JA JAS WA XYALA JA BIBLIA
Ja tajnelik bʼa suerteʼal
Jujuntik kristyano wa spensarane ja tajnelik bʼa suerteʼal kechantani jun jasunuk lek bʼa yajel ekʼ gustoʼil, jaxa tuk wani spensarane jun jasunuk jel xiwela sbʼaj.
¿Ay maʼ smaloʼil tajnel sok takʼin?
JA JAS WA XYALA JA KRISTYANO.
Jitsan kristyano wa skʼuʼane ja tajnelik bʼa suerteʼal mini maloʼuk ta tolabida wa xkʼulaxi jastalni wa xyala ja leyi. Ja tajnelik sok loteriaʼik bʼa yaʼonej permiso ja gobyerno wani xkoltani sok takʼin bʼa wa xyawe el slekilal ja kristyanoʼiki.
JA JAS WA XYALA JA BIBLIA.
Ja Biblia mini xyala jaman lek ja tajnelik bʼa suerteʼal. Pe wani xyakitik rasonik bʼa wa skoltayotik yabʼjel stojol jastal wa xyila ja Dyosi.
Wani skʼulane ja tajnel it bʼa yijelkan ja stakʼine ja tuki, sok ja it mini tʼun slaja sbʼaj soka jas yala ja Jesús: «Talnabʼajik bʼa chikan jas tikʼe okʼel kʼujolal» (Lucas 12:15). Ja smeranili, ja kristyanoʼik wani xtajniye yuja wa x-okʼ skʼujoleʼi. Ama jelni wokol oja kʼul ganar, pe ja swinkil ja negosyoʼik mini jach wa xyalawe, jani wa xyalawe sbʼaja janekʼto takʼin oja kʼul ganari. Ja kristyano bʼa wa skʼana oj pax riko wani xyaʼa jitsan takʼin ja bʼa kasinoʼik bʼa tajneli. Jaʼuktoma oj skoltay ja kristyanoʼik bʼa mok ajyukyujile ja okʼel kʼujolal, ja tajneli wani xya ajyuk ja kʼankʼunel bʼa stajel ja takʼin jach mi wokoluk.
Wani xkʼulaxi ja tajneli bʼa slejel slekilal june, pes wani xkʼulaxi ganar takʼin bʼa cha wa xchʼay ja tuk tajnumiki. Pe ja Biblia wa slokowotik «jani la jletik ja slekilal ja tuki sok mi jaʼuk ja jbʼajtiki» (1 Corintios 10:24). June ja bʼa lajune mandariki jaʼa: «Mok oka kʼujol [...] mini jun jasunuk bʼa yeʼn sbʼaj jawa moji» (Éxodo 20:17). Yajni jun tajnum wa skʼana oj skʼul ganar, wani smajlay oj chʼayuk ja tuk bʼa yeʼn oj chʼak yikan ja stakʼini.
Ja Biblia wa xya juljkʼujoltik mok la kiltik ja tajnelik bʼa suerteʼal jastal jun ipal nakʼan ay bʼa oj bʼobʼ yaʼ paxkotik rikoʼil. Ja bʼa poko Israel, ajyi jujuntik bʼa mi ajyiyujile skʼuʼajel bʼa Dyos sok kʼe yaweyi stoyjel «ja sdyosil ja Lekil Swerte». ¿Sok jastal yila ja Dyosi? Ja yeʼn yala: «Mini wawexkan skʼulajel ja jas mi lekuk ja bʼa stiʼ jsat, sok jaʼ atsaʼawex ja jas mi lek xkila» (Isaías 65:11, 12).
Ama bʼa jujuntik país ja takʼin wa xyaʼawe bʼa tajneli wani xmakuni bʼa jujuntik jastik, jastal ja bʼa chapjelalik. Pe mini xtukbʼi ja bʼa wa x-el ja takʼinik jaw: tini wa x-el bʼa skʼulajelik bʼa wa xya ajyuk ja okʼel kʼujolal, ja slejel slekilal june sok ja pensar bʼa stajel jun jasunuk jach mi oj aʼtijuk.
«Mok oka kʼujol [...] mini jun jasunuk bʼa yeʼn sbʼaj jawa moji» (Éxodo 20:17).
¿Jastal wa x-jomji ja kristyanoʼik yuja tajneli?
JA JAS WA XYALA JA BIBLIA.
Ja Biblia wa xya juljkʼujoltik ke «ja matik tarega wa skʼanawe oj paxuke riko mini xkuchyujile ja prebaʼiki sok wa xkoye bʼa trampaʼik sok bʼa jitsan kʼankʼunelik bʼa mi jas xmakuni sok bʼa wa xyajbʼesni, soka it wa x-ijiye bʼa jomelal sok chʼayelal» (1 Timoteo 6:9). Ja okʼel kʼujolal jani yechalil ja b’a tajnelik b’a suerteʼal. Jelni xiwela sbʼaj bʼa tey ja b’a lista b’a Yabʼal ja Dyos bʼa mini tʼun xbʼobʼ jkʼuluktik (Efesios 5:3).
Yuja tajnel wani xyawi takʼin jach mi wokoluk, wani xya ajyuk ja skʼanjel b’a «syajtajel ja takʼini». Ja Biblia wa xyala ke ja yajtanel jaw «jani yechalil bʼa tuktukil jastik malo». Ja kʼankʼunel b’a stajel mas ja takʼini jaxani wa xtoji yuja sakʼanil june. Ojni bʼobʼ ajyukyuj jitsan chamkʼujol sok oj sjom ja skʼu’ajel yi’oj b’a Dyos. Ja Biblia wa xyala ke ja matik koʼelexa ja b’a trampa b’a okʼel kʼujolal «jelxa syajbʼesta sbʼaje» (1 Timoteo 6:10).
Ja okʼel kʼujolal mini xya ajyuk ja gusto’ili, sok ja kristyanoʼiki mini xmalxiye soka jastik yiʼoje’i. Ja Eclesiastés 5:10 wa xyala: «June ma’ wa syajtay ja plata mini tʼun oj malxuk soka plata, sok mini june maʼ wa syajtay ja rikesa oj malxuk soka janekʼ wa skʼulan ganari».
Miyonik kristyano b’a ijiyeta och soka tajneli mixani xbʼobʼ eluke. Ja’ita ja b’a Estados Unidos ayni miyonik kristyano b’a mixani xyawekan ja tajneli.
Ja Proverbios 20:21 wa sjeʼa ke ja kristyanoʼik jel x-okʼ skʼujole ojni bʼobʼ paxuke riko’il, pe mini oj ajuk koʼuk slekilale yuja Dyosi. Chomajkil, ja matik mixa xyawekan ja tajneli ojni bʼobʼ k’e sjele, oj chʼayujile ja yamigo’e, ja yaʼtele sok ja spamilya’e. Snochjel ja rasonik b’a Biblia wani skoltayotik ja b’a wokolik wa xyiʼajan ja tajneli.
«Ja matik tarega wa skʼanawe oj paxuke riko mini xkuchyujile ja prebaʼiki sok wa xkoye bʼa trampaʼik sok bʼa jitsan kʼankʼunelik bʼa mi jas xmakuni sok bʼa wa xyajbʼesni, soka it wa x-ijiye bʼa jomelal sok chʼayelal» (1 Timoteo 6:9).
