JASTAL YAJELKAN SMAKʼLAJEL JA ILKʼUJOLI
3 | Aʼeluk ja ilkʼujol ja bʼa wa pensar
Ja Biblia wa xyala:
«Tukbʼesa bʼajex yajel tojbʼuk jawa pensarexi, bʼa jachuk weʼn mismo oja wilex jasa lek wa skʼana ja Dyosi, jasa lek wa xyila sok jasa tsʼikan wa skʼana» (ROMANOS 12:2).
¿Jas wa stojolan?
Ja Dyosi wa xyila stʼilanil ja jas wa xpensaraʼantiki (Jeremías 17:10). Ama tʼilani oj jtalnaytik ja jas wa xkalatik sok wa xkʼulantik, pe mini malanukta. Yuja smakʼlajel ja ilkʼujol ti wa stuluyi bʼa jpensartik sok bʼa jkʼujoltik, tʼilani oj katik eluk chikan jas tikʼe ilkʼujol bʼa wa xbʼobʼ och jbʼajtik. Kechan jachuk oj bʼobʼ jtukbʼes jbʼajtik sok yajelkan smakʼlajel ja ilkʼujoli.
Ja jas oj bʼobʼa kʼuluk:
Pensaraʼan lek ja jastal waxa wila ja tuki sok jas waxa pensaraʼan bʼa yeʼnle, sok mastoni ta pilan rasaʼe ma pilan xchonabʼe. Jobʼo abʼaj: «¿Jastal wa xkilawe? ¿Jach maʼ wa xpensaraʼan ja jastal mero kilunejeʼi? Ma ¿jaʼ wa xnocho ja tikʼe pensar bʼa skʼenajel ja tuk?». Moka kʼel jastik junuk bʼa internet, pelikulaʼik ma tajnelik bʼa wa smakʼla ja ilkʼujol sok ja spekʼjel chikʼ.
Ja Yabʼal ja Dyosi ojni skoltayotik bʼa yajel eluk ja ilkʼujol ja bʼa jpensartik sok ja bʼa jkʼujoltik
Mini jel pasiluk yaljel jaman lek ja jas wa xpensaraʼantik sok ja jastal wa xkabʼ ayotik. Pe ja Yabʼal ja Dyosi wa skoltayotik yujni wa ‹xbʼobʼ xchiktes ja spensarik june sok ja jas wa skʼana oj skʼuluk ja skʼujoli› (Hebreos 4:12). Ja yuj ila ja jas wa xyala ja Biblia sok a-slaj sbʼaj ja sjejelik soka jastal waxa pensarani. Anto, kʼujolan stukbʼesel jawa pensari sok aʼochkan ja jas wa sjeʼa ja Biblia. Ja Yabʼal ja Dyosi wani xbʼobʼ ‹sjip luʼum ja jastik yij lek tsʼunan› ja bʼa jpensartik sok ja bʼa jkʼujoltik, jastal ja ilkʼujoli (2 Corintios 10:4, 5).
Bʼobʼta cha ojni akʼul gusto
JA BIBLIA STUKBʼES JA SAKʼANILE
Jtukbʼes ja yamkʼabʼalik bʼa guerra yuja Biblia
Kʼela jastal koltaji yuja Biblia ja Cindy bʼa stukbʼesel ja smodo bʼa jel kalaxi.
