Ja Dyosi skʼapayi ja aluman Abrahán «spetsanil ja chonabʼik bʼa luʼumi» oj ajuk koʼ slekilal stsʼakatal yuj june ja yintili (Génesis 22:18). ¿Sbʼa machunkiluk wan stajel tiʼal?

Ayxa junuk 2,000 jabʼil, ja Dyos yayi ja Jesús ja ipal bʼa skʼulajel milagroʼik. Ja milagroʼik jaw xchiktes ke ja skʼapjelik yayi ja Dyos ja Abrahán bʼa oj ya koʼ slekilal spetsanil ja chonabʼiki ojni kʼot smeranil stsʼakatal ja Jesús, bʼa tini jakel bʼa yintil Abrahán (Gálatas 3:14).

Ja milagroʼik skʼulan ja Jesús skoltay ja kristyano bʼa oj najuk sbʼaj jastal ja aluman tsaʼubʼal yuja Dyos bʼa oj ya koʼ slekilal spetsanil ja kristyano. Abʼan stsamalil bʼa tolabida ja slekilal wa xyaʼa ja jKʼulumantiki. La kiltik jastal ja milagroʼik jaw wa xchiktes jujuntik ja bʼa tsamalik smodoʼik ja Jesús.

Yajxta ilwani sok ya tojbʼuk ja matik maloʼayi.

Bʼa jun ekʼele, june maʼ wan kʼaʼel sbʼakʼtel spatayi skʼujol ja Jesús, ke ta ja yeʼn wa skʼana, ojni ya tojbʼuk. Ja Jesús syama sok yala yabʼ: «Huan nix cʼana». Sok wegoxta chʼay ja chameli (Marcos 1:40-42).

Jel jaman skʼabʼ waji sok yayi swaʼel ja maʼ waʼin xyabʼi.

Ja Jesús mini skʼana oj stekʼ waʼin ja kristyano. Mini kechanuk jun ekʼele, ja yeʼn bʼa jun modo jel chamyiljel yayi swaʼel jitsan mil kristyano sok ya pojxuk jujuntik pan sok jujuntik chay (Mateo 14:17-21; 15:32-38). Spetsanile bʼutʼyekan lek sok cha kanto sobra jitsan waʼel.

Jel snaʼa yajulal sok ya sakʼwuk ja matik chameli.

Yajni yila cham ja único yunin jun viguda sok mey yiʼoj maʼ oj talnajukyuj, ja Jesús jelni «snaʼa syajulal» sok ya sakʼwuk ja keremi (Lucas 7:12-15, TNM).