Jun jasunuk wa skʼana bʼa oj katik gustoʼaxuk ja Jyoba jani oj ajyukujtik skʼuʼajel. Pe ja Biblia wa xyala ke «mi yibʼanaluke wa xbʼobʼ ajyukyujile ja skʼuʼajeli» (2 Tes. 3:2). Yajni ja jekabʼanum Pablo stsʼijbʼan ja yaljelik it, jani mero wan yaljel sbʼaja matik wa x-ijiyuj spatiki, ja «winike mi lekuke sok jel maloʼe» bʼa tʼilani oj el libre bʼa yeʼnle. Pe yajni yala sbʼaja skʼuʼajeli cha wani xkʼot sbʼaj tuk kristyanoʼik. Jun sjejel, jujuntik mi skʼuʼane sbʼaja prebaʼik bʼa ayni jun sakʼan Dyos bʼa skʼulan spetsanil ja jastiki (Rom. 1:20). Tuk wa skʼuʼane ke ayni june maʼ jel ja yipi. Pe ja tikʼe skʼuʼajel jaw mini jaʼuk ja jas wa smajlay ja Jyoba bʼa keʼntik.

Bʼa oj katik gustoʼaxuk ja Dyosi tʼilani oj kʼuʼuktik ke sakʼan ay sok wa xyayi stsʼakol ja matik ayiʼoje jun tsatsal skʼuʼajeli (Heb. 11:6). Sok ja skʼuʼajeli jani june ja bʼa modoʼalik bʼa wa xyaʼa ja satinel ja yip ja Dyosi. Ta wa xkʼanatik oj katik ajyuk ja yipi, tʼilani oj kʼantikyi ja Jyoba bʼa orasyon (Luc. 11:​9, 10, 13). Cha jelni tʼilan oj kʼumuktik ja Biblia, ja Yabʼali, bʼa yeʼnani yaʼakan oj tsʼijbʼaxuk soka yipi, sok tsaʼan la jpensaraʼuktik ja bʼa jas jkʼumunejtiki sok la jkʼujoluktik bʼa yajel makunuk. Jachuk oj ajyukujtik ja yipi sok oj skoltayotik bʼa oj katik ajyuk jun tsatsal skʼuʼajel bʼa lek wa xyila.