¿Akʼumanta maʼ lek ja tsaʼanikxta número bʼa Ja Juʼun Cholumani? Ila ta oj bʼobʼa jakʼ ja sjobʼjelik it:

¿Jasa ti chʼikan yajel ajkʼachbʼuk ja jastal wa xpensarantik? (Rom. 12:2).

Mini malanukta skʼulajel jujuntik jastik junuk lek. Tʼilani oj paklaytik jastal wa xtax ja jkʼujoltik sok stukbʼesel ja bʼa ay stʼilanil. Ta jach wa xkʼulantik ja jsakʼaniltik oj kʼot yiʼ ja jastik yaʼunej kujlajuk ja Jyoba (w23.01, slam 8 sok 9).

¿Jastal mi oj bʼobʼ jelxukotik soka jastik wan ekʼeli?

Wani xkilatik stʼilanil ja jas wan ekʼel ja bʼa luʼumkʼinali sok ja jastal wan kʼotel smeranil ja jastik alubʼalkan bʼa Biblia. Pe mini xkʼana ja oj kaltik ja jas wa xpensarantik bʼa oj bʼobʼ spil ja kongregasyon, jani oj kaltik ja bʼa jas xcholunej ja xchonabʼ ja Jyoba (1 Cor. 1:10) (w23.02, slam 16).

¿Jasa stukil ja jastal yiʼaj jaʼ ja Jesús sok ja bʼa snochumani?

Ja stukil ja bʼa keʼntiki, ja Jesús mini yayi ja sakʼanil ja Jyoba yujni ti pojki bʼa jun chonabʼ ke yaʼunejxayi ja sakʼanil ja Dyos. Mini ayiʼoj mulal sok mini sutxi skʼujol bʼa jun mulal (w23.03, slam 5).

¿Jas oj bʼobʼ jkʼuluktik bʼa jachuk mas hermanoʼik oj yaʼe skomentarioʼe ja bʼa reunionik?

La ka jkomentariotik bʼa mi jel najatuk, bʼa jachuk mas hermanoʼik oj ya skomentarioʼe. Cha mok jel jas jcholtik bʼa jachuk oj bʼobʼ xchole tuk jastik ja tuk (w23.04, slam 23).

¿Jasunkiluk ja «Bʼej bʼa ajyel Sak» ke staʼa tiʼal ja Isaías 35:8?

Ja bʼa judíoʼik, jaʼa bʼej bʼa kechanta wa senyaʼan ke wa x-el ja bʼa Babilonia sok wa xkʼot man bʼa Israel. ¿Sok jaxa bʼa jtyempotiki? Jitsan jabʼil bʼajtanxa lek ja bʼa 1919, kʼe chapxuk ja bʼeji, tey ja sjejel sbʼaja skʼulajel imprimir sok ja sutjel ja Biblia. Ja bʼa «Bʼej bʼa ajyel Sak» wa xyiʼaj och ja xchonabʼ ja Dyos bʼa tsamal lugar kechanta wa senyaʼan ja wego sok ja bʼa tyempo jakumi oj yabʼye stsamalil ja slekilal oj yijan ja Gobyerno bʼa satkʼinali (w23.05, slam 15 man 19).

¿Bʼa jas chabʼ ixuk wa staʼa tiʼal ja Proverbios kapitulo 9?

Ja bʼa Proverbios wa staʼa tiʼal ja bʼa «ixuk sonsa» sok wa xyala ke skʼulajel aseptar ja lokwanel wa xyaʼa wa x-ikʼwani bʼa ‹Kʼeʼen›. Pe cha wa staʼa tiʼal bʼa jun ixuk ke wa senyaʼan «ja meran biboʼil» sok wa xyala ke skʼulajel aseptar ja slokjelal wa x-ikʼwani ja bʼa «bʼej bʼa yabʼjel stojol» sok ja bʼa sakʼanil (Prov. 9:​1, 6, 13, 18) (w23.06, slam 22 man 24).

¿Jastal sjeʼa ja Jyoba ke chʼin yaʼa sbʼaj sok och rason ja yajni ay jas skʼana ja Lot?

Ja Jyoba yala yabʼ ja Lot ke awaj bʼa witsaltik. Yajni ja Lot spatayi skʼujol bʼa a-skʼan ke ja yeʼn soka spamilya ti oj wajuke bʼa Zóar, ja Dyosi skʼulan aseptar (w23.07, slam 21).

Ta jawa tatam wa skʼela ixuk winik bʼasane, ¿jas oj bʼobʼa kʼuluk?

Tʼilani oj julukakʼujol ke mini weʼna mul. Lekni ja oj wajukakʼujol ja bʼa jastal waxa wilabʼajsok ja Jyoba, sok pensaraʼan loʼilik bʼa Biblia bʼa ixuke bʼa chamkʼujol ajyiye pe aji kulan skʼujole yuja Jyoba. Ojni bʼobʼa koltay jawa tatam bʼa ay jas skʼulajel bʼa mixa oj cha skʼele (w23.08, slam 14 man 17).

¿Jastal wa skoltayotik ja biboʼil bʼa oj ajyukotik manso ja yajni ay maʼ wa xkʼe kʼumal soka skʼuʼajel kiʼojtik?

Ja sjobʼjel oj yaʼi ojni bʼobʼ skoltayotik snajel ja jas wa spensaran sok ja jas wa xcham skʼujol. Ja jaw oj skoltayotik sjakʼjel bʼa jun modo manso (w23.09, slam 17).

¿Jas wa xnebʼatik ja jas skʼulan ja María bʼa oj ajyuk yip?

Yajni yabʼ ke yeʼn oj kʼot jastal snan ja Mesías, sleʼa skoltajel bʼa tuk. Ja Gabriel sok ja Elizabet stsatsankʼujolane soka Yabʼal ja Dyos. Ja keʼntiki ojni cha bʼobʼ stsatsankʼujolukotik ja kermanotiki (w23.10, slam 15).

¿Bʼa jastik modo ja Jyoba oj bʼobʼ sjakʼ ja korasyontiki?

Wa skʼapa ke oj smaklay ja korasyontiki sok jani wa xyila ja bʼa jas wa skʼana ja yajni wa sjakʼakitiki (Jer. 29:12). Wani xbʼobʼ sjakʼ ja junxta orasyon bʼa tuktukil modo, pe tolabida oj skoltayotik (w23.11, slam 21 sok 22).

Ta ja Romanos 5:2 wanxa staʼa tiʼal ja bʼa smajlajeli, ¿jas yuj staʼato tiʼal ja bʼa bersikulo 4?

Man yajni jun kristyano wa smaklay ja lekil rasoniki, bʼobʼta ayiʼoj ja smajlajel oj ajyuk sakʼan ja bʼa tsamal Lugar ja bʼa Luʼumi. Pe yajni wa x-ekʼ sbʼaje wokolik, wa xkuchyujile sok snajel ke ja Jyoba lek wa x-iljiye, ja smajlajel yiʼoje mas wa stsatsbʼi sok mas wa xkʼot yabʼye yeʼnani sbʼaje (w23.12, slam 12 sok 13).