• Tsaʼubʼal yuja Dyosi. «Keʼnani kaʼunej kujlajuk ja jmandaranum [...], sok oj kawi chonabʼik jastal adote sok man stikʼanil ja luʼumi jastal abʼaj» (Salmo 2:6, 8).

• Oj sbʼajuk ja skujlayubʼ ja mandaranum David. «Yujni pojkel jun yal alats bʼa keʼntik, akʼubʼalkitik jun uninal [...]. Ja sniwanil ja xcholi soka slamanili mini oj chʼakuk ja bʼa sgobyerno, ojni skʼul mandar bʼa skujlayubʼ ja David sok ja sgobyerno ojni yaʼkan lek tsʼunan» (Isaías 9:6, 7).

• Oj manxuk bʼa Belén. «Jaxa weʼn, ah Belén [...], sbʼaja weʼn tini oj eljan ja maʼ oj kʼot mandaranum [...] yujni ja sniwanil oj kʼot man xchikin ja luʼumi» (Miqueas 5:2, 4).

• Mi oj kisjuk sok oj miljuk. «Ijnaji sok kilatik jastal mey yaʼtel [...], yajbʼesji yuja jmultiki; yeʼn yiʼaj wokol yuja jmultiki» (Isaías 53:3, 5).

• Oj sakʼwuk sok oj toyjuk. «Mi oja waʼonkan ja bʼa kʼeʼeni. Mini oja wakan ja maʼ toji oj yil ja kʼeʼeni [...]; ayni gustoʼil ja bʼa stojol ja wa kʼabʼi bʼa tolabida» (Salmo 16:10, 11).

Ja maʼ kechanta wa xkʼot sbʼaj ja jas alxita jani ja Jesukristo. Jun anjel yalayabʼ ja María, snan ja Jesús: «Ja Dyos oj yayi ja strono ja stat David [...] sok mi oj chʼakuk ja sGobyerno» (Lucas 1:31-33, TNM).

Ja Jesús mini yaʼa mandar ja yajni ti ajyi bʼa Luʼumi. Pe ojni ya mandar ja kristyano, sok ti oj yakon man bʼa satkʼinal jastal Mandaranum ja bʼa sGobyerno ja Dyos. ¿Jas yuj yeʼn ja Mandaranum mas leki? La kiltik jasa skʼulan yajni ti ajyi bʼa Luʼumi.

•   Ja Jesús chamskʼujol ja kristyano. Skoltay winik sok ixuk, keremtik akʼixuk sok matik ayxa skʼujol. Mini jaʼ skʼela bʼatik sbʼaje sok bʼa kʼole jakele (Mateo 9:36; Marcos 10:16). Yajni jun maʼ wan kʼaʼel sbʼakʼtel yala: «Ta jach cʼa huaxa cʼana, oj ni hua tojbucona», ja Jesús snaʼa syajulal sok ya tojbʼuk (Marcos 1:40-42).

• Ja Jesús sjeʼa jastal lek ayil-otik ja Dyos. Ja yeʼn yala: «Jun huinic. Mi ni modo oj slee chab yajuala [...]. Jach ay ja Diosi soc ja taqʼuini. Mix bob ayajta ja xchabili». Cha yala tʼilan la kiltik lek ja tuk jastalni wa xkʼanatik lek aʼiljukotik ja keʼntik. Chomajkil, wa sjeʼakitik ja Dyos mi jaʼita wa xwaj skʼujol ja jas wa xkʼulantiki. Wani xcha waj skʼujol ja bʼa jas wa xpensarantik soka jastal wa xkabʼ aytik. Ja yuj, bʼa lek ayil-otik ja Dyos tʼilani la ka jkwidadotik soka jkʼujoltiki (Mateo 5:28; 6:24; 7:12). Ja Jesús xchiktes bʼa meran ajyel gusto, tʼilan oj jnatik ja jasa wa skʼanakitik ja Dyos sok skʼulajel (Lucas 11:28).

• Ja Jesús sjeʼakitik jas wa stojolan ja yajtanel. Ja jasa yala soka jasa skʼulani kʼot man skʼujol ja kristyano. Ja Biblia wa xyala: «Jel och ja spensar ja cristiano yuj ja jas huax yala. Lajan bi soc jun huinic ay lec yatel» (Mateo 7:28, 29). Jun sjejel, ja yeʼn yaʼa ja mandar it: «Yaj xa huab ja hua condraexi». Sok ja yeʼn yaniyi orasyon bʼa jujuntik ja matik milji yuji: «Tatey, cʼulan perdonar ja cristiano jumasa. Mi snaahue jasuncʼa huane scʼulajeli» (Mateo 5:44; Lucas 23:34).

Ja Jesús yeʼnani ja lekil mandaranum. Yujni chapan lek, wa syajtayotik sok wa skʼana oj skoltayotik. ¿Pe jas tyempo oj kʼe ya mandar?