¿Jas yuj wa xkʼanatik ja sGobyerno ja Dyos?
Man skʼeʼulabʼil ja kristyano, ja jKʼulumantik, bʼa sbʼiʼil Jyoba, kechanta yeʼn mandaranum ajyi sok yajxta yaʼa mandar. Ja yuj, skʼulan jun tsamal lugar ja bʼa Edén bʼa oj ajyuk sakʼan ja kristyano, sok ajyi jitsan waʼelal ja tiw. Cha yayi jun yaʼtel bʼa jel xyaʼa gustoʼil (Génesis 1:28, 29; 2:8, 15). Lekukxta ja kristyano wa xyaʼa sbʼaj oj ajuk mandar yuja Dyosi, ojni yabʼye stsamalil ajyel laman.
Ja bʼajtan kristyano mi skʼanawe oj ajuke mandar yuja Dyos.
Ja Biblia wa xyala jun anjel kʼoka abʼal, sbʼiʼil Satanás sok Dyablo, yabʼaltay ja derecho yiʼoj ja Dyos bʼa yajel mandar. Yala masni lek oj wajyuj ja kristyano ta mi jaʼ tojubʼaluk yuja Dyosi. Triste yabʼjel, pe ja bʼajtan kristyano, ja Adán soka Eva, jani skʼuʼane ja abʼal yala ja Satanás sok skʼokowe ja smandar ja Dyos (Génesis 3:1-6; Apocalipsis 12:9).
Yuja yaʼawekan ja Jyoba sok mi skisawe jastal smandaranume, ja Adán soka Eva xchʼayawe ja tsamal Kʼachinubʼi sok ja ajyel sakʼan tolabida bʼa mi oj koʼuke chamel (Génesis 3:17-19). Ja jasa skʼulaneʼi yawe ekʼyi ja yuntikile ja yajni ajyi. Ja Biblia wa xyala: «Smul ni jun huinic sbiil Adán, [...] Jayuj cajcajil huala chamtic» (Romanos 5:12). Ja mulali ayiʼojan pilan wokol: «Ja winiki ibʼ kʼabʼal ayuj ja winiki bʼa sjomelal» (Eclesiastés 8:9). Bʼa pilan yaljelik, yajni ja kristyano yeʼnta wa xyaʼa sbʼaj mandar, ayni wokol bʼa tuktukil lugar.
JA WINIKI KʼE YA MANDAR
Ja Nemrod skontraʼan ja Dyos.
Ja bʼajtan mandaranum wa staʼa tiʼal ja Biblia jaʼa Nemrod, sok ja yeʼn skontraʼan ja smandaranel ja Dyos. Man tyempo jaw, jitsan mandaranumik wa xjelxiye soka xchol yiʼoje. Ja yuj, ayxa junuk oxe mil jabʼil, ja mandaranum Salomón stsʼijbʼan: «Kila ja yalel sate ja matik wa xtʼenjiye, sok mini ajyi june bʼa oj ajuk kulan skʼujole. Ja matik wa xtʼenjiye yuji yeʼn yiʼoje ja ipali» (Eclesiastés 4:1).
Mini tukbʼeluk ja bʼa jtyempotiki. Jun imporme bʼa 2009 ja bʼa Naciones Unidas yala ayxa mas kristyano bʼa wa spensaraʼane ja mal gobyernoʼik jani «june ja bʼa yechalil sbʼaja jastik mi lekuk wan ekʼel ja bʼa luʼumkʼinali».
TYEMPOXA BʼA STOJBʼESEL
Ja luʼumkʼinali wa skʼana lekil mandaranumik sok bʼa tsamal ayaʼe ja smandare. Sok jani it ja jas skʼapunej ja jKʼulumantiki.
Mini soka lekil gobyernoʼiki bʼobʼel stojbʼese ja tsatsal wokolik yiʼoj ja kristyano.
Ja Dyos xchapunej jun sGobyerno, wa xkʼan kaltik, jun mandaranum bʼa jaʼ oj ya slokʼoluk spetsanil ja mandaranumik bʼa luʼumi «sok kechanta ni yeʼn oj kan kulan bʼa tolabida» (Daniel 2:44). Jani Gobyerno it wane skʼanjel miyonik kristyano ja bʼa orasyon bʼa jTatik Dyos (Mateo 6:9, 10). Pe ja Dyos mi yeʼn oj kʼot Mandaranum ja bʼa Gobyerno it, ayni maʼ stʼojunej bʼa ajyi sakʼan jastal kristyano. ¿Machunkiluk?
Bʼobʼta cha ojni akʼul gusto
SJOBʼJELIK SBʼAJA BIBLIA
¿Ti maʼ ay bʼa jkʼujoltik ja sGobyerno ja Dyos?
Jujuntik sutjel yiʼoj ja bʼa Biblia wa xyala: «Ja sGobyerno ja Dyos tey bʼa wa wojolex». ¿Jas wa xkʼan yal ja yaljelik it?
