¿Jas yuj jel ja ilkʼujoli?
¿Jas yuj mi xkʼot tikʼan ja ilkʼujoli? Bʼa snajel, tʼilan oj kabʼtik stojol jasunkiluk ja ilkʼujoli, jas yuj wa xkʼe ilkʼujolanuke ja kristyano sok jastal wa spuku sbʼaj.
¿Jasunkiluk ja ilkʼujoli?
Ja ilkʼujoli kʼotel jun jasunuk bʼa jelxelxa yijnajel ma mi lek yiljel june ma jun tsome kristyano. Mini kechanuk jun ita tajkelal bʼa ekʼum bʼej ita.
¿JAS YUJ WA XKʼE ILKʼUJOLANUKE JA KRISTYANO?
Ja ilkʼujoli wa x-och sbʼaje ja kristyano yuj jitsan rason. Tikʼanxta wa xyilkʼujolane ja tuk pe mi jaʼukta yuja jas wa skʼulane, jani yuja machun kʼotele. Bʼobʼta wa xyilawe ke maloʼe sok xiwela sbʼaje, ma wa spensarane mixa oj stukbʼes sbʼaje. Ma bʼobʼta jel skoʼelale wa x-iljiye, ay jas wa xbʼobʼ skʼuluke bʼa mi lekuk ma wa snikawe wokolik. Chomajkil, jitsan wa x-ilkʼujolaniye yujni ay bʼa ixtanubʼale, kʼulubʼalyile bʼa mi tojuk ma tuk jastik bʼa mi lekuk.
¿JASTAL WA SPUKU SBʼAJ?
Ayni ekʼele, ja kristyanoʼik wa xyilkʼujolane ja tuk ama mini snaʼawe sbʼaj. Jun sjejel, jun kristyano cha jachni wa xkʼe yil ja tuk jastal wa xyilawe ja matik jel skisa ma jel skʼana. Sok yajni wa x-och jitsanbʼuk ja matik jach wa spensarani, wegoxta wa spuku sbʼaj ja ilkʼujoli.
Yajni wa xkabʼtik stojol ja jastal jel wego wa spuku sbʼaji, wani xkʼot jnatik jas yuj jel ja ilkʼujoli. Pe bʼa yajelkan smakʼlajel ja ilkʼujoli, tʼilani oj jnatik bʼa mero eljana. Ja Biblia wa xcholo sbʼaja it.
JA BIBLIA WA XCHOLO BʼA MERO ELJANI
JA ILKʼUJOLI MI TI ELJAN BʼA JUN KRISTYANO. Ja ilkʼujoli kʼe stulyi yajni jun anjel ja bʼa satkʼinali skʼokoyi ja yabʼal ja Dyosi sok kʼot najuk sbʼaj jastal Satanás, ja Dyablo. Yajni skʼoko ja abʼali, pax jun milwanum. Yuja «jun leʼa abʼal sok yeʼnani ja statalil ja abʼali», mini xkʼot tekʼan snikjel ilkʼujol sok yajbʼesnel (Juan 8:44; 1 Juan 3:11, 12). Ja Biblia wa sjeʼa ke jel malo, wa x-ixtalani sok jel tajkel ay (Job 2:7; Apocalipsis 12:9, 12, 17).
JA KRISTYANO EKʼEL SBʼAJE JA ILKʼUJOLI. Ja bʼajtan winiki, ja Adán, snocho ja Satanás. Sok ja yuj kibʼanaltik ekʼel jbʼajtik ja mulali (Romanos 5:12). Jaxa Caín, ja bʼajtan skerem ja Adán, yilkʼujolan ja Abel, sok ama kʼotel yermano, ja yeʼn smila (1 Juan 3:12). Ama wani la yajtanitik sok wa xnaʼatik syajal ja tuk, pe yuja ekʼel jbʼajtik ja mulali, jitsan kristyano kechanta yeʼn wa xwaj skʼujol sbʼaje, jel niwan xyaʼa sbʼaje sok jel imbidiosoʼe, pe ja modoʼalik it kechan wa smakʼla mas ja ilkʼujoli (2 Timoteo 3:1-5).
JA MI LEK YILJEL JA TUK WA XYIʼAJAN ILKʼUJOLANEL. Ja luʼum it wa xya ajyuk modoʼalik bʼa jel kistal sok jel malo, bʼa wa xyijan ilkʼujol. Yuja «yibʼanal ja luʼumkʼinali tey bʼa skʼabʼ ja Maʼ jel malo», wa xkʼan kaltik, ja Satanás, ja Dyablo, ja yuj jelni ja kʼenanel, ja mi lek yiljel ja tuk, ja kʼakʼlanel, ja ixtalanel sok ja ilwanel kontra (1 Juan 5:19).
Pe ja Biblia mi kechan wa xcholo bʼa eljan ja ilkʼujoli, cha wa xyala jastal oj tojbʼuk.
