Man kʼe ajyuk ja kristyano, ja jKʼulumantiki skʼumunejni ja kristyano bʼa yaʼ makunuk alumanik sok anjelik. Cha stsaʼa oj stsʼijbʼukan ja srasonik sok ja skʼapjeliki. Ja Dyos wa skʼapakitik ja bʼa tyempo jakumi gustoni oj ajyukotik, pe bʼobʼta oj jobʼ jbʼajtik: «¿Bʼa wa xtax ja kʼapjelik jaw?».

Ja srasonik ja Dyosi ti wa xtax bʼa Yabʼal (2 Timoteo 3:16). ¿Jastal ya makunuk ja Dyos ja yalumanik bʼa stsʼijbʼajel ja srasoniki? Ja yeʼn ya ekʼuk ja spensar, ja bʼa spensare ja winike jaw bʼa yeʼn oj stsʼijbʼuke (2 Pedro 1:21). La katik jun sjejel: ta jun empresario ya makunuk ja secretario bʼa oj stsʼijbʼuk rason, mini oj kaltik yeʼn bʼa spensar stsʼijbʼan ja secretario, jani empresario. Jastalni jaw, ama ja Dyos yaʼ makunuk winike bʼa oj stsʼijbʼuke ja srasoni, yeʼnani yajwalalil ja Biblia.

Ja Yabʼal ja Dyos jelni tʼilan bʼa wani skʼana ja yeʼn bʼa spetsanil kristyano oj skʼumuke sok oj yabʼye stojol. Ja bʼa jtyempotik, ja kristyanoʼik «chican bi ba lugar culane, chican bi jas razaile, chican bi jas cʼumalile» wani xbʼobʼ yabʼye ja «abal it mi ni nunca oj chʼacuqui» ma ja lekil notisyaʼik bʼa Dyos (Apocalipsis 14:6). Soka skoltanel ja Dyosi, ja Yabʼali sutubʼal yibʼanal ma bʼa xetʼan bʼa mas ja 3,000 kʼumal, bʼa masni jitsan yuj chikan jas libro.