1. ¿Jas yuj ja Conmemoración jaʼa kʼakʼu mas jel tʼilan ja bʼa jabʼili? (Lucas 22:​19, 20).

 JA BʼA yaʼtijumik ja Jyoba, ja xchamelal ja Jesús jani ja kʼakʼu mas jel tʼilan ja bʼa jabʼili. Kechanta jaʼa kʼin it yalakan oj kʼulaxuk ja Jesús (kʼuman ja Lucas 22:​19, 20). ¡Jelxani xkʼanatik oj eljul ja kʼakʼu jaw jel chaʼanyabʼalil! ¿Jas yuj? La kiltik jujuntik rason.

2. ¿Jas jujuntik rason yuja wanotik skʼanjel aʼeljul ja Conmemoración?

² Ja Conmemoración wa skoltayotik bʼa spensarajel janekʼto chaʼanyabʼalil ja slokʼoli. Wa xya juljkʼujoltik jujuntik modoʼik bʼa jastal oj jetik ke wa xkaʼatik tsʼakatal ja xchamelal ja Jesús (2 Cor. 5:​14, 15). Chomajkil, wani xyaʼakan bʼa oj ajyukotik soka kermanotik sok stsatsankʼujolajel jbʼajtik (Rom. 1:12). Spetsanil ja jabʼiliki, jitsan ja matik chebʼele wa xjakye ja bʼa Conmemoración, sok jujuntik bʼa yeʼnle wa stsatsankʼujolan sbʼaje bʼa oj kumxuke soka Jyoba yuja yajtanel wa sjeʼawe ja hermanoʼik ja tiw. Chomajkil, jitsan kristyano chamtoni wa xyilawe ja jas wa smaklaye sok xyilawe, sok wa stsaʼawe skʼulajel estudiar ja Biblia. Mini ay duda ke spetsanil ja it wani xyaʼakan ke ja Conmemoración akʼot jun ekʼele jel chaʼanyabʼal bʼa keʼntik.

3. ¿Jastal wa xyaʼakan ja Conmemoración bʼa yiljel ja jastal tsoman ay ja xchonabʼ ja Jyoba? (Cha kʼela ja poto).

³ Cha wani xkʼanatik aʼeljul ja kʼakʼu jaw yujni jun modo bʼa yiljel ja jastal tsoman ay ja xchonabʼil ja Jyoba. Bʼa spetsanil  ja luʼumi, ja testigoʼik bʼa Jyoba wa stsomo sbʼaje ja yajni wan smukjel sbʼaj ja kʼaʼuji bʼa kada lugar. Jpetsaniltik wa xmaklaytik jun discurso bʼa wa xchiktes ja stʼilanil ja slokʼoli, wa stsʼebʼantaytik chabʼ tsʼebʼoj, wa xkatik ekʼuk ja pan sok ja vino, sok wa xkalatik sok spetsanil jkʼujoltik «amén» bʼa chane orasyonik wa xkʼulaxi. Bʼa junukta 24 ora, skʼulanetani junxta lajan ja kongregasyoniki. ¿Wan maʼ x-ekʼ bʼa jpensartik ja gustoʼil wa xyabʼ ja Jyoba sok ja Jesús yajni wa xyila jpetsaniltik wa xtoyotik bʼa yibʼanal ja bʼa luʼumi?

4. ¿Jas oj kiltik ja bʼa artikulo it?

⁴ Ja bʼa artikulo it oj katikyi sjakʼjel ja sjobʼjelik it: ¿jastal oj bʼobʼ jchaptik ja jkʼujoltik ja bʼa Conmemoración?, ¿jastal oj bʼobʼ jkoltaytik ja tuk bʼa oj yawe el slekilal? sok ¿jastal oj bʼobʼ jkoltaytik ja matik chebʼele? Spaklajel ja jastik it oj skoltayotik bʼa ajyel chapan ja bʼa ekʼele jaw jel tʼilan.

¿JASTAL OJ BʼOBʼ JCHAPTIK JA JKʼUJOLTIK JA BʼA CONMEMORACIÓN?

5. a) ¿Jas yuj tʼilan oj pensaraʼuktik ja janekʼto chaʼanyabʼal ja bʼa slokʼol? (Salmos 49:​7, 8). b) Ala ja jasa nebʼa ja bʼa bideo ¿Jas yuj cham ja Jesús?

⁵ June ja bʼa modoʼal mas tʼilan bʼa xchapjel ja jkʼujoltik ja bʼa Conmemoración jani spensarajel ja janekʼto chaʼanyabʼalil ja majtanal yaʼa ja Jesukristo. Ja jtuchʼiltiki mini oj bʼobʼ elkotik libre ja bʼa mulal sok ja bʼa chamelal (kʼuman ja Salmo 49:​7, 8; cha kʼela ja bideo ¿Jas yuj cham ja Jesús?). a Ja yuj ja Jyoba yaʼa ja Yunin jel skʼana bʼa oj cham yuj keʼntik, sok xchawanile jelni chaʼan ja stsʼakol stupuwe (Rom. 6:23). Yajni mas wa xpensaraʼantik ja bʼa jas skʼulane ja Jyoba sok ja Jesús yuj keʼntik, masni chaʼanyabʼal oj kiltik ja slokʼoli. Ja yuj, la kiltik jujuntik jasunuk puesto ajyiye skʼulajel ja Jyoba sok ja Jesús yuj keʼntik. Pe bʼajtan, oj tatik tiʼal jasa ti ajyi chʼikan ja bʼa slokʼol.

6. ¿Jasa ti ajyi chʼikan ja bʼa slokʼol?

⁶ Jun slokʼol jani ja stsʼakol wa xtupxi bʼa cha smanjel ma stajel yajkʼachil ekʼele jun jasunuk. Ja bʼajtan winiki, ja Adán, mini mulanumuk ajyi. Pe yajni koʼ mulal, xchʼaya ja ajyel sakʼan bʼa tolabida sok cha jachni bʼa yibʼanal ja yuntikili. Bʼa cha smanjel ja jas xchʼaya ja Adán, ja Jesús skʼapa jastal majtanal ja sakʼanil bʼa mey yiʼoj mulal. Ja janekʼ tyempo ajyi sakʼan ja bʼa Luʼumi, ja Jesús «mini jun smul sleʼa sok mini el abʼal ja bʼa stiʼi» (1 Ped. 2:22). Yajni chami mini ayiʼoj mulal, ja yuj ja sakʼanili junxtani soka bʼa jastal chʼayuj ja Adán (1 Cor. 15:45; 1 Tim. 2:6).

7. Ala jujuntik ja pruebaʼik stʼaspun ja Jesús.

⁷ Yajni ti ajyi bʼa Luʼum, ja Jesús skʼuʼanyi spetsanil ja sTat bʼa satkʼinal anima ekʼ sbʼaj jitsan pruebaʼik. Man xchʼinil, tʼilani skʼulan aseptar ja smandar ja snantat bʼa mulanume ama ja yeʼn mey yiʼoj mulal (Luc. 2:51). Yajni wanxa solteroʼaxel, tʼilani kuchyuj ja stʼenwanel ja tuk bʼa wa skʼanawe askʼok ja smandar ja snantati ma oj yakan ajyel toj soka Jyoba. Sok yajni niwanxa, tʼilani cha stʼaspun ja Satanás bʼa aji och probar ta oj bʼobʼ ajyuksok toj meran ja Jyoba (Mat. 4:​1-11). Ja Satanás puestoni ay bʼa oj ya koʼ mulal ja Jesús bʼa mi oj bʼobʼ stup ja slokʼoli.

8. ¿Jas tuk pruebaʼik kuchyuj ja Jesús?

⁸ Ja bʼa yaʼtel bʼa xcholjeli, ja Jesús cha kuchyuj tuk pruebaʼik. Jun sjejel, iji spatik yuja skontraʼiki sok alji ke oj bʼobʼ miljuk (Luc. 4:​28, 29; 13:31). Cha tʼilani kuchyuj  ja jastik mi lek wa skʼulan ja snebʼumaniki (Mar. 9:​33, 34). Ja yajni iji bʼa stiʼ sat ja maʼ ay xcholi, alji ke tʼilan oj chamuk, jel ixtalaji sok kʼulaji burlar. Tsaʼan smilawe jastal june maʼ jel smul sok jelni yiʼaj wokol (Heb. 12:​1-3). Sok yajni ojxta chamuk, ja Jyoba ya elyi ja stalnaneli, ja yuj tʼilani stekʼa ja bʼa xchʼakulabʼil ja prueba it jach stuchʼil (Mat. 27:46). b

9. ¿Jastal wa xkabʼtik spensarajel ja jastik skʼulan ja Jesús? (1 Pedro 1:8).

⁹ Chikani lek ja Jesús jelni chaʼan stupunej bʼa oj ya elkotik libre. Yajni wa xpensaraʼantik bʼa spetsanil ja jastik jun puesto ajyi skʼulajel ja Jesús yuj keʼntik jelni wa xkʼot jyajtaytik (kʼuman ja 1 Pedro 1:8).

10. ¿Jasa puesto ajyi yajel ja Jyoba bʼa oj ya elkotik libre?

¹⁰ ¿Jasa puesto ajyi oj yaʼ ja Jyoba bʼa jachuk ja Jesús oj stup ja jas chʼayeli? Jastalni wa xnaʼatik, mini maʼ oj bʼobʼ slaj ja jastal wa xyila sbʼaj ja Jyoba soka Yunini (Prov. 8:30). Ja yuj la jpensaraʼuktik jastal yabʼ ja Jyoba yajni yila ja Jesús wan ekʼel sbʼaj jitsan pruebaʼik ja bʼa Luʼumi. Seguro ke jelni yaj yabʼi yajni yila jastal ixtalaji, mi kisji sok ja jel aji yiʼ wokol ja Yunini.

11. ¿Jas sjejel wa skoltayotik yabʼjel stojol ja jastal yabʼ ja Jyoba yajni milji ja Jesús?

¹¹ Ja matik chamelyujile jun yunine wani snaʼawe ja janekʼto syajal wa xyaʼakan. Anima ay kiʼojtik lek skʼuʼajel ja bʼa sakʼwelali, ja jaw mini wa xchʼaya ja syajal wa xkabʼtik ja yajni wa xcham june maʼ jel xkʼanatik. Ja sjejel it wa skoltayotik yabʼjel stojol jastal yabʼ ja Jyoba ja bʼa kʼakʼu jaw ja bʼa jabʼil 33, yajni yila jastal yiʼaj wokol sok cham ja Yunin jel skʼana (Mat. 3:17). c

12. ¿Jastal oj bʼobʼ katik el slekilal ja tyempo wanto skʼulan palta ja bʼa Conmemoración?

¹² ¿Jas mi xwa makunuk ja janekʼto tyempo wa skʼana ja bʼa Conmemoración bʼa oja kʼul estudiar sbʼaja slokʼol ja bʼa westudio jach atuchʼil ma ja bʼa tsomjelal bʼa pamilya? Amakunuk ja Juʼun bʼa koltanel spaklajel ta ayxa ja bʼa wa kʼumali ma pilan juʼunik bʼa oja naʼ mas sbʼaja it. d Chomajkil, nocho ja bʼa skʼumajel ja Biblia ja bʼa Conmemoración bʼa wa xyiʼajan Ja Sakʼaniltik soka Kaʼteltik bʼa Dyos: Juʼun bʼa spaklajel. Mok chʼayuka kʼujol yiljel ja  tsomjel bʼa saʼan sakbʼel ja bʼa skʼakʼujil ja Conmemoración. Ta jchapatik ja kʼujoltik ja bʼa ekʼele it, ojni bʼobʼ jkoltaytik ja tuk bʼa oj yawe el slekilal (Esd. 7:10).

LA JKOLTAYTIK JA TUK BʼA OJ YAWE EL SLEKILAL JA CONMEMORACIÓN

13. ¿Jasa bʼajtan oj kʼuluktik bʼa skoltajel ja tuk bʼa oj yawe el slekilal ja Conmemoración?

¹³ ¿Jastal oj bʼobʼ jkoltaytik ja tuk bʼa oj yawe el slekilal ja Conmemoración? Pes jani la jloktike. Yajni wa xkʼepatik ja lokjelal ja bʼa xcholjeli, bʼobʼta ojni bʼobʼ jkʼuluktik jun lista ja bʼa kristyano wa xkiʼajtik gusto oj loktike, jastal ja jpamilyatik, ja jmojtik aʼtel, ja jmojtik eskuela ma tuk bʼa wa xnaʼatik sbʼaj. Ta chʼakujtik ja lokjelal bʼa juʼun, ojni bʼobʼ jektikyile jun enlace. ¡Mini xnaʼatik janekʼ oj skʼan oj wajuke! (Ecl. 11:6).

14. ¿Jas experiencia wa sjeʼa ja slekilal ta keʼntik mismo wa xlokotik june?

¹⁴ Mokni kaltik mi ja xbʼobʼ skʼul jun lokjelal. Jun kʼakʼu, jun hermana ekʼ sbʼaj jun jasunuk jel chamyabʼjel yajni ja statami, bʼa mi Testigoʼuk yala yabʼ ke oj wajsok ja bʼa Conmemoración. ¿Jas yuj jel chamyabʼi? Yujni jitsan ekʼele skʼanunejyi awajsok, pe nunka waji. ¿Jas yuj yala oj wajuk? Ja yeʼn xcholo ke jun ansyano bʼa wa snaʼa sbʼaj ajiyi jun lokjelal. Ja statami wajni ja Conmemoración jaw sok ja bʼa tuk jabʼilik.

15. ¿Jasa tʼilan oj ka juljkʼujoltik yajni ay maʼ xlokotik ja bʼa Conmemoración?

¹⁵ La ka juljkʼujoltik ja yajni ay maʼ wa xlokotik ja bʼa Conmemoración, bʼobʼta ayiʼoj jujuntik sjobʼjel sbʼaja jreuniontiki, pe masto ta mini jun ekʼele wajel. Ja yuj jelni lek la pensaraʼuktik ja bʼa dudaʼik oj ajyukyuj sok jastal oj bʼobʼ jakʼtikyi (Col. 4:6). Jun sjejel, bʼobʼta oj sjobʼe: «¿Jas wa xkʼulaxi ja tiw? ¿Janekʼ tyempo wa x-albʼi ja reunión? ¿Jastal oj kʼutes jbʼaj ja bʼa ekʼele jaw? ¿Wan maʼ xtupxi? ¿Wan maʼ stsomowe takin?». Ja yuj la jobʼtikyi ja jloktiki ta ayiʼoj jujuntik duda sok xcholjel yabʼ ja bʼa jaw. Cha ojni bʼobʼ katik makunuk ja bideo La ka juljkʼujoltik ja xchamelal ja Jesús sok ¿Jastal wa xkʼulaxi ja jtsomjeltikoni?  Chomajkil, ja sjejel 28 ja bʼa libro Abʼan stsamalil jawa sakʼanili ayiʼoj jujuntik jas oj bʼobʼa cholyabʼ.

16. ¿Jas tuk sjobʼjelik oj bʼobʼ ajyukyuj june ke wa xwaj ja bʼa Conmemoración?

¹⁶ Tsaʼan yajni xwaj ja bʼa Conmemoración, bʼobʼta ojni ajyukyuj mas dudaʼik. Bʼobʼta oj sjobʼ sbʼaj jas yuj mi maʼ (ma kechanta jujuntik) sloʼo ja pan sok yuʼaj ja vino. Bʼobʼta cha ojni sjobʼ sbʼaj jastik tyempo wa xkʼulantik ja Conmemoración. Sok bʼobʼta wa skʼana oj snaʼ ta junxta wa xkʼulantik spetsanil ja bʼa jreuniontik. Ama ja loʼil ja bʼa Conmemoración wa staʼa tiʼal jitsan ja bʼa jastik jaw, pe bʼobʼta wani xmakuniyuj xcholjel yabʼ mas jaman lek. Bʼa yajelyi sjakʼjel jujuntik ja bʼa sjobʼjel yiʼoji ojni bʼobʼ katik makunuk ja artikulo bʼa jw.org «¿Jas yuj ja taʼumantiʼik bʼa Jyoba tuk wa xkʼulantikon ja Cena ja Kajwaltik yuja tuk relijyoniki?». Wani xkʼana oj kʼuluktik ja janekʼ wa xbʼobʼkujtik bʼajtanto, ja bʼa yoraʼil sok tsaʼan ja bʼa Conmemoración bʼa skoltajel ja matik «puesto aye» bʼa oj yawe el slekilal ja ekʼele it jel chaʼanyabʼal (Hech. 13:48).

LA JKOLTAYTIK JA MATIK CHEBʼELE

17. ¿Jastal oj bʼobʼ skoltaye ja ansyanoʼik ja matik chebʼele? (Ezequiel 34:​12, 16).

¹⁷ Ja bʼa styempoʼil ja Conmemoración, ¿jastal oj bʼobʼ skoltaye ja ansyanoʼik ja matik chebʼele? Jani sjejelyile wa xcham skʼujole sok wa syajtaye (kʼuman ja Ezequiel 34:​12, 16). Ansyanoʼik, bʼajtanto ja bʼa Conmemoración, leʼawik chikan janekʼ oja taʼex. Alawik yabʼye ke wa xchamakʼujolex bʼa yeʼnle sok waxa kʼanawex oja kʼulukex ja janekʼ wa xbʼobʼawujilex bʼa oja koltayex. Lokowik ja bʼa Conmemoración sok ta wajye, gustoxta kʼulanik resibir. Tsaʼan ja bʼa Conmemoración, moka wawexkan slejel ja hermanoʼik jaw sok awikyi ja jastik wa xmakuniyujile bʼa oj kumxuke soka Jyoba (1 Ped. 2:25).

18. ¿Jastal oj bʼobʼ jkoltaytike ja matik chebʼele? (Romanos 12:10).

¹⁸ Jpetsaniltik wani xbʼobʼ jkoltaytik ja matik chebʼele ke wa xkʼotye ja bʼa  Conmemoración. ¿Bʼa jas modo? Jani sjejelyile yajalkʼujol, lekil kʼujol sok skisjele (kʼuman ja Romanos 12:10). La ka ekʼ bʼa jpensartik bʼobʼta ja yal chejik jaw bʼa Jyoba wokolni yabʼuneje wajel bʼa jun reunión. Bʼobʼta jani wa xcham skʼujole jastal oj kʼulajuke resibir yuja hermanoʼik. e Ja yuj mok katikyile sjobʼjelik bʼa oj ajuk kʼixwuke cha mok jas kaltik bʼa tuk oj yabʼye (1 Tes. 5:11). Kʼoteletoni kala kermanotik sok wani la gustoʼaxitik stoyjel lajan ja Jyoba soka yeʼnle (Sal. 119:176; Hech. 20:35).

19. ¿Jasa slekilal ja skʼintajel ja xchamelal ja Jesús?

¹⁹ Soka jas jpaklaytikta, mini cham xkabʼtik yuja Jesús yaʼakan ja mandar bʼa oj katik juljkʼujoltik ja xchamelal kada jabʼil. Skʼulajel wa xkatik el slekilal bʼa tuktukil modo, tanto ja keʼntiki sok ja tuki (Is. 48:​17, 18). Wa skoltayotik bʼa oj yajtaytik mas ja Jyoba sok ja Jesús. Wa xyaʼakan bʼa oj jetik janekʼto wa xkaʼatik tsʼakatal yuja jas skʼuluneje yuj keʼntik. Wa xya ajyukotik mas tsoman soka kermanotik sok wa xyaʼakan bʼa oj koltaytik ja tuk bʼa oj snaʼe jasa tʼilan oj skʼuluke, bʼa oj yabʼye stsamalil ja slekilalik wa xyiʼajan ja slokʼol. Ja yuj, la jkʼujoluktik bʼa ajyel chapan ja bʼa Conmemoración, ja kʼakʼu mas tʼilan ja bʼa jabʼili.