¡Ja ilkʼujoli oj chʼaysnajel bʼa tolabida!
Ama xlajxikujtik yajel eluk ja ilkʼujol ja bʼa jkʼujoltiki, mini xbʼobʼ jkomtik ja jas wa skʼulane sok wa spensarane ja tuk. Pe yuja jel maʼ wan yijel wokol yuja ilkʼujoli, ¿machun oj bʼobʼ xchʼaysnajel ja wokol it?
Ja maʼ kechan wa xbʼobʼ xchʼaysnajel bʼa tolabida ja ilkʼujoli jani ja Jyoba Dyos, sok ja Biblia wa xyala ke jachni oj skʼuluk (Proverbios 20:22).
JA DYOS OJ XCHʼAYSNAJEL JA JASTIK WA XYIJAN ILKʼUJOL
-
1. JA SATANÁS, JA DYABLO. Ja Satanás, ja anjel maʼ skʼoko abʼali, yeʼnani smul yuja jel ja ilkʼujoli. Ja Dyos oj xchʼaysnajel ja Satanás sok yibʼanal ja matik ayiʼoje ilkʼujol jastal ja yeʼn (Salmo 37:38; Romanos 16:20).
-
2. JA LUʼUM TEY BʼA SKʼABʼ JA SATANÁS. Ja Dyos oj xchʼaysnajel ja matik wa xya ajyuk ilkʼujoli, jastal ja politikoʼik bʼa wa xchono sbʼaje sok ja olomalik bʼa relijyon bʼa wa xyawe ajyuki. Ja Dyosi cha oj xchʼaysnajel ja negosyoʼik bʼa kechan wa skʼana oj ya el slekilal, wa x-elkʼani sok wa sloʼlay ja kristyano (2 Pedro 3:13).
-
3. JA MULALI. Ja Biblia wa xcholo ke kibʼanaltik ekʼel jbʼajtik ja mulali, sok ja yuj ayni wa xpensarantik, wa xkabʼtik sok wa xkʼulantik jastik mi lekuk (Romanos 5:12). Sok ja it ti chʼikan ja yilkʼujolajel ja tuk. Pe soka skoltanel ja Dyosi, ojni lajxukujtik elel libre ja bʼa mulali sok mixa oj ajyuk ilkʼujol ja bʼa jkʼujoltiki (Isaías 54:13).
JA BIBLIA WA SKʼAPA JUN LUʼUM BʼA MIXA OJ AJYUK ILKʼUJOL
-
1. MIXA OJ AJYUK BʼA JASTIK MI TOJUK. Ja luʼumi oj ajuk mandar yuja sGobyerno ja Dyos masan bʼa satkʼinal, jun gobyerno jel toj bʼa ti oj ajyuk tolabida (Daniel 2:44). Mixani oj ajyuk ja kʼenanel sok ja mi lek yiljel ja tuki, jaxa Dyosi oj skʼulyi bʼa toj yibʼanal ja matik wane yijel wokol ja wego (Lucas 18:7).
-
2. OJXA AJYUK LAMANIL. Mixa maʼ oj yiʼ wokol yuj smul ja guerraʼik sok ja spekʼjel chikʼ (Salmo 46:9). Mixa xiwela sbʼaj oj ajyuk ja Luʼumi, pes ja swinkili jelxani oj syajtaye ja lamanil (Salmo 72:7).
-
3. JELXA LEK OJ AJYUK JA JSAKʼANILTIKI. Kibʼanaltik oj jyajtay jbʼajtik (Mateo 22:39). Mixa jas oj ya kitik wokol, mixani ja mal pensariki ma ja jas mi lek ekʼel jbʼajtiki (Isaías 65:17). Yajni chʼayta snajel ja ilkʼujoli, ja kristyano «jel oj yabʼye stsamalil ajyel laman» (Salmo 37:11).
¿Wan maʼ xyawi gusto ajyel sakʼan bʼa jun luʼum jastal jaw? Miyonik kristyano ja bʼa luʼumi, bʼa kʼotele testigoʼik bʼa Jyoba, waneni yajelkan smakʼlajel ja ilkʼujoli. ¿Jastal wa skʼulane? Jani yajel makunuk ja rasonik bʼa Biblia (Salmo 37:8). Ama tuk ja bʼa jakele sok tuk ja skulturaʼe, kʼotele jun pamilya bʼa tsoman aye stsʼakatal yuja syajal skʼujole (Isaías 2:2-4).
Ja testigoʼik bʼa Jyoba jel sgustoʼe oj sjeʼawi ja jas snebʼuneje sbʼaja jastal oj kuchukawuj ja yajni wa xkʼulajiwi bʼa mi tojuk ma wala kʼenaji. Ja jas oja nebʼi oj skoltaya bʼa takal takal oja wakan ja ilkʼujoli sok oj kʼe yajtanan. Oja nebʼ jastal oja wil lek ja tuk, asta ja matik jel kalaxe amoki ma wa xyilkʼujolana. Sok ja slekilali, masxa gusto oj ajyan sok masxa lek oja wilabʼaj soka tuk. Pe ja mas tʼilani: ojni anebʼ jasa oja kʼuluk bʼa oja wabʼ stsamalil jawa sakʼanil yajni ja sGobyerno ja Dyos xchʼaya snajel ja ilkʼujoli (Salmo 37:29).
Bʼobʼta cha ojni akʼul gusto
JA JUʼUN CHOLUMANI
¿Jasa oj skʼuluk ja sGobyerno ja Dyos?
Ja Jesús wa snaʼa kechantani ja sGobyerno ja Dyos oj bʼobʼ stojbʼes ja wokolik bʼa Luʼumi. ¿Jasa skʼulunejxa ja Gobyerno jaw bʼa oj jipjkʼujoltik?
