Jujuntik levitaʼik bʼa mi sacerdoteʼuke skʼulane jitsan cholalik ja bʼa templo, jastal ja aʼtel bʼa policía. Ayni june maʼ wa xtojiyeyuj ja bʼa templo. Ja tsʼijbʼanum judío Filón xcholo jasunkiluk ja yaʼtele: «Jujuntik teye bʼa pwertaʼik jastal talnanume ja bʼa wa x-ajyi ocheli. Ja tuki teye bʼa yojol, bʼa stiʼ ja lugar jel saki. Wa stalnaye mok ochuk ja maʼ mi sbʼajini, ja maʼ gana wa skʼulani sok ja maʼ mi snaʼa. Jaxa tuki wa sbʼejtaye ekʼ sjoyanal ja templo bʼa stalnajel kʼakʼu akwal, jastalni kʼulubʼale turnar».

Ja Sanedrín wa xbʼobʼ skʼanyi ja tsome policiaʼik it akoltajukeyuj. Ja gobyerno bʼa Roma kechantani yaʼunej permiso ayawe makunuk espadaʼik ja kʼole judío it.

June maʼ jel chapan sbʼiʼil Joachim Jeremías wa xcholo: «Ja yaljelik yala ja Jesús ja yajni yamji, bʼa yala kada kʼakʼu ti wan sjejel bʼa templo sok mi yamji» mi oj abʼxuk stojol ta mi jaʼuk wan yaljel yabʼ «ja policiaʼik bʼa templo waj yamjukyuji» (Mat. 26:55). Ja tsʼijbʼanum jaw cha yala ja matik sleʼawe modo syamjel ja Jesús bʼa jun ekʼele bʼajtanto cha yeʼnleni ja policiaʼik bʼa templo (Juan 7:32, 45, 46). Tyempoʼik tsaʼan, ja maʼ wa xtojwani ja bʼa templo sok ja policiaʼiki aljiyabʼye ayiʼe och ja snebʼumanik ja Jesús bʼa Sanedrín. Bʼobʼta cha yeʼnleni ja policiaʼik jaw ja matik syamawe ja Pablo bʼa spatik ja templo (Hech. 4:1-3; 5:17-27; 21:27-30).