Ja bʼa artikulo ekʼta, jpaklaytik ja senyaʼik yala ja Jesús. Ja senyaʼik jaw juni preba bʼa wa sjeʼa ja sGobyerno ja Dyos kujlajita ja bʼa satkʼinal sok yeʼn Mandaranum ja Jesukristo.

Ja Biblia wa xyala ja jas bʼajtan skʼulan ja Jesús ja yajni kʼe ya mandari jani snutsjel ja Satanás soka spukujik ja bʼa satkʼinali. Ja wego, ja yeʼnle kechanta wa xbʼobʼ skʼuluke ja bʼa Luʼum ja jas wa skʼanawe, sok ja it jani june ja bʼa rasonik yuja jelxa ipaxitaʼel ja wokolik masan 1914 (Apocalipsis 12:7, 9).

Ama ja luʼumkʼinali wanxta jomel, ja Jesús, ja Mandaranum bʼa sGobyerno ja Dyos, skʼulunej jitsan jastik lek sbʼaja kristyano. Stsʼakatal yuja wan jexel bʼa Biblia bʼa spetsanil ja luʼum bʼa yalakan ja Jesús, skoltunej jitsan miyonik kristyano bʼa wane snebʼjel ja rasonik bʼa Biblia sok wane yajel makunuk ja bʼa sakʼanile (Isaías 2:2-4). Ja kristyanoʼik it snebʼuneje bʼa mi jaʼ oj yawe mas stʼilanil ja bʼa sakʼanile ja aʼteli, bʼa oj tojbʼuk ja sakʼanile bʼa pamilya sok bʼa yabʼjel stsamalil ja jastik junuk jach mi oj ajyuke yuj mosoʼil. Koltubʼale yuja Biblia bʼa oj tojbʼuk ja sakʼanile sok wane chapjel bʼa oj kʼotuke ja tikʼe kristyano wa skʼana ja Dyos oj ajyuke ja bʼa sGobyerno.

Ama ja Jesús wanxa yajel mandar ja bʼa satkʼinal, ja kristyano waneto yajel mandar ja bʼa Luʼumi. Pe ja Dyos yalayabʼ ja Jesús: «Kaxa aʼa mandar bʼa snalan jawa kontraʼiki» (Salmo 110:2). Ja Jesús ojxta xchʼaysnajel spetsanil ja skontraʼik. Sok oj xchʼay snajel ja swokole ja matik wa skʼanawe skʼuʼajel ja Dyos.

Ja bʼa tyempo jaw, ja sGobyerno ja Dyos oj skʼuluk ja it:

• Oj xchʼaysnajel ja relijyonik mi meranuki. Ja Biblia wa xya slaj ja relijyonik mi meranuk sok jun ixuk wa xchono ja skwerpo bʼa ojxta chʼayjuk snajel. Ja yuj, ja relijyonik bʼa sjeʼuneje abʼalik sbʼaja Dyos sok yaʼunej wokolanuk ja sakʼanil ja kristyano, mixa oj ajyuk. Ja xchʼakelale, jitsan junta chʼaykʼujol oj yamjuke (Apocalipsis 17:15, 16).

• Oj xchʼaysnajel ja gobyernoʼik bʼa winiki. Ja sGobyerno ja Dyosi oj xchʼaysnajel spetsanil ja gobyernoʼik bʼa luʼumi (Apocalipsis 19:15, 17, 18).

• Oj xchʼaysnajel ja mal kristyano. ¿Jasa oj ekʼ sbʼaj ja matik mi xyaʼawekan ja malo sok mi skʼanawe ajyel kʼuʼabʼal soka Dyos? «Ojni kʼutsjuk el ja bʼa mero luʼumi ja maʼ jel malo» (Proverbios 2:22).

• Oj xchʼay ja Satanás soka spukujik. Ja Satanás soka spukujik mixa oj «slola otro vuelta» ja chonabʼiki (Apocalipsis 20:3, 10).

¿Jas oj ekʼ sbʼaj ja matik wa skʼana oj ajyuke ja bʼa smandaranel ja sGobyerno ja Dyos?

Man satkʼinal, ja Jesukristo masni oj skʼuluk jitsan jastik junuk yuja gobyernoʼik bʼa winiki. Chomajkil, oj koltajuk yuja 144,000 mandaranumik bʼa tsaʼubʼale ja bʼa kristyanoʼik (Apocalipsis 5:9, 10; 14:1, 3). Ojni ya kʼotuk ja jas wa skʼana ja Dyos ja bʼa Luʼumi. ¿Jasa oj skʼuluk ja sGobyerno ja Dyos sbʼaja kristyano?

• Oj xchʼaysnajel ja chamelik soka chamelal. «Mini jun swinkil oj yale: ‹Maloʼayon›» sok mixani «maʼ oj chamuca» (Isaías 33:24; Apocalipsis 21:4).

• Oj ya ajyuk meran lamanil sok oj ajyukotik seguro. «Ja slamanil ja wuntikili ojni jitsanbʼuk» sok «oj kulanuke ja bʼa yibʼel stsʼusubʼe sok ja bʼa yibʼel ja steʼil yigoʼe, sok mixa maʼ oj ajuk xiwukeyuj» (Isaías 54:13; Miqueas 4:4).

• Oj ya jun aʼtel bʼa jel xyaʼa gustoʼil. «Ja matik jtsaʼuneji jel oj yabʼye stsamalil ja satinel ja yaʼtele. Mini lom oj aʼtijuke» (Isaías 65:22, 23).

• Oj stojbʼes ja jastal jomel ay ja luʼumkʼinal. «Ja takin kʼinal soka takin luʼumi oj bʼutʼ-el gustoʼil, sok ja lajan kʼinal bʼa takini gusto oj ajyuk sok oj nichinuk jastal ja azafrán» (Isaías 35:1).

• Oj xchap ja kristyano ja jasa tʼilan oj skʼuluke bʼa oj ajyuke sakʼan tolabida. «Ja it wa stojolan sakʼanil bʼa tolabida, ja oj najukabʼaj ja weʼn, ja kechanta Dyos smeranili, sok ja maʼ ajekakon, ja Jesukristo» (Juan 17:3, TNM).

Ja Dyos wani skʼana oja wabʼ stsamalil ja lekilalik it (Isaías 48:18). Ja artikulo jakumi oja wil ja jas oj bʼobʼa kʼuluk ja wego bʼa oja wabʼ stsamalil ja jas jakumto.