JASTAL YAJELKAN SMAKʼLAJEL JA ILKʼUJOLI
4 | Leʼa ja skoltanel ja Dyosi
Ja Biblia wa xyala:
«Jaxa satinel wa xyaʼa ja yip ja Dyosi jaʼa yajalkʼujol, gustoʼil, lamanil, pasensya, lekil modoʼal, lekil kʼujolal, skʼuʼajel, mansoʼil, skomjel sbʼaj» (GÁLATAS 5:22, 23).
¿Jas wa stojolan?
Wani xbʼobʼ katikan smakʼlajel ja ilkʼujol yuja skoltanel ja Dyosi. Ja yipi wani xbʼobʼ skoltayotik bʼa ajyelkujtik modoʼalik bʼa bʼobʼta nunka oj ajyukujtik yuja kiptiki. Ja yuj, jaʼuktoma oj jletik modo skʼulajel ganar ja ilkʼujol yuja kiptiki, masni lek la jletik ja skoltanel ja Dyosi. Ta wa xkʼulantik, jachni oj ekʼ jbʼajtik jastal ja jekabʼanum Pablo. Ja yeʼn stsʼijbʼan: «Ayni kip sbʼa yibʼanal stsʼakatal ja maʼ wa xyaki ja kipi» (Filipenses 4:13). Sok jachuk ojni bʼobʼ kaltik: «Ja jkoltajeli tini wa xjak bʼa Jyoba» (Salmo 121:2).
Ja jas oj bʼobʼa kʼuluk:
«Jelni kalaxon ajyi […]. Pe ja Jyoba ya paxkon jun winik jel laman» (WALDO).
Kʼanayi ja Jyoba sok spetsanila kʼujol bʼa ayawi ja yipi sok a-skoltaya bʼa ajyelawuj lekil modoʼalik (Lucas 11:13). Ajyelawuj yajalkʼujol, lamanil, pasensya sok skomjela bʼaj ojni skoltaya bʼa oja kʼul ganar ja ilkʼujoli. Paklay ja jas wa xyala ja Biblia sbʼaja modoʼalik jaw sok leʼa modo sjejel ja bʼa wa sakʼanili. Cha jelni tʼilan oja mojtay ja matik wa skʼujolane ajyelyujile ja modoʼalik jaw, yujni oj snika bʼa oja jeʼ syajala kʼujol sok skʼulajel jastik lek (Hebreos 10:24).
