Ja jekabʼanum Pablo yala yabʼ ja snochumanik Kristo bʼa Tesalónica: «Ta ay maʼ mi skʼuʼan ja jas wa xkalatikon ja bʼa karta it, ja weʼnlexi tʼilani oja chiktesex» (2 Tes. 3:14). Ja bʼajtanto wa x-alxi ke ja tojelal it jani wa xkʼot sbʼaj ja ansyanoʼiki. Ta ay maʼ mi skʼana oj skis ja rasonik bʼa Biblia ama ajitayi rason jitsan ekʼele, ja ansyanoʼik ojni bʼobʼ yawe ekʼ jun loʼil bʼa yajel julskʼujol ja kongregasyon. Sok man jutsʼin jaw, ja hermanoʼik wa xyawekan smojtajel ja kristyano jaw, kechan miyuk ja bʼa reunioni sok ja bʼa xcholjeli.

Pe ja wego, wa xkabʼtik stojol ke ja rason yaʼa ja Pablo kʼotelni jun jasunuk bʼa yeʼnxa oj stsaʼ kada jujune ja hermanoʼik bʼa jujuntik ekʼele. Ja yuj, mixa yajnaluk ke ja ansyanoʼik oj yawe ekʼ jun loʼil bʼa oj yawe julskʼujol ja kongregasyoni. ¿Jas yuj tukbʼi ja it? La jpaklaytik ja jas yala bʼajtanto ja jekabʼanumi.

Ja Pablo yala ke ja bʼa kongregasyon ay hermanoʼik bʼa «mi tojuk ayuke». Mini skisawe ja rasonik wa xtax ja bʼa Yabʼal ja Dyos bʼa yeʼn yaʼunejyileʼi. Jun sjejel, bʼa jun ulatanel skʼulan ja bʼajtanto yala yabʼye: «Ta ay maʼ mi skʼana oj aʼtijuk, cha mokni waʼuk». Ama jachuk, jujuntik mini skʼanawe oj aʼtijuke bʼa oj smakʼlay sbʼaje, ama wani xbʼobʼ skʼuluke. Cha wani xchʼika sbʼaje ja bʼa sakʼanile ja tuki. ¿Jastal oj yile ja hermanoʼik ja matik mi tojuk ayuke? (2 Tes. 3:​6, 10-12).

Ja Pablo yala: «Tʼilani oja chiktesex». Ja bʼa yaljel griego wani xya jpensaraʼuktik bʼa xchiktesel ja kristyano jaw sok oj talnay jbʼajtik ja bʼa jas mi lek wa skʼulani. Ja tojelal it jani wan kʼotel sbʼaj yibʼanal ja kongregasyon, bʼa mi kechanukta ja ansyanoʼiki (2 Tes. 1:1; 3:6). Ja yuj, ta june ja bʼa yaʼtijumik Dyos xyaʼa sbʼaj kuenta ke jun pilan hermano mixa wanuk skisjel jun rason ja bʼa Yabʼal ja Dyosi, yeʼnxani mismo oj stsaʼ bʼa oj ‹yakan yamigoʼajel›.

¿Wan maʼ stojolan ja it ke jach oj yile jastal june maʼ elel ja bʼa kongregasyoni? Miyuk, yujni ja Pablo yala: «Moka waʼexkan yajelyi rason jastal juna wermanoʼex». Ja yuj, bʼa kada jujune ja yaʼtijumik Dyos ojtoni smojtaye ja bʼa reunionik sok ja bʼa xcholjeli, pe mixani oj yawe ekʼ tyempo soka yeʼn bʼa jastik yajel ekʼ gustoʼil ma bʼa kombibyoʼik. Sok ja Pablo xcholo jas yuj: «Bʼa jachuk oj kʼixwuk». Yajelkan smojtajel ja yaʼtijum Dyos bʼa mi tojuk ayuki ojni bʼobʼ kʼixwuk yuja smodo sok oj stukbʼes sbʼaj (2 Tes. 3:​14, 15).

¿Jaxa keʼntiki? ¿Jastal oj katik makunuk ja rason it ja bʼa jtyempotiki? Bʼajtan, tʼilani oj kiltik ke ja kristyano jaw meran ‹mi tojuk ay›, jastalni yala ja Pablo. Ja yeʼn mi jaʼuk wanuk stajel tiʼal ja hermanoʼik bʼa tuktukil ja jas wa stsaʼawe bʼa ti chʼikan soka jconcienciatik ma bʼa yajel ekʼ gustoʼil. Sok cha mini jaʼuk wanuk yaljel sbʼaja matik syajbʼesotik. Ja Pablo, jani wan yaljel sbʼaja hermanoʼik bʼa akʼubʼalyile rasonik bʼa Biblia pe stsaʼuneje gana mi oj skʼuʼuke.

Ta wa xkaʼa jbʼajtik kuenta ke jun hermano wan skʼokjel jun rason bʼa Biblia, a ojni bʼobʼ jtsatik kada jujune bʼa mixa oj mojtaytik bʼa yajel ekʼ gustoʼil ma ja bʼa kombibyoʼik. Yuja keʼnxa oj tsatik, mini oj kaltik yabʼ ja matik mi kʼotele jpamilyatik. Sok ojtoni jmojtaytik ja kristyano jaw ja bʼa reunionik sok ja bʼa xcholjeli. Yajni stojbʼes ja smodo, ojxani cha kiltik jastal ajyi.