw?

Jlokowe oj smojtayotikone, pe mini june skʼanawe skʼulajel estudiar ja Biblia. Ama jachuk ja keʼn jelni xkana. Wanoni snebʼjel jastik jel tsamal. Jun sjejel, kʼot jnaʼ jas yuja Dyos wanto yajelkan ja bʼa mi lekuk sok ja wokoli, bʼa jelni xya wokolanukon yabʼjel stojol ajyi.

¿Yal maʼ wabʼ oja wakan skʼulajel estudiar ja Biblia ja matik ay chaʼan xcholi?

Ja bʼa 1975 jitsan ekʼele wajyon man Roma bʼa yaljel ja jas wanon snebʼjeli. Ja matik ay chaʼan xchol sleʼawe modo yajel jkʼuʼuk ke mini stojol ayukon, pe mini june yawe makunuk ja Biblia. Tsaʼan, ja bʼa 9 bʼa enero bʼa 1976, jtsʼijbʼan jun karta bʼa oj kakan ja jrelijyon sok cha jeka bʼa Roma; ekʼ chabʼ kʼakʼu kaʼakan jastal olomal ja bʼa eskuela sok ochyon sbʼajtanil ekʼele ja reunión soka testigoʼik bʼa Jyoba. Wajni jun asamblea bʼa staʼa sbʼaj jitsan kongregasyon. ¡Tukni lek! Kada jujune ayiʼoje jun Biblia sok wa sleʼawe ja tekstoʼik wa xyala ja maʼ wan yajel ekʼuk ja loʼili.

¿Jastal yila jawa pamilya ja jasa kʼulani?

Tʼusan mi yibʼanaluke jel tajkiye. Pe kabʼ june ja bʼa kermanoʼik cha wani skʼulajel estudiar ja Biblia soka Testigoʼik bʼa Lombardía, jun lugar ja bʼa norte bʼa Italia. Waj kulatay, jaxa Testigoʼik ja tiw skoltayone bʼa oj taʼ jun kaʼtel sok jun lugar bʼa oj ajyukon. Ja bʼa mismo jabʼil jaw ochyon testigo bʼa Jyoba.

¿Ay maʼ jas waxa naʼa malaya?

¿Snajel malaya? ¡Mini tʼusan! Ja wego wanxa xkabʼ mojanxa ayon soka Dyosi, pes jnebʼata machunkiluk ja yeʼn jastalni wa sjeʼa ja Biblia, bʼa mini tiʼuk bʼa sbiboʼil ja kristyano sok ja bʼa skʼuʼajelik yiʼoje ja católico. Ja wego wanxani xbʼobʼ loʼilanukon soka kristyano snajel ke ja jas wa xkala jani ja smeranili.