Ja bʼa bersikuloʼik it cholan ay bʼa jun lista ja bʼalune modoʼalik. Ja bʼa teksto wa xyala: «Pe jaxa ja satinel ja yip ja Dyos jani ja yajalkʼujol, gustoʼil, lamanil, pasensya, lekil modoʼal, lekil kʼujol, skʼuʼajel, mansoʼil, skomjel abʼaj». Pe cha ayni pilan modoʼalik bʼa wa sjeʼakitik ja yip ja Dyos bʼa wa xbʼobʼ skoltayotik.

La kiltik ja jas stsʼijbʼan ja jekabʼanum Pablo ja bʼa bersikuloʼik tsaʼani: «Ja maʼ jaʼ mero huan scʼulajel pensar [...] ja cosa ba malo. Huane sleejel tuc xcheume, jaʼ mero huajel scʼujole ja sleejel ja smule soc ja ixuquei. [...] Jaxa sdiose huas scʼuanei, cʼulubal jastal ja splanta ja yenlei. Jaʼ mero huajel scʼujole soc ja jastal ja smodoe ja brujo jumasa, y jaʼ ni jel xchole ja pleitoa. Puro envidia ja ba scʼujolei. [...] Mero tantic ucʼatragoe. Mix qʼuixhuiye. Chol naitz huas sleahue ecʼ ja stragoei. Jaʼ ni mero ja smodoe ja cristiano jau ja maʼ huas scʼulane ja sgusto ja yenle mismo tac» (Gál. 5:19-21). Ja yuj bʼobʼta ja Pablo yala pilan jasunuk wa skʼulane ja matik «mero huan scʼulajel pensar [...] ja cosa ba malo», jastalni wa xyala ja bʼa Colosenses 3:5. Oj cha slajtik ja bʼa bʼalune lekil modoʼal yala ja jekabʼanum Pablo ja bʼa Gálatas 5:22, 23 (TNM). Ja bʼa lista jaw, ja yeʼn mi wanuk xchʼikjel spetsanil ja modoʼalik bʼa oj bʼobʼ ajyukujtik soka skoltanel ja yip ja Dyosi.

Wani xbʼobʼ kabʼtik stojol ja yajni wa xkatik slaj ja lista bʼa Gálatas ja jas stsʼijbʼanyi ja Pablo ja kongregasyon bʼa Éfeso: «Ja sati ja yijlabʼi ja‘ni ja slekili ja stojoli ja smeranili» (Efes. 5:8, 9, Ja yajkʼachil sju‘unil ja dyosi). Jastalni kilatik, ja slekili, ja stojolil soka smeranil junxtani kʼotel, bʼa tini chʼikan ja sat «ja yijlabʼi», pe cha jani kʼotel «ja satinel ja yip ja Dyos». Ja yuj, ama ja Pablo mi staʼa tiʼal ja stojolil soka smeranil ja bʼa Gálatas 5:22, 23, pe ojni bʼobʼ yal ajyi.

Junxtatik jastal it, ja Pablo stsatsankʼujolan ja Timoteo bʼa oj ajyukyuj jun lista ja bʼa wake modoʼalik it: «Ajyan mas toj. Xihuan yuj ja Diosi. Cʼuan soc spetzanil ja hua cʼujoli. A ajyuc ja syajal ja hua cʼujoli. A nihuanbuc ja hua cʼujoli. Aa hua pasensia» (1 Tim. 6:11). Kechan oxe ja bʼa it, tey ja skʼuʼajel, ja yajalkʼujol sok ja pasensya wa xtax ja bʼa lista ja bʼa «ja satinel ja yip ja Dyos». Pe ja Timoteo cha wani skʼana atojuk yuja yip ja Dyos bʼa sjejel ja tuk modoʼalik yala ja Pablo: ja stojolili, ja xiwel yuja Dyos sok ja kuchelkujtik (kʼela ja Colosenses 3:12; 2 Pedro 1:5-7).

Ja yuj ja bʼa Gálatas 5:22, 23 (TNM), mini kechanukta oj ajyukyuj ja yaʼtijumik Dyos ja modoʼalik it yuja skoltanel ja yip ja Dyos. Ja it oj bʼobʼ skoltayotik sjejel ja bʼa bʼalune wa xtax ja bʼa lista ja bʼa «ja satinel ja yip ja Dyos». Pe aytoni mas modoʼalik bʼa wa xya takʼanbʼukotik jastal yaʼtijumotik Dyos sok wa xkatik ajyuk ja «yajcʼachil modo. La xa ajyucotic toj tʼusan, pero meran. La xa jnebtic tʼusan ja smodo ja Diosi. Ja jastal jahui, jach ni mero huas scʼana ja Diosi» (Efes. 4:24).