¿Ay maʼ bʼa mokʼela ja yajni yal chʼinato? Bʼobʼta jot jawa kʼabʼi ma wa xijkʼani. ¿Jastal skoltaya jawa nani? Bʼobʼta skusu sok spotso jawa yajbʼeli. Ja weʼn okʼya, sok jawa nani yaʼa kulan akʼujol sok stelawa. Yajni yal chʼinato, wego waxa taʼa koltajel.

Pe yajni wala kʼitiki, wa xwokolaxi ja jsakʼaniltiki sok jelxa wokol stajel jkoltajeltik. Ja smaloʼili, ja jwokoltik ja yajni niwanotikxa mixa kechanta wa xbʼobʼ tojbʼuk sok ja skoltanel ja jnantiki. La kiltik jujuntik sjejel.

• ¿Ay maʼ bʼa kanela meya waʼtel? Ja Julián wa xyala, yajni kʼutsjiyi ja yaʼteli, jel chamkʼujol kani. Pes wa sjobʼo sbʼaj: «¿Jastalxa oj jmakʼlay ja jpamilya? Jitsanxani jabʼil kongana wanon aʼtel, ¿jas yuj wa spensaraʼan ja empresa mixa la makuniyon?».

• ¿Ja wabʼunej ja swokolil yajelkanabʼaj soka wa nupi? «Ekʼelxa 18 ixaw, ja yaʼawonkan ja jtatami. Jel triste kanyon, lajansok syatsʼa sbʼaj ja jkʼujoli. Jel yaj kabʼi sok jel xiwel kanyon» wa xcholo ja Raquel.

• ¿Jaxa ta wiʼoj jun chamel sok mi la tojbʼi? Bʼobʼta jach xa wabʼ jastal ja awel Job, bʼa yala: «Wa xkilkʼujolan ja jsakʼanili; mixa xkʼana oj ajyukon sakʼan» (Job 7:16). Ma oj bʼobʼa pensaraʼuk jastal wa spensaraʼan ja Luis, bʼa ayiʼoj 80 jabʼil, yala: «Ay ekʼele wa xkabʼ kechanxta wanon smajlajel oj chamkon».

• ¿Jaxa ta waxa kʼana oj ajuk kulan akʼujol yuj ay maʼ chamawuj? «Yajni kabʼ cham ja yal jkeremi bʼa jun abyon, mini xkʼuʼana. Tsaʼan jaka syajali, bʼa jastal wa xyala ja Biblia lajansok jun kuchiyo wa muku sbʼaj ja bʼa kaltsiltik» wa xcholo ja Roberto (Lucas 2:35).

Ja Julián, ja Raquel, sok ja Roberto staʼawe skoltajel sok ja maʼ mero wa snaʼa yajeli, ja Dyos maʼ jel ja yipi. ¿Jastal wa xyaʼa kulan jkʼujoltik? ¿Oj maʼ ya kulan akʼujol ja Dyos ja yajni wan ekʼelabʼaj wokoli?