1. ¿Jasa wa skʼana ja Jyoba?

 JA JYOBA skʼulan ja kristyanoʼik bʼa oj stsaʼe ja jasa wa skʼana oj skʼulukeʼi. Spetsanil ja kʼakʼujik wa xkatik makunuk ja majtanal jaw yajni ay jas wa stsaʼatik. Pe ja jasa mas tʼilan oj bʼobʼ stsaʼ jun kristyano, jani yajelyi ja sakʼanil ja Jyoba sok kʼotel parte ja bʼa spamilya. Ja yuj, ja Jyoba wani skʼana ke spetsanil ja kristyanoʼik oj stsaʼe ja jawi. ¿Jas yuj? Yujni wa syajtay ja kristyanoʼik sok wa skʼana ja jas mas lek bʼa yeʼnle. Wani skʼana oj yabʼye stsamalil ja yamigoʼajel sok ajyel sakʼan bʼa tolabida (Deut. 30:​19, 20; Gál. 6:​7, 8).

2. ¿Jasa wa skʼana ja Jyoba oj skʼuluke ja matik koʼele bʼa jun chaʼan mulal sok mito sutxel skʼujole? (1 Juan 2:1).

² Ja Jyoba mi maʼ wa skʼulan obligar bʼa oj yaʼteltay, wani xyaʼakan ke kada jujune a-stsaʼ ja jasa oj skʼuluki. Pe ¿jasa wa x-ekʼ ta jun yaʼtijum Dyos bʼa yiʼunejxa jaʼ wa xkoʼ bʼa jun chaʼan mulal? Ta mi sutxi skʼujol, tʼilani oj eluk ja bʼa kongregasyon (1 Cor. 5:13). Ama jachuk, ja Jyoba wani skʼana sok spetsanil skʼujol ke akumxuk soka yeʼn. Jun rason jel tʼilan yuja yaʼa ja koltanel jani bʼa oj ya  perdon ja matik sutxel skʼujole yuja smuleʼi (kʼuman ja 1 Juan 2:1). Ja kala Dyostiki jelni xyajtani bʼa wa skoltay ja matik staʼuneje smul sok wa stsatsankʼujolan bʼa oj sutxuk skʼujole (Zac. 1:3; Rom. 2:4; Sant. 4:8).

3. ¿Jasa oj kiltik ja bʼa artikulo it?

³ Ja Jyoba wa skʼana ke la jnochtik ja bʼa jastal wa xyila ja mulaliki sok ja matik wa xkoye bʼa jun chaʼan mulal. Ja artikulo it oj skoltayotik bʼa oj lajxukujtik. Bʼajtan, oj kiltik jastal ilxi jun chaʼan mulal ja bʼa kongregasyon bʼa Corinto ja bʼa bʼajtan siglo. Xchabʼil, oj paklaytik ja tojelal yaʼa ja jekabʼanum Pablo yajni ja mulanum sutxi skʼujol. Sok yoxil, oj tatik tiʼal jastal wa xyila ja Jyoba ja matik wa xkoye bʼa jun chaʼan mulal.

¿JASTAL ILXI JUN CHAʼAN MULAL JA BʼA BʼAJTAN SIGLO?

4. ¿Jasa wan ekʼel ja bʼa kongregasyon bʼa Corinto? (1 Corintios 5:​1, 2).

⁴ (Kʼuman ja 1 Corintios 5:​1, 2). Ja bʼa yoxil sbiaje jastal misionero, ja Pablo kʼot yabʼ ke wan ekʼel jun jasunuk jel tuk ja bʼa ajkʼach kongregasyon bʼa Corinto: jun snochuman Kristo wan stajel sbʼaj soka majan snani. Ja Pablo yala ke «jelxani malo ja jastal wan koʼel mulali sok mini bʼa ekʼel soka matik mi kʼuʼumanukeʼi». Ja kongregasyon mini kechan lek wa xyila ja smodo, cha bʼobʼta wa stoyowe soka jas wan skʼulajeli. Bʼobʼta wa spensarane ke ja jaw wa sjeʼa janekʼto ja syajulal skʼujol sok wa xyabʼ stojol ja Dyos ja spaltaʼik ja kristyano. Pe ja Jyoba mini lek xyila ja mulal ja bʼa xchonabʼi. Soka modoʼal jaw bʼa jel kʼixwela sbʼaj, ja winiki wani yajel kuxbʼuk ja jastal wa xnaji sbʼaj ja kongregasyoni. Sok cha ojni bʼobʼ kʼotuk jun sjejel mi lekuk sbʼaja tuk snochumanik Kristo ja bʼa kongregasyoni. Anto, ¿jas tojelalik yayi ja Pablo ja hermanoʼik bʼa Corinto?

5. ¿Jasa tsʼijbʼajiyile ja kongregasyon bʼa Corinto yuja Pablo, sok jasa kʼan yali? (1 Corintios 5:13; cha kʼela ja dibujo).

⁵ (Kʼuman ja 1 Corintios 5:13). Bʼa aji ekʼyi yuja Dyos, ja Pablo stsʼijbʼanyile ke tʼilan oj yawe eluk ja bʼa kongregasyon ja mulanum bʼa mito sutxel skʼujoli. ¿Jastal oj yile ja tojik snochumanik Kristo? Ja Pablo yala yabʼye ke mokxa smojtaye sok mok waʼuke soka yeʼni (1 Cor. 5:11). Yajni ay maʼ wala watiksok, kʼajyelni wala kʼetik loʼil sok wa xkatik ekʼ mas tyempo soka yeʼn. Ja yuj, ja Pablo wani xkʼan yal yabʼye ja hermanoʼik ja bʼa kongregasyon  ke mokxa smojtaye ja winik jaw. Jachuk oj talnaxuk ja kongregasyon ja bʼa sjejel mi lek wa xyaʼa (1 Cor. 5:​5-7). Chomajkil, ojni bʼobʼ yakan ke ja winik jaw oj yil ke syajbʼes ja Jyoba, oj kʼixwuk ja bʼa jas skʼuluneji sok oj nikjuk bʼa oj sutxuk skʼujol.

6. ¿Jastal koltaji ja kongregasyon sok ja mulanum yuja karta sjeka ja Pablo?

⁶ Tsaʼan yajni ja Pablo sjekayi ja karta ja kongregasyon bʼa Corinto, kʼeni sjobʼ sbʼaj jastal oj yabʼye ja hermanoʼiki. Yajni ekʼ ja tyempo, ja Tito yayi jun lekil notisya: ja hermanoʼik lek yabʼye sok snochowe ja stojelal ja jekabʼanumi (2 Cor. 7:​6, 7). Chomajkil, tʼusan tsaʼan yajni ja Pablo sjeka ja skarta, ja winik jaw sutxi skʼujol. Stukbʼes ja smodo, ja jas wan skʼulajeli sok kʼe skʼuʼuk ja jastik toj yaʼunej kujlajuk ja Jyoba (2 Cor. 7:​8-11). ¿Jas tojelalik oj cha yayi ja Pablo ja kongregasyoni?

 ¿JASTAL OJ YIL JA KONGREGASYON JA MULANUM BʼA SUTXEL SKʼUJOLI?

7. ¿Jasa lajxi skʼulajel yuja axi eluk ja mulanum ja bʼa kongregasyoni? (2 Corintios 2:​5-8).

⁷ (Kʼuman ja 2 Corintios 2:​5-8). Ja Pablo yala: «Ja winik jaw malanxa xyabʼ soka tojelal ajiyi yuja tuki». Bʼa tuk yaljelik, ja tojelal ajiyiʼi lajxini ja bʼa jas wa xkʼanxi: ke ja winik jaw asutxuk skʼujol (Heb. 12:11).

8. ¿Jasa yala yabʼ ja Pablo ja kongregasyoni?

⁸ Ja Pablo yala yabʼye jasa tʼilan oj skʼuluke soka hermano bʼa koʼel mulal ajyi: «Tʼilani oja waʼex perdon sok spetsanila kʼujolex sok oja waʼex kulan skʼujol». Sok cha yala: «Wa xkala wabʼyex jeʼawikyi meran waxa yajtayex». Jastalni wa xkilatik, ja Pablo mi kechan wa skʼana ke ayaʼekan akumxuk ja bʼa kongregasyon, cha wani skʼana ke a-sjeʼe soka jas wa xyalawe sok ja jas wa skʼulane ke meran yaʼaweta perdon sok wa skʼanawe. Jachuk ja winik bʼa sutxel skʼujoli ojni yabʼ ke ja hermanoʼik ja bʼa kongregasyon gusto aye yuja kumxitaʼi.

9. ¿Jas yuj jujuntik bʼobʼta wokol yabʼye yajel perdon ja mulanum bʼa sutxita skʼujoli?

⁹ ¿Wokol maʼ yabʼye jujuntik hermanoʼik skʼulajel resibir ja mulanum bʼa sutxel skʼujoli? Ja loʼili mi xyala, pe bʼobʼta. Yujni ja jastik skʼulunej yaʼunej yiʼ wokol ja kongregasyon sok bʼobʼta jujuntik hermanoʼik yajbʼel kanele. Bʼobʼta jujuntik wani xyilawe ke mi stojoluk yajxta skʼulajel resibir ja winik jaw bʼa skʼulunej jastik mi lekuk, yujni ja yeʼnle jel skʼujolanuneje bʼa skʼuʼajel ja smandarik ja Jyoba (cha kʼela ja Lucas 15:​28-30). Pe ¿jas yuj jel tʼilan oj sjeʼeyi meran yajtanel ja hermano bʼa kumxita ja bʼa kongregasyoni?

10, 11. Ta ja ansyanoʼik mi skʼanawe oj yaʼe perdon ja mulanum bʼa sutxel skʼujol, ¿jasa oj bʼobʼ ekʼ ajyi?

¹⁰ Tsaʼan yajni sutxita skʼujol ja mulanum, ¿jasa oj ekʼ ajyi ta ja ansyanoʼik mi yaʼawekan akumxuk ja bʼa kongregasyon ma ta ja hermanoʼik bʼa kongregasyon mi sjeʼaweyi yajtanel? Ja mulanum «jel tʼenan oj yabʼ yuja jel triste ayi». Bʼobʼta oj spensaraʼuk ajyi ke chʼayelxa juntiro ma asta mixa oj skʼujoluk bʼa oj stojbʼes ja jastal wa xtax soka Jyoba.

¹¹ Pe mi kechanuk ja jaw. Lekbʼi ja hermanoʼik ja bʼa kongregasyon mi skʼanawe oj yaʼe perdon ja mulanum bʼa sutxita skʼujoli, xiwelani sbʼaj oj yawe ajyuk ajyi ja jastal wa xtaxye soka Dyosi. ¿Jas yuj? Yujni mi oj sjeʼe ja smodo ja Jyoba, bʼa puesto ay bʼa oj yaʼ perdon ja mulanumik bʼa wa sutxi skʼujole, sok mini jaʼuk ja bʼa Satanás bʼa jel kʼakʼ sok jel malo. Ojni bʼobʼ kʼotuke ajyi yamkʼabʼalik bʼa Dyablo bʼa oj bʼobʼ ya makunuk bʼa xchʼayjel snajel ja jastal wa xyila sbʼaj soka Dyos ja winik jaw (2 Cor. 2:​10, 11; Efes. 4:27).

12. ¿Jasa oj bʼobʼ skʼuluk ja kongregasyon bʼa Corinto bʼa snochjel ja Jyoba?

¹² Anto, ¿jas oj bʼobʼ skʼuluk ja kongregasyon bʼa Corinto bʼa oj snoch ja Jyoba sok mi jaʼuk ja Satanás? Jani yiljel ja mulanumik bʼa sutxel skʼujole jastal wa xyila ja Jyoba. La kiltik ja jasa yalawe jujuntik tsʼijbʼanumik bʼa Biblia sbʼaja Dyosi. Ja David yala: «Jel leka sok puesto aya bʼa oj akʼwanan perdon» (Sal. 86:5). Ja Miqueas stsʼijbʼan: «¿Machun jun Dyos jastal weʼna, bʼa wa xyaʼa perdon ja mulal sok wa xya ekʼ chaʼan ja palta [ ...]?» (Miq. 7:18). Chomajkil, ja Isaías yala: «Ayakan ja sbʼej ja winik malo sok ja winik mi lekuk ja spensarik; akumxuk soka Jyoba,  bʼa ojni najuk syajulal, akumxuk soka jDyostiki, yujni ja yeʼn gustoxta oj ya perdon» (Is. 55:7).

13. ¿Jas yuj jani ja mas lek ja yajel kumxuk ja bʼa kongregasyon ja winik mulanumi? (Kʼela ja recuadro « ¿Jas tyempo aji kumxuk ja bʼa kongregasyon ja winik bʼa Corinto?»).

¹³ Bʼa oj snoche ja Jyoba, ja kongregasyon bʼa Corinto tʼilani oj skʼul resibir sok spetsanil skʼujol ja winik bʼa sutxel skʼujoli sok sjejelyi janekʼto wa skʼana. Ja Pablo yala ke ta yaʼawe perdon ja mulanum bʼa sutxel skʼujoli, ojni sjeʼe ke ‹kʼuʼabʼal oj ajyuke bʼa chikan jasa› (2 Cor. 2:9). Ja jastal toji ja mulanumi nikji bʼa oj sutxuk skʼujol, ama kechan ekʼel jujuntik ixaw ja aji eluk ja bʼa kongregasyon. Ja yuj, mini ay jun rason ke ja ansyanoʼik mi oj yawe kumxuk wego.

¿JASA WA XNEBʼATIK JA BʼA STOJIL SOK JA BʼA SYAJULAL SKʼUJOL JA JYOBA?

14, 15. ¿Jasa wa sjeʼakitik ja jastal ilxi jun chaʼan mulal ja bʼa kongregasyon bʼa Corinto? (2 Pedro 3:9; cha kʼela ja poto).

¹⁴ Ja Jyoba yaʼakan ke atsʼijbʼaxukan ja bʼa Yabʼal ja jastal ilxi ja mulal ja bʼa kongregasyon bʼa Corinto «bʼa oj sjekitik» (Rom. 15:4). Ja it wani sjeʼakitik ke ja Dyos mini lek xyila ja chaʼanik mulal ja bʼa xchonabʼi. Jujuntik wa spensarane ke yuja ay syajulal skʼujol wani xyaʼakan ke jun kristyano bʼa mito sutxel skʼujol tito oj ajyuk ja bʼa kongregasyon. Pe ja jaw mi  meranuk. Ja Jyoba ayni syajulal skʼujol, pe mini x-och alkawetoʼil sok mi stukbʼes ja jastik yaʼunej kujlajuki (Jud. 4). Mini oj sjeʼ yajulal kʼujol lek xyaʼatokan ke jun mulanum bʼa mito sutxel skʼujol aʼajyuk ja bʼa xchonabʼ, yujni ja jaw xiwela sbʼaj oj ya ajyuk ja kongregasyoni (Prov. 13:20; 1 Cor. 15:33).

¹⁵ Ja loʼil it cha wani sjeʼakitik ke ja Jyoba mi skʼana ay maʼ oj xchʼaysnajel. Ja jas wa skʼana jani skoltajel ja kristyanoʼik ta wa xbʼobʼi. Wani sjeʼayi yajulal kʼujol ja matik wa stukbʼes ja smodo sok wa skʼujolane bʼa stojbʼesel ja jastal wa xtaxye soka yeʼn (Ezeq. 33:11; kʼuman ja 2 Pedro 3:9). Ja yuj, yajni ja winik bʼa Corinto sutxi skʼujol sok yaʼakan ja modoʼal mi lekuk, ja Jyoba ya makunuk ja Pablo bʼa yaljel yabʼ ja kongregasyon ke tʼilan oj ya perdon sok skʼulajel resibir.

16. ¿Jastal waxa wabʼ bʼa Jyoba yajni waxa pensaran ja bʼa jastal ilxi ja chaʼan mulal ja bʼa kongregasyon bʼa Corinto?

¹⁶ Spaklajel ja sjejel ja bʼa kongregasyon bʼa Corinto skoltunejotik bʼa yiljel ja syajtanel, ja stojil sok ja jastik toj bʼa Jyoba (Sal. 33:5). ¿Anke ja modoʼik it ja bʼa kala Dyostik yaʼunej tsatsbʼuk ja kʼankʼunel kiʼojtik bʼa oj toytik? Pes jpetsaniltik mulanumotik sok wa xmakunikujtik ja sperdoni. Jel xkatikyi tsʼakatal yuja koltaneli, bʼa wani xyaʼakan oj ajuk perdon ja jmultiki. Jelni xyaʼa kulan jkʼujoltik snajel ke ja Jyoba meran wa syajtay ja yaʼtijumiki sok wa skʼana ja jas mas lek bʼa yeʼnle.

17. ¿Jasa oj paklaytik ja bʼa artikuloʼik nochani?

¹⁷ ¿Jasa wan ekʼel ja bʼa jtyempotik? Ta ay maʼ koʼ bʼa jun chaʼan mulal, ¿jastal oj snoche ja ansyanoʼik ja syajtanel ja Jyoba sok skoltajel ja mulanum bʼa oj sutxuk skʼujol? ¿Sok jastal oj kiltik ta ja ansyanoʼik stsaʼawe ay maʼ oj yawe eluk ja bʼa kongregasyon ma yajel kumxuk? Oj paklaytik ja sjobʼjelik it ja bʼa artikuloʼik nochani.