Ja aluman Moisés yala ke ja Dyosi ojni ya koʼ jlekilaltik ta wa xkʼuʼantikyi ja smandariki (Deuteronomio 10:13; 11:27). Mini wa xkʼuʼantikyi ja Dyos yuj wala xiwtik bʼa oj skʼulukotik kastigar. Ja yeʼn ayiʼoj jun tsamal smodo sok ja yuj wa xyajtaytik. Sok yuja wa xyajtaytiki, wa xkʼuʼantikyi sok mini xkʼanatik ay jas oj jkʼuluktik bʼa oj ya tristeʼaxuk. «Ta yaj cʼa huax cabtic meran ja Diosi, oj ni jcʼuuctic meran ja smandari. Y mi huocoluc huax cabtic huax cʼuantic ja jas huax yala ja yeni» (1 Juan 5:3).

Pe ¿jastik slekilal wa x-ajyikujtik ta wa xkʼuʼantikyi ja Dyosi? La kiltik chabʼe.

«Keʼnon ja Jyoba wa Dyosi, ja Maʼ wa sjeʼawi bʼa wa lekilal weʼna, ja Maʼ wa sjeʼawi ja bʼej bʼa tʼilan oj bʼejyani» (ISAÍAS 48:17).

Ja Jyoba Dyos, ja jKʼulumantiki, wa snaʼa jbʼajtik sok wa xyakitik ja tojelal wa xmakunikujtiki. Ta wa xkʼanatik ke ja srasonik oj skoltayotik bʼa oj jnatik stsajel lek ja jas oj jkʼuluktiki, tʼilani oj jletik ja bʼa Yabʼal ja Dyos bʼa oj jnatik ja jas wa skʼana oj jkʼuluktiki sok yajel makunuk.

«Mas to jel lec huax yila ja maʼ huax yab ja yabal ja Diosi soc ja maʼ huas scʼuani» (LUCAS 11:28).

Ja bʼa jtyempotiki, jitsan miyon kristyano bʼa wa skʼuʼane ja Yabʼal ja Dyosi gustoni aye. La kiltik jun sjejel. Jun winik bʼa España bʼa jel wego wa xtajki ajyi mini lek wa xyila ajyi ja xcheʼumi sok mini ja tuk kristyano. Jun kʼakʼu skʼuman ja jas stsʼijbʼan ja aluman Moisés sbʼaja tsamal smodo ja José, ja yunin ja Jacob. Ja José chonji jastal moso sok ama mey smul chʼikji preso. Pe ama jachuk ajyini laman, ajyi manso sok sjeʼa yajalkʼujol (Génesis, kapituloʼik 37 man 45). Ja winik bʼa España yaʼa sbʼaj cuenta: «Spensarajel sbʼaja sjejel bʼa José snikawon bʼa oj jeʼ yajal kʼujolal, lekil kʼujolal sok skomjel jbʼaj. Sok ja slekilal wa xkila, wa xkabʼ stsamalil jun sakʼanil bʼa pamilya mas gusto».

Ja bʼa Yabʼal ja Dyos wa xtaʼatik mas rasonik sbʼa jastal oj kiltik ja tuki. La kiltik mas sbʼaja it ja bʼa artikulo jakumi.