Ja Dyosi yaʼunejkitik jun majtanal jel chaʼanyabʼalil: bʼa oj bʼobʼ jkʼumuktik ja yeʼni sok yaljelyabʼ jastal wa xkabʼ ayotik. Ja aluman David (Daud) yala yabʼ ja Dyosi: «Ah Maklanum bʼa orasyon, ojni jakuke amok chikan jas tikʼe ixuk winik» (Salmo 65:2). Pe ¿jastal tʼilan oj jkʼuluktik ja korasyontik bʼa oj smaklayotik ja Dyos sok oj ya koʼ jlekilaltik?

Ja Salmo 62:8 wa xyala: «Jamawik yi yibʼanal jawa kʼujolexi». Yajni wa xkatikyi orasyon ja Dyosi, wani xbʼobʼ kaltikyabʼ ja jastal wa xtax ja jkʼujoltiki. Ja Maʼ jel ja yipi jelni chaʼanyabʼal wa xyila ja orasyonik wa x-el ja bʼa kʼujolali.

Ja Dyosi tuktukil ja jastal wa xnaji sbʼaji, jastal Kʼuluman, jel snaʼa yajulal sok jelni lek, pe kechan june ja sbʼiʼili: «Keʼna Jyoba. Jani jaw ja jbʼiʼili» (Isaías 42:8). Ja sbʼiʼil ja Dyosi, Jyoba, wa xtax junuk 7,000 ekʼele ja bʼa Yabʼal ja Dyos. Jitsan alumanik yawe makunuk ja sbʼiʼli ja Dyos ja yajni mojxiyesoki. Ja aluman Abrahán yala: «Jyoba, [...] awa pabor, awonkan bʼa ojto kʼumanukon [amok]» (Génesis 18:30). Ja keʼntiki cha tʼilani oj katik makunuk ja sbʼiʼil ja Dyosi, ja Jyoba, yajni wa xkatikyi orasyon.

Chikan jastal ja jkʼumaltiki ja Dyos wa xyabʼ stojol ja jpensartiki sok ja jastal wa xkabʼ ayotiki. Ja Yabʼali wa xyalakabʼtik: «Ja Diosi, mi ni jun maʼ menos huax yilaa. Chican jastic razailotica, ja maʼ huax xiu yuj ja Diosi, ja maʼ huas scʼulan yi lec ja smoji, lec ni huax yila» (Hechos 10:34, 35).

Pe bʼa oj ya koʼ jlekilaltik ja Dyos, mini kechan oj katikyi orasyon. Ja bʼa artikuloʼik jakumi oj kiltik jasto mas jel tʼilan oj jkʼuluktik.