Cha tukni ja jas ekʼ sbʼaje ja Nicolas sok ja Céline, pes ja betel bʼa Francia skʼanayile oj waj koltanuke bʼa pilan kongregasyon. Ja nupanum it wa xcholowe ja jastal yabʼye ja yajni wajye bʼa pilan kongregasyon: «Ja bʼajtani jelni gusto ajyitikon, pe tsaʼan jelni wokol kabʼtikon yujni kʼe jnatikon ja kamigotikoni. Ja jastal wa xkila jbʼajtikon soka hermanoʼik ja bʼa yajkʼachil kongregasyon mito jel tsatsuk ay». a Ja yuj, ¿jasa oj bʼobʼ skoltaya bʼa oj kuchukawuj ja wokolik sok oj kʼajyan ja bʼa yajkʼachil kongregasyon? ¿Jastal oj bʼobʼ koltanuke ja hermanoʼik? ¿Sok jastik slekilal bʼa Dyos oj ajyukawuj sok oj bʼobʼa waʼ ja bʼa yajkʼachila kongregasyoni?

CHANE RASONIK BʼA OJ SKOLTAYA BʼA OJ KʼAJYAN

1. Jipa akʼujol bʼa Jyoba (Sal. 37:5). Ja Kazumi bʼa ti sbʼaj bʼa Japón, koltani 20 jabʼil bʼa junxta kongregasyon, pe tʼilani waj bʼa pilan yajni ja statami tukbʼesji yaʼtel bʼa pilan lugar. ¿Jasa skʼulan bʼa yaʼakan ja «sbʼej bʼa skʼabʼ ja Jyoba»? Wa xcholo: «Jamayi ja jkʼujol ja Jyoba sok kalyabʼ ja jastal jel jtuchʼil ayon xkabʼi, ja xiwel sok ja chamkʼujolik kiʼoji. Tolabida yaki ja ipal wa xmakunikuji».

¿Jasa oj skoltaya bʼa oja jipa kʼujol mas bʼa Jyoba? Ja jkʼuʼajeltiki jach jastal jun yal teʼ bʼa wa skʼana jaʼ sok abono bʼa oj kʼiʼuk sok oj tsatsbʼuk. Ja Nicolas, bʼa taxtakon tiʼal, spensaraʼan ja bʼa sjejel bʼa Abrahán, ja Jesús sok ja Pablo bʼa jelni xchʼaka sbʼaje bʼa oj skʼuluke ja jas wa skʼana ja Dyosi sok ja jaw ya skʼuʼuk ke ojni cha koltajuk yuja Jyoba. Ta aya wiʼoj  jun lekil programa bʼa spaklajela tuchʼil, mi kechan oj kʼajyan ta ay jas tukbʼi ja bʼa wa sakʼanili, cha ojni anebʼ jitsan jastik bʼa Dyos bʼa oj wa makunuk ja bʼa wa yajkʼachil kongregasyoni.

2. Moka laje (Ecl. 7:10). Ja Jules wa xcholo ke yajni el ja bʼa Benín sok waj bʼa Estados Unidos, yilani ke masni tuk ja skulturaʼe: «Wa xkabʼ ke lajansok tʼilani oj chol yabʼye kada kristyano wa xnaʼa sbʼaj ja jsakʼanili». Yuja yeʼn mi jach kʼajyeluk, jel tuk xyabʼi sok mixa jeluk smojtay ja hermanoʼik. Pe ja yeʼn wa xcholo, ke yajni mas wan snajel sbʼaje, tukbʼi ja jastal wa spensarani: «Kilunej ke ja kristyano junxtaʼotik bʼa spetsanil ja luʼumi. Kechan tuktukil ja jastal wala kʼumanitik sok ja jmodotiki. La jkʼultik aseptar ja kristyano chikan jastale». Ja yuj, moka laj ja yajkʼachil kongregasyon bʼaya sok ja bʼa ajyiya. Jun precursora sbʼiʼil Anne-Lise yala: «Mini jtukbʼes jbʼaj bʼa junxta oj taʼ jastal ja bʼa ajyiyon, jani bʼa oj kil jastik yajkʼachil».

Ja ansyanoʼik cha mini oj slaje ja yajkʼachil skongregasyone sok ja bʼaye ajyi. Bʼobʼta jujuntik jasunuk tukni wa skʼulane, pe mi wa stojolan ke mi lekuk. Ja mas leki jani snajel sbʼaj lek ja jastal wa xtax ja kongregasyoni bʼajtanto oja wal ja jas waxa pensaraʼan (Ecl. 3:​1, 7b). Cha masni lek oj jetik sok ja jas wa xkʼulantik ke stʼenjel ja tuk bʼa oj spensaraʼuke jastal keʼntik (2 Cor. 1:24).

3. Kʼujolan bʼa aʼtel lajan (Filip. 1:27). Ja smeranili wajel bʼa pilan lugar wani xyiʼaj tyempo sok ipal, pe jelni tʼilan man la kʼoti mi oja chʼay ja reunionik ja bʼa wa yajkʼachil kongregasyoni, ta wa xbʼobʼi kaʼax ja bʼa Naʼits bʼa Tsomjelal. Ja yuj, ¿jastal oj bʼobʼ skoltaya ja hermanoʼik ta mi la waji ma nunka la ilji? Ja Lucinda wa xcholo ja jas skʼulane sok ja chabʼ yakʼixi yajni wajye bʼa jun niwan chonabʼ bʼa Sudáfrica: «Jnocho ja rason bʼa oj koltanukon ja janekʼ bʼobʼkuj ja bʼa kongregasyon, elel xcholjel sok tuktukil hermanoʼik sok yajel jkomentario ja bʼa reunioniki. Cha jkʼapa ja jnaj bʼa ti oj ajyuk elel ja xcholjel soka grupo».

Ta waxa kʼujolan aʼtel lajan soka hermanoʼik ja bʼa wa yajkʼachil kongregasyoni, wanani «tiroʼanel lajan yuja skʼuʼajel sbʼaja lekil rasoniki». Ja ansyanoʼiki yalawe yabʼ ja Anne-Lise, bʼa taxta tiʼali, bʼa a-skʼul probar oj elsok xcholjel yibʼanal ja hermanoʼik. Ja yeʼn wa xcholo: «Wegoxtani kila jani june ja bʼa wa xkʼanxi bʼa kʼajyel wego». Ta waxa kʼapabʼaj bʼa skusjel sok stalnajel ja Naʼits bʼa Tsomjelal, ja tuki ojni yil ke jaxani jawa kongregasyoni. Yajni mas waxa kʼujolan aʼtel lajan soke, mas wego oj kʼajyan sok mas gusto oj ajyansok jawa yajkʼachil pamilya.

4. Leʼa yajkʼachila wamigoʼik (2 Cor. 6: 11-13). Ja mas lek bʼa oja ta awamigoʼik jani oj chamuka kʼujol ja tuki. Ja yuj, pila tyempo bʼa loʼilanel soka hermanoʼik bʼajtanto oj kʼeʼuk  sok yajni xchʼak ja reunión bʼa snajel sbʼaje. Kʼujolan bʼa snajel ja sbʼiʼile. Ta tsamalxta waxa jeʼa jawa modo, sok wa xjula kʼujol ja sbʼiʼile ja hermanoʼik, jelni gusto oj ajyuke amok sok oj skʼane oj yamigoʼuka.

Moka jeʼ juna modo bʼa kechanta mas lek oj yila ja tuki. Mas lek jeʼa ja jastal mero kʼotela. Nocho ja sjejel bʼa Lucinda: «Wegoxta kʼe jloktikon ja hermanoʼik ja bʼa jnajtikoni, stsʼakatal yuja jaw ja wego ay lekil kamigotikon».

«GUSTOXTA KʼULANABʼAJIK RESIBIR»

Jujuntik hermano jelni wokol xyabʼye wajel bʼa jun Naʼits bʼa Tsomjelal bʼa mini maʼ snaʼawe sbʼaj. Ja yuj, ta aykʼa maʼ jul ja bʼa wa kongregasyon, ¿jastal oj bʼobʼa koltay? Ja jekabʼanum Pablo yala: «Gustoxta kʼulanabʼajik resibir, jastalni gustoxta skʼulanex resibir ja Kristo ja weʼnlexi» (Rom. 15:7). Ja ansyanoʼik wani xbʼobʼ snoche ja Kristo bʼa oj skoltaye ja matik ajkʼachto julele bʼa gusto oj ajyuke (kʼela ja recuadro « Yajni oja tukbʼes abʼaj bʼa kongregasyon»). Ja yujil, spetsanil ja hermanoʼik sok ja yal untiki, wani xbʼobʼ koltanuke bʼa jachuk gusto oj ajyuke ja matik ajkʼachto julele.

Bʼa gustoxta oj kʼuluktike resibir ja matik ajkʼachto julele, ojni bʼobʼ jloktike bʼa jnajtik sok oj kʼap jbʼajtik bʼa skoltajel. Jun sjejel, jun hermana spila styempo bʼa sjejelyi ja chonabʼ jun hermana bʼa ajkʼachto julel sok yalyabʼ bʼatik wa x-el ja karro. Ja hermana jelni tsamal yila sok jelni koltaji bʼa oj kʼajyuk.

JUN MODO BʼA KʼIʼEL JA BʼA YAʼTELTAJEL JA DYOSI

Ta wana stukbʼesel abʼaj bʼa pilan kongregasyon, bʼobʼta ojni ochuka xiwel sok oj chamuka kʼujol. Pe pensaraʼan ja sjejel it: jastalni jujuntik yal nuxik chanik yajni wa xkʼiye tʼilani wa stukbʼese ja stsʼujmile bʼa oj bʼobʼ jujpuke, jelni tʼilan oja wa eluk yibʼanal ja chamkʼujolik awiʼoj bʼa oj bʼobʼ kʼiʼan ja bʼa yaʼteltajel ja Jyoba sok bʼa oj bʼobʼa «kʼuluk» mas sbʼa Jyoba.  Ja Nicolas sok ja Céline wa xyalawe: «Wajel bʼa pilan lugar jelni jas wa sjeʼawi. Jun sjejel, jelni skoltayotikon bʼa kʼajyel soka tuk sok bʼa pilan lugarik bʼa ajyelkujtikon modoʼalik ke mey kiʼojtikon ajyi». Ja Jean-Charles, bʼa taxta tiʼal ja bʼajtani, wa xcholo jastal ya el slekilal ja spamilya: «Ja jtukbʼes bʼajtikon kongregasyon nikji ja kuntikiltikon bʼa oj yaʼteltaye mas ja Jyoba. Bʼa jujuntik ixaw, ja yal kakʼixtikon kʼe ya ekʼ sparteʼik ja bʼa reunión bʼa yoj semana sok ja jkeremtikon och jun choluman bʼa mito yiʼunejuk jaʼ».

¿Jaxa ta yuja jastal wala tax mi xyaʼakan bʼa oj wajan bʼa pilan lugar bʼa wa xkʼanxi koltanel? Ta jachuki, ojni bʼobʼa noch jujuntik rason ja bʼa artikulo it, sok jachuk oja wabʼ ke lajansok ajkʼachto julela ja bʼa wa kongregasyon. Jipa akʼujol bʼa Jyoba, kʼujolan aʼtel lajan soka kongregasyon yajni xa chapa elel xcholjel sok tuktukil hermanoʼik sok leʼa yajkʼachila wamigoʼik ma ayijbʼuk mas ja janekʼxa wiʼoji. ¿Ay maʼ bʼa apensaraʼunej jastal oja koltay ja matik ajkʼacheto ja bʼa kongregasyoni sok ja matik wa skʼana skoltajele? Mini ay duda, skʼulajel ja it oj skoltaya bʼa kʼiʼel yaʼteltajel ja Dyosi, pes ja yajalkʼujolal jani senya ke meran snochumanotik Kristo (Juan 13:35). Wani xbʼobʼa kʼuʼuk lek ke «ja majtanalik it jelni lek xyila ja Dyosi» (Heb. 13:16).

Ama ay wokolik, jitsan snochumanik Kristo bʼobʼel kʼajyuke ja bʼa yajkʼachil skongregasyone sok gusto aye. ¡Ja weʼn ojni cha bʼobʼukawuj! Ja Anne-Lise wa xyala: «Stukbʼesel jbʼaj bʼa kongregasyon skoltunejon bʼa sjamjel ja jkʼujoli». Ja Kazumi wa xyala ke ja wego wani skʼuʼan lek ke «wajel bʼa pilan lugar wani xbʼobʼa wil jastal wa skoltaya ja Jyoba bʼa tuktukil modo bʼa mini awilunej ajyi». ¿Jaxa Jules? Ja yeʼn wa xyala: «Jelxa ja kamigoʼiki sok mixa jtuchʼil wa xkabʼ ayon. Jelxa kʼajyelon ja bʼa yajkʼachil jkongregasyon sok jelxani wokol oj kabʼ yajelkani».