1, 2. a) ¿Jastal wa xyila ja Jyoba ja matik wa xkoye bʼa jun chaʼan mulal sok mi sutxi skʼujole? b) ¿Jasa wa skʼana ja Jyoba?

 JA JYOBA mi kʼoteluk jun Dyos bʼa wa x-och alkaweto sok mini lek xyila ja mulaliki (Sal. 5:​4-6). Ja yeʼn wani skʼana ke oj kistik ja jastik toj yaʼunej kujlajuk ja bʼa Biblia. Meran mini skʼana tojxa oj kʼotkotik yujni wa snaʼa ke mulanumotik (Sal. 130:​3, 4). Pe cha mini lek xyila ja «winike mi xiwyeyuj ja Dyosi, wa xyawe makunuk ja lekil skʼujol mi xbʼajintik ja jDyostiki jastal manya sbʼaja kistal smodoʼe jel kʼixwela sbʼaji» (Jud. 4). Asta ja Biblia wa xyala ke ja Jyoba oj xchʼaysnajel ja ‹winike mi xiwyeyuji› ja bʼa guerra bʼa Armagedón (2 Ped. 3:7; Apoc. 16:16).

² Pe ja Jyoba mini skʼana ay maʼ oj chʼayjuk snajel. Jastalni kilatik ja bʼa artikuloʼik ekʼta, ja Biblia wani xya chiknajuk jaman lek ke ja yeʼn wani skʼana ke «asutxuk skʼujol yibʼanal ja kristyano» (2 Ped. 3:9). Ja ansyanoʼik wani snochowe ja Jyoba bʼa skoltajel sok pasensya ja matik koʼele bʼa jun chaʼan mulal bʼa oj sutxuk skʼujole sok bʼa oj cha yamigoʼuke. Pe mini spetsaniluke wa skʼulane aseptar ja skoltaneli (Is. 6:9). Jujuntik mi skʼana oj stukbʼes sbʼaje anima ja ansyanoʼik jitsanxa ekʼele skoltayeta bʼa oj sutxuk skʼujole. ¿Jasa tʼilan oj kʼulaxuk ja bʼa ekʼeleʼik jaw?

 «AWIK ELUK JA MAL KRISTYANO TEYA MOKEXI»

3. a) Jastalni wa xyala Biblia, ¿jasa tʼilan oj kʼulaxuk yajni ay maʼ wa xkoʼ bʼa jun chaʼan mulal sok mi sutxi skʼujol? b) Ta june mi sutxi skʼujol, ¿jas yuj wa xbʼobʼ kaltik ke yeʼnani mismo stsaʼunej oj eluk ja bʼa kongregasyoni?

³ Ta ay maʼ koʼ bʼa jun chaʼan mulal sok mi sutxi skʼujol, ja ansyanoʼiki tʼilani oj snoche ja mandar bʼa 1 Corintios 5:13: «Awik eluk ja mal kristyano teya mokexi». Bʼa pilan yaljel, wani xbʼobʼ alxuk ke yeʼnani mismo a stsaʼa ja jas skʼulani; wani yiljel sat ja jas stsʼunuʼi (Gál. 6:7). ¿Jas yuj? Yujni mi skʼana oj skʼul aseptar ja koltanel akʼubʼalyi jitsan ekʼele yuja ansyanoʼiki (2 Rey. 17:​12-15). Ja jastik wa skʼulani wani sjeʼa ke stsaʼunej mi oj skʼuʼuk ja smandarik ja Jyoba (Deut. 30:​19, 20).

4. Yajni ay maʼ wa x-aji eluk ja bʼa kongregasyoni, ¿jas yuj wa x-ekʼ jun anunsyo?

⁴ Yajni ay maʼ wa x-aji eluk ja bʼa kongregasyon bʼa mi sutxi skʼujol yuj jun chaʼan mulal, wa x-ekʼ jun anunsyo bʼa yajel snaʼ ja kongregasyon ke ja kristyano jaw mixa kʼoteluk testigo bʼa Jyoba. b Pe mini xkʼulaxi bʼa yajel kʼixwuk, wani xkʼulaxi bʼa jachuk ja kongregasyon oj skʼuʼuke ja mandar bʼa Biblia bʼa yajelkan smojtajel sok mixa oj waʼuke soka yeʼni (1 Cor. 5:​9-11). Ja Jyoba yaʼa ja tojelal it yuj jun rason jel tʼilan. Ja jekabʼanum Pablo stsʼijbʼan: «[Ja] tʼusan levadura wa xya pojxuk yibʼanal ja wotsʼubʼal arina» (1 Cor. 5:6). Ta mi x-aji eluk ja bʼa kongregasyon june maʼ mi sutxi skʼujol, ja tuki ojni bʼobʼ spensaraʼuke ke mixa tʼilanuk skʼuʼajel ja smandarik ja Jyoba (Prov. 13:20; 1 Cor. 15:33).

5. ¿Jastal xa oj kiltik ja maʼ mixa testigoʼuk bʼa Jyoba, sok jas yuj?

⁵ Anto, ¿jastal xa oj kiltik ja maʼ mixa testigoʼuk bʼa Jyoba? Ama mixa xmojtaytik, mini xkilatik ke tixa chʼayta juntiroʼa, wani xkilatik jastal jun yal chej chʼayel ay sok ojto kumxuk soka tuki. Mokni chʼay jkʼujoltik ke yayi ja sakʼanil ja Jyoba. Tristeni yabʼjel, ja wego mixa wanuk yajel kʼotuk ja jas skʼapayi ja Jyoba, ja yuj jelni peligro ay (Ezeq. 18:31). Pe yuja ayto tyempo sok yuja Jyoba puesto ay bʼa sjejel ja syajulal skʼujol, mokni chʼaykujtik ja smajlajel bʼa ojto kumxuk ja kristyano jaw. Ja yuj, ¿jastal oj skoltaye ja ansyanoʼik ja maʼ mixa teyuk ja bʼa kongregasyoni?

¿JASTAL WA SKOLTAYE JA ANSYANOʼIK JA MATIK AJITA ELUKE JA BʼA KONGREGASYONI?

6. ¿Jastik wa skʼulane ja ansyanoʼik bʼa oj skoltaye ja matik ajita eluke ja bʼa kongregasyoni?

⁶ Yajni ay maʼ wa x-aji eluk ja bʼa kongregasyoni, ¿jasa wa skʼulane ja ansyanoʼiki? ¿Tixa maʼ wa sjipawekana sok wa xyawekan skoltajel bʼa oj cha kumxuk soka Jyoba? ¡Miniʼa! Yajni ja tsome ansyanoʼik xyalawe yabʼ ke mixa oj ajyuk ja bʼa kongregasyoni, ojni xcholeyabʼ ja jastik tʼilan oj skʼuluki bʼa ocha kumxuk. Pe mini kechanuk. Bʼa tʼusan mi spetsaniluk ekʼele, ojni yalweyabʼ ke cha wani skʼanawe oj cha stsom sbʼaje soka yeʼni yajni ekʼta jujuntik ixaw bʼa oj yile ta stukbʼesta ja smodo. Ta lek yabʼi, ja bʼa bʼajtan tsomjelal oj ajyukyujileʼi  tsamalxtani oj stsatsankʼujoluke bʼa asutxuk skʼujol sok akumxuk. Pe ¿jaxa ta ja bʼa ekʼele jaw me stukbʼes ja smodo? Ama jachuk, yajni x-ekʼ ja tyempo, ja ansyanoʼiki ojtoni stsom sbʼaje soka yeʼn sok oj stsatsankʼujoluke bʼa asutxuk skʼujol.

7. ¿Jastal wa snochowe ja ansyanoʼik ja syajulal skʼujol ja Jyoba ja bʼa jastal wa xyila ja maʼ ajita eluk ja bʼa kongregasyoni? (Jeremías 3:12).

⁷ Ja ansyanoʼiki tʼilani oj skʼujoluke bʼa oj snoche ja syajulal skʼujol ja Jyoba ja bʼa jastal wa xyila ja maʼ mixa teyuk ja bʼa kongregasyoni. Jun sjejel, yajni ja israʼelenyoʼik skʼokoweyi ja yabʼali, ja yeʼn mini kan telan skʼabʼ smajlajel ke akumxuke. Jaʼuktoma, yeʼnani ay jas kʼulan bʼajtan sok skoltay bʼajtanto oj sutxuk skʼujole. Jastalni kilatik ja bʼa xchabʼil artikulo ekʼta, ja Jyoba ya makunuk ja aluman Oseas bʼa xchiktesel ja janekʼto jel ja syajulal skʼujoli. Yala yabʼ ja Oseas ke ama wanto koʼel mulal ja xcheʼumi, tʼilani oj waj ya kulan soka yeʼni (Os. 3:1; Mal. 3:7). Junxta jastal ja Jyoba, ja ansyanoʼiki jelni skʼanawe ke asutxuk skʼujol ja kristyano sok akumxuk ja bʼa xchonabʼ ja Dyosi, sok mini xyawe wokolanuk bʼa oj skʼuluk (kʼuman ja Jeremías 3:12).

8. ¿Jastal wa skoltayotik ja loʼil bʼa uninal chʼayeli bʼa oj kabʼtik lek stojol ja syajulal skʼujol ja Jyoba? (Lucas 15:7).

⁸ Cha la juljkʼujoltik ja loʼil bʼa uninal chʼayeli, bʼa jtaʼatik tiʼal ja bʼa xchabʼil artikulo ekʼta. Kechan pabor yajni ja stat yila, «ajnelxta waj staʼe, stela sok yajxta yujtsʼan» (Luc. 15:20). Jastalni wa xkilatik, mixatoni smajlay oj kʼanjukyi perdon. Yeʼnani ay jas bʼajtan skʼulan, jastalni oj skʼuluk jun tatal bʼa jel ja syajal skʼujol. Ja ansyanoʼiki jachni junxtatik wa xyabʼye sbʼaja yal chejik chʼayeli, sok wani skoltaye bʼa oj cha «kumxuke soka Jyoba» (Luc. 15:​22-24, 32). Yajni wa xkumxi jun mulanum, ¡jelni x-ajyi gustoʼil ja bʼa satkʼinali sok jachuk ja bʼa Luʼumi! (Kʼuman ja Lucas 15:7).

9. ¿Jasa tsamal lokjelal wa xyayi ja Jyoba ja matik koʼele bʼa jun chaʼan mulal?

⁹ Spetsanil ja jas jpaklunejtiki wani xchiktes lek ke ja Jyoba mini skʼana tito oj ajyuk ja bʼa xchonabʼ ja maʼ wa xkoʼ bʼa jun chaʼan mulal sok mi sutxi skʼujol. Pe cha mini sjipakan juntiro, ja jas wa skʼana jani ke akumxuk. Ja bʼa Oseas 14:4 wa xkilatik jastal wa xyila ja Jyoba ja matik wa sutxi skʼujole: «Oj tojbʼes ja jastal mi toj ayuka. Oj yajtayex yujni jach wa xkʼana, yujni ja jtajkeli jitsta». ¡Jelni tʼilan ke ja ansyanoʼik aʼajyuke kʼelan jakan yajni ay maʼ wa xkʼe sjeʼ ke wanxa sutxel skʼujol! ¡Sok jelni tʼilan ke ja matik yaʼunejkan ja Jyoba a-skʼuluke ja jastik tʼilan wa xkʼanxi bʼa oj kumxuke soka yeʼni!

10, 11. ¿Jastal wa skoltaye ja ansyanoʼik ja matik ayxa jitsan jabʼil akʼubʼal eluk ja bʼa kongregasyoni?

¹⁰ Pe ¿jaxa matik ayxa jitsan jabʼil akʼubʼal eluk ja bʼa kongregasyoni? Bʼobʼta mixa wanuke skʼulajel ja mulal yuja aji eluke ja bʼa kongregasyoni, sok bʼa jujuntik ekʼele bʼobʼta mixa xjul skʼujole jas yuj skʼulaneʼi. Chikani jastal, ja ansyanoʼiki ojni sleʼe modo bʼa oj staʼe kʼumajel sok oj yulataye ja kristyanoʼik it. Yajni oj waj yulatayeʼi, ojni yalweyabʼ oj yaweyi jun orasyon soka yeʼnleʼi sok tsamalxta oj stsatsankʼujoluke bʼa oj cha kumxuke ja bʼa kongregasyoni. Sok ta june jitsanxa jabʼil mixa teyuk ja bʼa xchonabʼ ja Dyosi, chikani lek ke jelni skʼana skoltajel. Ja yuj, ta yala ke wa skʼana oj  kumxuk, ja ansyanoʼiki ojni bʼobʼ stsaʼe jun hermano ma jun hermana bʼa oj yaweyi jun estudio bʼa Biblia, ama me xkumxi. Pe jani ja ansyanoʼik ja maʼ oj xchape bʼa skʼulajel ja it.

¹¹ Ja ansyanoʼiki wani skʼanawe oj snoche ja syajulal skʼujol ja Jyoba. Ja yuj, wani skʼujolane bʼa slejel ja matik yaʼunejekan ja Jyoba sok wa stsatsankʼujolane bʼa oj cha kumxuke soka yeʼni. Ta june wa sjeʼa ke sutxita skʼujol sok wa xyaʼakan ja mulali, wegoxtani oj ajuk kumxuk (2 Cor. 2:​6-8).

12. a) ¿Bʼa jastik ekʼele tʼilan oj stalnay sbʼaje ja ansyanoʼiki? b) ¿Jas yuj mi oj pensaraʼuktik ke ja matik wa xkoye bʼa jujuntik tikʼe mulal nunka oj jejukyile ja syajulal skʼujol ja Jyoba? (Cha kʼela ja nota).

¹² Bʼa jujuntik ekʼele ja ansyanoʼiki tʼilani oj stalnay sbʼaje yajni ay maʼ oj yawe kumxuk ja bʼa kongregasyon, jun sjejel ta yixtalaʼan jun yal untik, ta waj apóstata ma skʼana oj xchʼay ja snupaneli. Ja  bʼa ekʼeleʼik jaw, ja ansyanoʼiki tʼilani oj ajyuke seguro ta meran sutxita skʼujol (Mal. 2:14; 2 Tim. 3:6). Ja yeʼnleʼi tʼilani oj stalnaye ja yal chejiki. Pe cha tʼilani oj kabʼtik stojol ke ja Jyoba ojni skʼul aseptar yajkʼachil ekʼele ja bʼa xchonabʼi bʼa chikan maʼ meran wa sutxi skʼujol sok wa xyaʼakan skʼulajel ja chaʼanik mulali. Ja yuj, ama ja ansyanoʼik tʼilan oj stalnay sbʼaje soka matik jel malo sjeʼunej ja smodoʼe ma chʼaykʼujolanele, mini oj kʼot spensaraʼuke ke nunka oj jejukyile ja syajulal skʼujol ja Jyoba ja matik wa xkoye ja bʼa tikʼe mulalik jaw (1 Ped. 2:10). c

¿JASA OJ SKʼULUK JA KONGREGASYONI?

13. ¿Jastal wa xkilatik ja maʼ wa xkʼulaji censurar, sok ja maʼ wa x-aji eluk ja bʼa kongregasyoni?

¹³ Jastalni kilatik ja bʼa artikulo ekʼta, ay ekʼele wa x-ekʼ jun anunsyo bʼa wajta censurado june. Ja bʼa ekʼele jaw, ojtoni jmojtaytik yujni wa xnaʼatik ke sutxita skʼujol sok yaʼatakan skʼulajel ja mulali (1 Tim. 5:20). Titoni ay ja bʼa kongregasyon sok wani skʼana ke oj tsatsankʼujolajuk yuja hermanoʼik bʼa skʼulajel ja bʼa leki (Heb. 10:​24, 25). Pe tukni lek yajni ay maʼ wa x-aji eluk ja bʼa kongregasyoni. Ja bʼa ekʼele jaw, wani xkatikan smojtajel sok mixani la waʼtik soka yeʼni (1 Cor. 5:11).

14. Yajel makunuk ja sconciencia chapubʼal yuja Biblia, ¿jasa oj stsaʼ skʼulajel kada jujune ja yaʼtijumik Dyos sbʼaja matik ajita eluk ja bʼa kongregasyoni? (Cha kʼela ja potoʼik).

¹⁴ ¿Wan maʼ stojolan bʼa yibʼanal ja it ke yajni ay maʼ wa x-aji eluk ja bʼa kongregasyoni mixa oj loktik ja bʼa reunioni ma mixa oj kʼultik saludar ja yajni wa xwaji? Miniʼa. Ama mixa oj mojtaytik. Pe ja yaʼtijumik Dyosi, ojni bʼobʼ yawe makunuk ja sconcienciaʼe chapubʼal yuja Biblia bʼa oj stsaʼe ta oj sloke ja bʼa reunión june maʼ ajita eluk ja bʼa kongregasyon, bʼobʼta jun spamilyaʼe ma jun yamigoʼe. Pe ¿jastal xa oj kiltik ta waj ja bʼa reunioni? Ja bʼa tyempo ekʼeljani, mini jkʼulunejtik  saludar. Pe ja bʼa ekʼele it, kada jujune ja yaʼtijumik Dyosi jaxani oj ya makunuk ja sconciencia chapubʼal yuja Biblia. Bʼobʼta jujuntik oj stsaʼe oj skʼuluke saludar ma oj yaweyi jun lekil sjulelal. Kechan ja jas mi oj kʼuluktiki, jani mi oj albʼukotik loʼilanel soka yeʼni ma oj mojtaytik.

15. ¿Bʼa matik wa staʼa tiʼal ja 2 Juan 9-11? (Cha kʼela ja recuadro « ¿Wan maʼ stajel tiʼal ja Juan sok ja Pablo bʼa junta tikʼe mulal?»).

¹⁵ Bʼobʼta oj jobʼ jbʼajtik: «Pe ¿jas yuj wa xyala ja Biblia ke ja maʼ wa skʼulan saludar ja kristyanoʼik it ‹wa x-och alkawetoʼil ja bʼa jastik mi lek wa skʼulani?›» (kʼuman ja 2 Juan 9-11). Ja bʼa bʼajtanik tekstoʼik wa xchiktes ke ja bersikuloʼik it jani wa staʼa tiʼal sbʼaja apóstataʼik sok ja matik wa xnikwaniye skʼulajel ja bʼa mi lekuki (Apoc. 2:20). Ja yuj, ta tikʼanxta ay maʼ wa xnikwani bʼa sjejel jastik bʼa apóstataʼik ma bʼa tuk mulalik, ja ansyanoʼiki mini oj xchape bʼa oj waj yulataye. Pe aytoni kiʼojtik ja smajlajel bʼa oj stukbʼes bʼaj. Malan x-ekʼ ja jaw, mini oj kʼuluktike saludar sok mini oj loktike ja bʼa reunioni.

LA JNOCHTIK JA SYAJULAL SKʼUJOL JA JYOBA

16, 17. a) ¿Jasa wa skʼana ja Jyoba oj skʼuluke ja mulanumiki? (Ezequiel 18:32). b) ¿Jastal oj skoltaye ja ansyanoʼik ja Jyoba?

¹⁶ ¿Jasa jnebʼunejtik ja bʼa joʼe artikuloʼik it? Ke ja Jyoba mini skʼana ay maʼ oj chʼaysnajel (kʼuman ja Ezequiel 18:32). Wani skʼana ke ja mulanumiki ayaʼe kulan soka yeʼni (2 Cor. 5:20). Ja yuj, ja bʼa tyempo ekʼeljani, bʼa jitsan ekʼele ja Jyoba skʼanunejyi ja matik yaʼunejekani ke asutxuk skʼujole sok akumxuke soka yeʼni. Sok juni chaʼan cholal yiʼoje ja ansyanoʼiki bʼa aʼtel soka Jyoba bʼa skoltajel ja matik koʼele bʼa jun chaʼan mulal bʼa oj sutxuk skʼujole (Rom. 2:4; 1 Cor. 3:9).

¹⁷ ¡Pensaraʼan janekʼto gustoʼil wa x-ajyi ja bʼa satkʼinali yajni wa sutxi skʼujol ja mulanumiki! Ja kala Tatik bʼa satkʼinal, ja Jyoba, jelni xgustoʼaxi yajni june ja bʼa yal xchejik chʼayel ayi wa xkumxi ja bʼa kongregasyoni. Mok katikan spensarajel ja bʼa syajulal skʼujol ja Jyoba, ja lekil skʼujol mi xbʼajixi, sok jachuk ja yajtanel kiʼojtik bʼa yeʼna ojni kʼiʼuk mas (Luc. 1:78).