Jpetsaniltik ti jaktik bʼa bʼajtan winik Adán. Ja jaw wa xkʼan yal kʼotelotik jun niwan pamilya. Ama wa xmajlaxi ke yibʼanal ja pamilya a-syajtay sbʼaje sok a-skis sbʼaje, ja smeranili, ja bʼa luʼumkʼinali mini kʼajyel wa xkilatik ja tikʼe yajtanel jaw. Pe ja Dyosi mini lek wa xyila ja jach oj ajyuki.

«Yajtajtay ja wa moji jastal waxa yajtay abʼaj ja weʼn» (LEVÍTICO 19:18).

«Yaj xa huabʼ ja hua condra» (MATEO 5:44).

Ja bʼa 1 Corintios 13:4-7, ja Dyos wa xyalakabʼtik jastal ja yajalkʼujoli.

«Ja maʼ ay syajal ja scʼujoli, ay ni spasensiaa y jel ni tzamal ja smodoʼi».

Pensaraʼan sbʼaja it. ¿Jastal waxa wila yajni june ay spasencia sok jel lek skʼujol, sok mi xtajki yajni ay jas mi lek waxa kʼulan?

«Ja maʼ ay syajal ja scʼujoli, [...] mi envidiosouc».

Pensaraʼan sbʼaja it. ¿Jastal wala ajyi yajni ay maʼ mi sjipa skʼujol bʼa weʼn ma wa xyilkʼujolana?

Ja yajalkʼujoli mi kechan wa sleʼa slekilal bʼa yeʼna.

Pensaraʼan sbʼaja it. ¿Jastal waxa wila yajni ay maʼ wa skisa ja jas waxa pensarani sok mi kechan wa x-och kʼumal sbʼaja jas wa skʼana?

Ja yajalkʼujoli «mi ni snicjuluc itaa».

Pensaraʼan sbʼaja it. Ja Dyosi pwesto ay bʼa oj ya perdón ja matik wa sutxi skʼujol ja bʼa smuleʼi. «Mini jaxta wajel skʼujol skʼeljel ja jas mi lek wa xkʼulantiki, sok mini tolabidaʼuk oj snolkan tajkelal» (Salmo 103:9). Jelni chaʼanyabʼal wa xkilatik yajni wa xyaʼawotik perdón ja maʼ wa xyajbʼestiki. Ja yujil, ja keʼntiki cha tʼilani pwesto oj ajyukotik bʼa yajel perdon ja maʼ wa syajbʼesotiki (Salmo 86:5).

Ja yajalkʼujoli «mi huas tzeeni cuando huax yab que ay smul ja smoji».

Pensaraʼan sbʼaja it. Yajni ay jas mi lek wa x-ekʼ jbʼajtik, mini lek oj kiltik ja oj gustoʼaxuke ja tuki. Ja yuj mini la gustoʼaxitik ja yajni wa xyiʼaje wokol ja tuk, ama skʼulunejekitik bʼa mi lekuk.

Ta wa xkʼanatik oj ya koʼ jlekilaltik ja Dyosi, tʼilani oj jyajtaytik ja tuki chikan jas sjabʼile, bʼa sbʼaje ma jas relijyon yiʼoje. Jun modo bʼa sjejel ja yajalkʼujolali jani skoltajel ja maʼ wa xmakuniyuji.