Ja jekabʼanum Pablo stsʼijbʼanyi ja yaljelik it ja Timoteo bʼa cha kʼotel ansyano jastal yeʼn: «Ja keʼn wa xkawi mandar bʼa stiʼ sat ja Dyos, bʼa Kristo Jesús sok ja bʼa anjelik tsaʼubʼaleʼi bʼa oja noch ja tojelalik it jach mi oj tsawanan sok mi maʼ menos oja wile» (1 Tim. 5:21). ¿Matik ja «anjelik tsaʼubʼaleʼi»?

Bʼajtan, la jchiktestik ja matik mi kʼotelukeʼi. Chikani lek ke ja Pablo mi ja wanuk stajel tiʼal ja 144,000. Yajni stsʼijbʼanyi ja Timoteo, ja sakʼwelal sbʼaja matik tsaʼubʼale oj wajuke bʼa satkʼinal mitoni stuluyi. Ja jekabʼanumiki sok ja matik tuk tsaʼubʼale oj wajuke bʼa satkʼinali mitoni xpaxye ikʼ ason. Ja yuj mini yeʼn kʼoteluke ja «anjelik tsaʼubʼaleʼi» (1 Cor. 15:​50-54; 1 Tes. 4:​13-17; 1 Juan 3:2).

Cha mini yeʼn kʼoteluke ja anjelik bʼa wajye kʼoka abʼal ja bʼa niwan Bʼutʼ Jaʼi. Ja anjelik jaw ochye bʼa sparte Satanás, paxye pukujik sok skontraʼik ja Jesús (Gén. 6:2; Luc. 8:​30, 31; 2 Ped. 2:4). Ja bʼa tyempo jakumi, ja Jesús oj slut bʼa 1,000 jabʼil bʼa jun kʼeʼen sok tsaʼan oj xchʼay el snajel lajan soka Satanás (Jud. 6; Apoc. 20:​1-3, 10).

Yuja bʼa 1 Timoteo 5:21 wa xtax tiʼal ‹ja anjelik tsaʼubʼale› it bʼa teye lajan soka Dyos sok ja Kristo Jesús, tʼilani kʼotele tojik anjelik bʼa teye bʼa satkʼinal bʼa wane aʼtel lajan soka yeʼnleʼi.

Ay jitsan tojik anjelik (Heb. 12:​22, 23). Mini ay stojol spensarajel ke kada cholal wa x-ajiyile ja anjelik yuja Jyoba lajan wa skʼulane (Apoc. 14:​17, 18). La juljkʼujoltik ke bʼa jun ekʼele ajiyi ja cholal jun anjel bʼa oj xchʼaysnajel 185,000 soldadoʼik bʼa Asiria (2 Rey. 19:35). Jastalni yala ja Jesús, lajansok kʼotel jun tsome anjelik ja matik «oj yawe eluk ja bʼa sGobyerno yibʼanal ja jastik wa xyaʼa lok okili sok ja matik wa skʼulane bʼa mi lekuk» (Mat. 13:​39-41). Bʼobʼta pilan ja matik «oj stsom-e ja matik tsaʼubʼale» oj wajuke bʼa satkʼinali (Mat. 24:31). Sok tuk anjelik wa x-ajiyile ja tojelal bʼa oj stalnayotike jastalni wa xyala ja Salmo 91:11 (Mat. 18:10; cha kʼela ja Mateo 4:11 sok Lucas 22:43).

Jastalni wa xkilatik, ja «anjelik tsaʼubʼaleʼi» bʼa wa staʼa tiʼal ja 1 Timoteo 5:21 bʼobʼta kʼotele jujuntik anjelik bʼa wane skʼulajel jun aʼtel bʼa ti chʼikan soka kongregasyoniki. Ja jas wa xyala ja bʼa kapitulo it, ja Pablo jani wan stajel tiʼal sbʼaja ansyanoʼik sok wan yajelyi rason ja hermanoʼik bʼa a-skise. Jaxa ansyanoʼik tʼilani oj skʼuluke ja cholalik yiʼoje ‹jach mi oj tsawanuke sok mi maʼ menos oj yile› sok mi wegoxta stsajel skʼulajel jun jasunuk. ¿Jas yuj? Bʼa aji ekʼyi yuja Dyosi, ja Pablo yaʼa jun rason jel tʼilan yajni yala ke ja yeʼnle wane yaʼteltajel ja hermanoʼik «bʼa stiʼ sat ja Dyos, bʼa Kristo Jesús sok ja bʼa anjelik tsaʼubʼaleʼi», bʼa tuk yaljel, ja Jyoba, ja Jesús sok ja «anjelik tsaʼubʼaleʼi» wane yiljel jastal wa stalnaye ja kongregasyon ja ansyanoʼiki. Ja yuj, chikani lek ke ay anjelik bʼa wa skʼulane aʼtelik bʼa ti chʼikan soka kongregasyoni, jastal stalnajel ja yaʼtijumik ja Dyos, yiljel ja xcholjeli sok yaljel yabʼ ja Jyoba ja jas wa xyilawe (Mat. 18:10; Apoc. 14:6).