JA MIÉRCOLES 18 bʼa enero bʼa 2023, ajyi jun anunsyo jel chaʼanyabʼalil ja bʼa jw.org: ja hermanoʼik Gage Fleegle sok ja Jeffrey Winder tsajiye oj kʼotuke Tsome Tojwanum ja bʼa Testigoʼik bʼa Jyoba. Xchawanile wane yaʼteltajel toj lek ja Jyoba bʼa jitsanxa jabʼil.

Ja hermano Fleegle ti kʼi bʼa oeste bʼa Pensilvania (Estados Unidos). Ja jejiyi ja smeranil yuja snantati. Yajni solteroxa, wajye bʼa jun yal chonabʼ ke wa xkʼanxi koltanel bʼa xcholjel. Yiʼaj jaʼ tʼusan tsaʼan, ja bʼa 20 bʼa noviembre bʼa 1988.

Tsatsankʼujolaji yuja snantati bʼa yaʼteltajel ja Jyoba bʼa tyempo tsʼikan. Wa slokowe biajanteʼik sok betelitaʼik ja bʼa snaje, sok jach yila ja jastal jel gusto aye ja hermanoʼik jaw. Ja 1 bʼa septiembre bʼa 1989, tʼusan tsaʼan yajni yiʼaj jaʼ, och precursor regular. Sok chabʼ jabʼil tsaʼan ya kʼot smeranil june ja bʼa skʼel sat ke ya ajyuk ja ayiʼoj 12 jabʼil: aʼtel bʼa Betel. Ja bʼa octubre bʼa 1991 kʼe aʼtijuk bʼa Betel bʼa Brooklyn.

Ja tiw aʼtiji waxake jabʼil ja bʼa taller bʼa encuardenación sok tsaʼan cha jekji bʼa Departamento bʼa maʼ wa skʼela ja xCholjel. Ja bʼa tyempo jaw, koltani jujuntik jabʼil bʼa jun kongregasyon bʼa wa xkʼumaniye Ruso. Ja bʼa 2006 nupani soka Nadia, sok man tyempo jaw lajani wane aʼtel bʼa Betel. Xchawanile koltaniye ja bʼa territorio bʼa portugués, sok mas ja lajune jabʼil ja bʼa territorio hispano. Tsaʼan yajni aʼtiji jitsan jabʼil ja bʼa Departamento bʼa maʼ wa skʼela ja xCholjel, ja hermano Fleegle jekji ja bʼa Opisina bʼa Tsome Olomalik bʼa sjejel sok tsaʼan ja bʼa Opisina bʼa Tsome Olomalik bʼa xCholjel. Ja bʼa marzo bʼa 2022 tsaji jastal koltanum bʼa Tsome Olomalik bʼa xCholjel ja bʼa Tsome Tojwanum.

Ja hermano Winder ti kʼi bʼa Murrieta (California). Ja snantati, ke Testigoʼe, jejiyi  ja smeranili, sok yiʼaj jaʼ bʼa 29 bʼa marzo bʼa 1986. Ja bʼa ixaw ti nochani och precursor auxiliar, sok jelni skʼulan gusto ke mini skʼana oj yakan. Ja 1 bʼa octubre bʼa 1986, tsaʼan jujuntik ixaw, och precursor regular.

Yajni solteroxa, ja hermano Winder waj yulatay chabʼ hermano ayxa skʼujole ke ja bʼa tyempo jaw wane aʼtel bʼa Betel. Ja jaw koltaji bʼa oj ya ajyuk ja skʼelsat bʼa sjekjel jun solicitud ja yajni ayxa yiʼoj jabʼil bʼa skʼulajel. Ja bʼa mayo bʼa 1990 lokji bʼa Betel bʼa Wallkill.

Ja tiw ajyi tuktukil xchol, jun sjejel jastal ja bʼa Departamento bʼa Limpieza, ja Departamento bʼa Hacienda sok bʼa Opisina bʼa Betel. Ja bʼa 1997 nupani soka Angela, sok man bʼa tyempo jaw wane aʼtel lajan bʼa Betel. Ja bʼa 2014 jekjiye bʼa Warwick, bʼa ja hermano Winder koltani bʼa yajel kʼeʼuk ja naʼits ja bʼa yechalil wa xkʼelxi ja kaʼteltik. Ja bʼa 2016 cha jekjiye bʼa Patterson, ja bʼa Yechalil ja Chapjelal bʼa Watchtower, soka tiw aʼtiji ja bʼa Opisina bʼa Audio sok Bideo. Chane jabʼil tsaʼan cha kumxiye bʼa Warwick, sok ja hermano Winder cha ti jekji ja bʼa Opisina ja bʼa Tsome Olomalik bʼa Aʼtijumik. Ja bʼa marzo bʼa 2022 tsaji jastal koltanum ja bʼa Tsome Olomalik bʼa Aʼtijumik ja bʼa Tsome Tojwanum.

Ja winike it merani kʼotele majtanal ke yaʼunejkitik ja Jyoba (Efes. 4:8). Wa xkatikyi orasyon bʼa oj ajuk koʼ slekilale yuja tsats lek wane aʼtel yuja sGobyerno ja Dyosi.