1. Yajni june wa xkoʼ bʼa jun chaʼan mulal, ¿jasa ay ekʼele wa xbʼobʼ lajxuk?

 JA BʼA artikulo ekʼta, kilatik ke ja jekabʼanum Pablo yala yabʼ ja kongregasyon bʼa Corinto jastal oj yile jun winik bʼa koʼel bʼa jun chaʼan mulal. Yuja mito sutxi skʼujol, tʼilani yawe eluk ja bʼa kongregasyon. Pe jastalni wa xchiktes ja teksto bʼa yolomajel, ojni bʼobʼ koltajuk june bʼa oj sutxuk skʼujol (Rom. 2:4). ¿Jastal wa xya makunuk ja Jyoba ja ansyanoʼik bʼa oj skoltaye jun mulanum bʼa oj sutxuk skʼujol?

2, 3. ¿Jasa tʼilan oj kʼuluktik ta kabʼtik ke jun hermano koʼta bʼa jun chaʼan mulal, sok jas yuj?

² Lekbʼi xkabʼtik ke jun hermano koʼta bʼa jun chaʼan mulal, wa xkʼan kaltik, ay ja skʼulunej bʼa ojni bʼobʼ ajuk eluk ja bʼa kongregasyon. ¿Jasa tʼilan oj kʼuluktik ja bʼa ekʼele jaw? Pes bʼa oj bʼobʼ skoltaye ja ansyanoʼik, bʼajtan tʼilani oj snaʼe ja jas ekʼeli. Ja yuj, tʼilani oj tsatsankʼujoluktik bʼa oj waj sleʼ skoltajel soka ansyanoʼiki (Is. 1:18; Hech. 20:28; 1 Ped. 5:2).

³ Pe ¿jaxa ta mi skʼana oj yalyabʼ ja ansyanoʼik? Yuja wa xkʼanatik ke akoltajuk, keʼntikni oj waj kaltik yabʼye. Ja jaw juni modo bʼa sjejel yajtanel, yujni mi xkʼanatik oj chʼaytik ja kermanotik. Ta mi stukbʼes sbʼaj, ojni sjom ja jastal wa xtax soka Jyoba sok cha ojni bʼobʼ ya kuxbʼuk ja jastal wa xnaji sbʼaj ja kongregasyon. Ja yuj, ama wokol xkabʼtik, mini oj xiwkotik sok ojni waj kaltik yabʼ ja ansyanoʼik yuja wa xyajtaytik ja Jyoba sok ja kermanotiki (Sal. 27:14).

 ¿JASTAL WA SKOLTAYE JA ANSYANOʼIK JA MATIK KOʼELE BʼA JUN CHAʼAN MULAL?

4. ¿Jasa wa skʼanawe ja ansyanoʼik yajni wa stsomo sbʼaje soka maʼ koʼta bʼa jun chaʼan mulal?

⁴ Yajni jun hermano koʼta bʼa jun chaʼan mulal, ja tsome ansyanoʼik wa stsaʼa oxwane bʼa yeʼnle bʼa chapan aye bʼa a-skʼuluke jun comité a sok oj stsom sbʼaje soka mulanum. Ja yeʼnle tʼilan mi oj jelxuke, chʼin oj ya sbʼaje sok oj snaʼe ke ama sleʼawe modo bʼa oj sutxuk skʼujol mini oj skʼuluke obligar bʼa oj stukbʼes sbʼaj (Deut. 30:19). Wani xyabʼye stojol ke mi spetsaniluk ja mulanumik junxta lek oj yabʼye, jastalni skʼulan ja rey David (2 Sam. 12:13). Jujuntik wa stsaʼawe mi oj skise ja srason ja Jyoba (Gén. 4:​6-8). Ama jachuk, ja jas wa skʼanawe ja ansyanoʼik jani oj skʼuluke ja janekʼ oj bʼobʼyujile bʼa jachuk ja mulanum oj sutxuk skʼujol. ¿Jastik rasonik bʼa Biblia wa xtojiye ja comité bʼa ansyanoʼik yajni wa stsomo sbʼaje soka mulanumi?

5. ¿Jasa rason tʼilan oj julskʼujole ja ansyanoʼik yajni wa stsomo sbʼaje soka mulanumi? (2 Timoteo 2:​24-26; cha kʼela ja dibujo).

⁵ Ja ansyanoʼik wani xyilawe ja mulanum jastal jun yal chej chʼayel ay bʼa jel chaʼanyabʼal bʼa Jyoba (Luc. 15:​4, 6). Ja it wani xchiknaji ja bʼa smodoʼe, ja bʼa jastal wa skʼumane sok ja jastal wa xyilawe yajni wa stsomo sbʼaje soka mulanumi. Mini xjelxiye sok mini spensarane ja bʼa ekʼele jaw ke kechanta oj yaʼe sjobʼjelik sok oj chʼak snaʼe yibʼanal ja jas ekʼeli. Jaʼuktoma, wani sjeʼawe ja modoʼalik wa staʼa tiʼal ja 2 Timoteo 2:​24-26 (kʼuman). Ja bʼa ekʼele jaw wani sjeʼawe lekil smodoʼe, lekil skʼujole sok wa x-ajyiye laman bʼa oj kʼotuke bʼa skʼujol ja mulanumi.

6. ¿Jastal wa sleʼawe ja stojelal ja Jyoba ja ansyanoʼik bʼajtanto oj stsom sbʼaje soka mulanumi? (Romanos 2:4).

⁶ Ja ansyanoʼik wa sleʼawe ja stojelal ja Jyoba. Wani xyaʼa tʼabʼan skʼujole ja yaljelik it bʼa Pablo: «Ja Dyosi wan slejel modo bʼa oj sutxuka kʼujol yuja lekil skʼujoli» (kʼuman ja Romanos 2:4). Ja yuj, wani skʼujolane bʼa oj snoche ja lekil skʼujol ja Jyoba ja bʼa jastal wa xyila ja mulanumiki. Tʼilani oj julskʼujole ke kʼotele talnanumik, oj snoche ja tojelalik sok ja sjejel bʼa Kristo (Is. 11:​3, 4; Mat. 18:​18-20). Bʼajtanto oj stsom sbʼaje soka mulanumi, ja comité wa xyayi jun orasyon ja Jyoba bʼa skʼanjelyi ke akoltajuke bʼa asutxuk skʼujol ja mulanumi. Wa sleʼawe impormasyon ja bʼa Biblia sok ja bʼa juʼuntiki, wa skʼanaweyi ja Jyoba ke aʼajukyile snajel  bʼa oj yabʼye stojol ja mulanum sok ja jas ekʼeli. Wa xloʼilaniye bʼa oj snaʼe ja jas iji och ja mulanum bʼa oj sjeʼ ja modoʼal jaw, ja jastal wa spensaran sok ja jas skʼulani (Prov. 20:5).

7, 8. ¿Bʼa jastik modoʼik oj bʼobʼ snoche ja ansyanoʼik ja spasensya ja Jyoba yajni wa stsomo sbʼaje soka mulanumi?

⁷ Ja ansyanoʼik wa snochowe ja spasensya ja Jyoba. Wani xyaʼa tʼabʼan skʼujole jastal yila ja Jyoba ja mulanumik ja bʼa tyempo najate. Jun sjejel, ajyi spasensya bʼa ya spensaraʼuk ja Caín sok yala yabʼ ke lektoni oj cha bʼobʼ yile, pe ya julyi skʼujol ja jasa oj ekʼ sbʼaj ta mi stukbʼes sbʼaji (Gén. 4:​6, 7). Bʼa pilan ekʼele, bʼa oj stoj ja rey David, ja Jyoba sjeka ja yaluman Natán, sok ja yeʼn ya makunuk jun sjejel bʼa oj kʼot bʼa skʼujol (2 Sam. 12:​1-7). Chomajkil, ja Jyoba «tikʼanxta» sjeka ja yalumanik yuja skʼokowe abʼal ja chonabʼ Israel (Jer. 7:​24, 25). Mini smajlay ke bʼajtan oj sutxuk skʼujole ja yaʼtijumiki sok tsaʼan oj skoltay, yeʼnani bʼajtan skoltay sok skʼanayile ke asutxuk skʼujole yajni waneto koʼel mulali.

⁸ ¿Jasa wa skʼulane ja ansyanoʼik bʼa oj snoche ja sjejel bʼa Jyoba yajni wa skoltaye ja maʼ koʼta bʼa jun chaʼan mulal? Jastalni wa xchiktes ja 2 Timoteo 4:​2, jelni tʼilan oj sjeʼe «jitsan pasensya». Tʼilani tolabida oj skom sbʼaje sok lamanxta oj skʼumuke bʼa jachuk oj snike bʼa oj skʼuluk ja bʼa leki. Ta ja ansyanoʼik xtajkiye ma x-el sganaʼe, ja mulanumi ojni bʼobʼ yakan smaklajel ma asta mi oj skʼan oj sutxuk skʼujol.

9, 10. ¿Jas oj bʼobʼ skʼuluke ja ansyanoʼik bʼa oj skoltaye ja hermano bʼa koʼel mulal bʼa oj yabʼ stojol ja jas skʼuluneji?

⁹ Ja ansyanoʼik wa spaklaye ja jastik iji och ja hermano bʼa koʼel ja bʼa mulali. Jun sjejel, ¿aji maʼ chebʼuk takal takal yuja yaʼatakan skʼulajel estudiar ma xcholjel tikʼan? ¿Wanto maʼ xyayi tikʼan orasyon? ¿Yamakan ke ja kʼankʼunelik mi lekuk akʼiʼuk ja bʼa skʼujoli? ¿Yamakan ke ajomjuk yuja matik mi lek smojtajel sok ja bʼa jastik mi lek yajel ekʼ gustoʼili? ¿Wan maʼ xyabʼ stojol ja jastal ay xyabʼ ja Jyoba yuja bʼa jastik skʼulani?

¹⁰ Ja ansyanoʼik oj yaweyi sjobʼjelik ja hermano bʼa pensaraʼubʼal lek, pe mi oj skʼaneyi a-xchol jastik junuk bʼa mixa tʼilanuk. Yajni wa sjeʼaweyi lekil modoʼal, oj skoltaye bʼa oj xchol jaman lek sok bʼa oj yabʼ stojol ja jasa iji och bʼa koʼel mulal (Prov. 20:5). Chomajkil, jastalni skʼulan ja Natán soka David, ojni bʼobʼ yawe makunuk sjejelik bʼa oj skoltaye ja hermano bʼa oj yil ke mini lekuk ja jasa skʼulani. Bʼobʼta ja bʼajtan tsomjelal oj ajyukyujile soka yeʼn oj kʼe snaʼ malaya yuja jasa skʼulani ma asta oj sutxuk skʼujol.

11. ¿Jastal yila ja Jesús ja mulanumiki?

¹¹ Ja ansyanoʼik wa skʼujolane bʼa oj snoche ja Jesús. Jun sjejel, ja Jesús sjobʼoyi ja it ja Saulo bʼa Tarso: «Saulo, Saulo, ¿jas yuj waxa wiʼaj jpatiki?». Yayi ja tsamal sjobʼjel it bʼa oj yabʼ stojol ke mi lekuk ja jasa wan skʼulajeli (Hech. 9:​3-6). Sok jaxa bʼa Apocalipsis 2:​20, 21 staʼa tiʼal sbʼaja «Jezabel» sok yala: «Kayi tyempo bʼa oj sutxuk skʼujol».

12, 13. ¿Jas oj bʼobʼ skʼuluke ja ansyanoʼik bʼa oj yaweyi tyempo ja kristyano bʼa oj sutxuk skʼujol? (Cha kʼela ja potoʼik).

¹² Jastalni ja Jesús, ja ansyanoʼik mini wegoxta wa spensarane ke ja kristyano mi skʼana oj sutxuk skʼujol. Jujuntik wani sutxi skʼujole ja bʼa sbʼajtanil tsomjelal wa x-ajyiyujile soka comité, pe jaxa tuk wani skʼanawe mas tyempo. Ja yuj, ja ansyanoʼik mini kechanukta jun ekʼele oj stsom sbʼaje soka mulanumi. Bʼobʼta tsaʼan ja bʼa  sbʼajtanil tsomjelal oj kan spensaraʼuk lek ja bʼa jas alubʼalyabʼ sok oj ya sbʼaj chʼin bʼa skʼanjelyi ja sperdon ja Jyoba bʼa jun orasyon (Sal. 32:5; 38:18). Bʼobʼta ja bʼa pilan tsomjelal stukbʼesta ja smodoʼi.

¹³ Bʼa oj skoltaye ja kristyano bʼa oj sutxuk skʼujol, ja ansyanoʼik tʼilani oj sjeʼe ke wa xyabʼye stojol sok lekil kʼujolal. Wani skʼanaweyi ja Jyoba ke aya koʼ slekilal ja janekʼto wane skʼujolajel, bʼa wani smajlaye ke ja kristyano a-snaʼ ja jas skʼuluneji sok asutxuk skʼujol (2 Tim. 2:​25, 26).

14. Yajni jun mulanum wa sutxi skʼujol, ¿machun meran koltani, sok jas yuj?

¹⁴ Ta jun mulanum wa sutxi skʼujol, ja it juni rason bʼa jel oj ya gustoʼaxukotik (Luc. 15:​7, 10). Pe ¿machun meran skoltay? ¿Ja maʼ ja ansyanoʼik? La juljkʼujoltik ke ja Pablo yala ke «bʼobʼta ja Dyos oj ya sutxuk skʼujole» ja mulanumiki (2 Tim. 2:25). Ja yuj, ja maʼ mero koltani bʼa stukbʼesel ja spensar sok ja smodo ja mulanumi mini jun kristyanoʼuk, jani ja Jyoba, bʼa wa skoltay ja yaʼtijum bʼa chʼayel ay bʼa oj tukbʼes sbʼaj. Ja wego, ja Pablo wa staʼa tiʼal jujuntik slekilal wa x-ilxi sbʼaja sutxel kʼujolal jaw: wani x-iji och ja mulanum bʼa oj yabʼ mas stojol ja smeranil, bʼa oj snaʼ kʼinal sok bʼa oj eluk ja bʼa strampaʼik ja Satanás (2 Tim. 2:26).

15. ¿Jastal oj snocheyi skoltajel ja ansyanoʼik ja mulanum bʼa sutxita skʼujoli?

¹⁵ Ta sutxita skʼujol jun kristyano, ja ansyanoʼiki mini oj yawekan yulatajel bʼa oj skoltaye yajel tsatsbʼuk ja skʼuʼajel yiʼoji, bʼa oj kuchyuj yajni wa x-aji ochuk probar yuja Satanás sok bʼa skʼulajel ja bʼa jas leki (Heb. 12:​12, 13). Ja ansyanoʼik mini maʼ oj yalweyabʼ ja jastik skʼulunej ja hermano it. Pe ¿jas ekʼele oj bʼobʼ yabʼ ja kongregasyoni?

«TOJO BʼA STIʼ SAT JA TUK»

16. ¿Machun kʼotel «ja tuk» ja staʼa tiʼal ja Pablo ja bʼa 1 Timoteo 5:20?

¹⁶ (Kʼuman ja 1 Timoteo 5:20). Ja Pablo yala yabʼ ja Timoteo, bʼa cha kʼot  ansyano, ke a-stoj ja mulanumik «bʼa stiʼ sat ja tuk». ¿Machun kʼotele? Mini jaʼuk yibʼanal ja kongregasyoni, jani ja jujuntik hermanoʼik bʼa wanxa snaʼawe ja jas skʼulan ja mulanumi, sea yeʼn yilawe ma yuj yeʼn yala. Bʼa ojni ya skuidadoʼe, ja ansyanoʼik ojni yalweyabʼ ja hermanoʼik it ke yilaweta ja jas ekʼeli sok tojita ja mulanumi.

17. Ta ja mulal wa xkʼot snaʼ ja kongregasyon ma bʼobʼta wa xkʼot naxuk, ¿jas anunsyo oj ekʼuk, sok jas yuj?

¹⁷ Bʼa jujuntik ekʼele, ja mulali wani xkʼot snaʼ ja kongregasyon ma bʼobʼta wa xkʼot naxuk. Anto «ja tuk» jani kʼotel yibʼanal ja kongregasyoni. Ja yuj, jun ansyano oj ya ekʼ jun anunsyo ja bʼa kongregasyon ke ja hermano ma ja hermana wajta censurado. ¿Jas yuj? Ja Pablo xcholo: «Bʼa jachuk oj xiwuke ja tuk bʼa mi oj skʼuluke» sok bʼa mi oj cha koʼuke bʼa jun chaʼan mulal.

18. ¿Jasa wa skʼulane ja ansyanoʼik yajni june bʼa mito ay skʼujol wa xkoʼ bʼa jun chaʼan mulal? (Cha kʼela ja poto).

¹⁸ ¿Jasa oj kʼulajukyi jun yaʼtijum Dyos bʼa yiʼunejxa jaʼ bʼa koʼ bʼa jun chaʼan mulal pe mito ayiʼoj 18 jabʼil? Ja tsome ansyano ojni stsaʼ chawane bʼa yeʼnle bʼa oj stsom sbʼaje soka yeʼni sok ja snantat bʼa Testigoʼe. b Ja ansyanoʼik it ojni yile ja jastik skʼuluneje ja nantatali bʼa skoltajel ja skereme bʼa stukbʼesel sbʼaj sok bʼa oj sutxuk skʼujol. Ta ja maʼ mito ay skʼujoli ayiʼoj jun lekil smodo sok wan skisjel ja koltanel wan ajelyi yuja snantati, ja chabʼ ansyanoʼik wani xbʼobʼ stsaʼe ke mini yajnaluk oj kʼulaxuk jun comité bʼa oj stsom sbʼaje soka yeʼnleʼi. Pes yujni ja Dyosi jani yaʼunejyi  ja cholal ja nantatalik bʼa oj stoje sok yajalkʼujol ja yuntikileʼi (Deut. 6:​6, 7; Prov. 6:20; 22:6; Efes. 6:​2-4). Tsaʼan, ja ansyanoʼik ojni staʼ loʼil jujuntik ekʼele ja snantati bʼa oj yile ta wanto koltajel. Pe ¿jaxa ta ja maʼ mito ay skʼujol bʼa yiʼunejxa jaʼ mi sutxi skʼujol sok mi skʼana oj stukbʼes sbʼaj? Ja bʼa ekʼele jaw, jun comité bʼa ansyanoʼik oj stsom sbʼaje soka yeʼn sok ja snantat bʼa Testigoʼe.

«JA JYOBA YAJXTA WA X-ILWANI SOK JEL SYAJULAL SKʼUJOL»

19. ¿Jastal wa snochowe ja sjejel bʼa Jyoba ja ansyanoʼik yajni wa xyilawe ja matik koʼele bʼa jun chaʼan mulal?

¹⁹ Ja ansyanoʼik wane koltanel ja bʼa comité wani skʼanawe yajel ajyuk sak ja kongregasyoni yujni jun cholal akʼubʼalyile yuja Jyoba (1 Cor. 5:7). Pe cha wani skʼanawe oj skʼuluke ja janekʼ wa xbʼobʼyujile bʼa skoltajel ja yaʼtijum Dyos bʼa koʼel mulal bʼa asutxuk skʼujol, sok ja yuj mini xchʼayujile ja smajlajel bʼa oj stukbʼes sbʼaj. Jachuk wa snochowe ja Jyoba, bʼa «yajxta wa x-ilwani sok jel syajulal skʼujol» (Sant. 5:11). La kiltik ja tsamalik yaljelik stsʼijbʼan ja jekabʼanum Juan yajni awelxa: «Kala kuntikil, wa stsʼijbʼanawilex ja jastik it bʼa moka leʼa mulex. Pe ta ay maʼ sleʼa smul, ayni jun jkoltanumtik tey bʼa stsʼeʼel ja Tatali: ja Jesukristo, bʼa kʼotel june maʼ toj» (1 Juan 2:1).

20. ¿Jasa oj kiltik ja bʼa tsaʼanxta artikulo jakumi?

²⁰ Tristeni yabʼjel, ay ekʼele ja yaʼtijum Dyos bʼa koʼel bʼa jun chaʼan mulal mini skʼana oj sutxuk skʼujol. Ta ekʼ ja jaw, jelni tʼilan yajel eluk ja bʼa kongregasyoni. ¿Jastal wa xyilawe ja ansyanoʼik ja bʼa ekʼeleʼik jaw? Ti oj kiltik ja bʼa tsaʼanxta artikulo jakumi.