1. ¿Jasa wa xbʼobʼ spensaraʼuke jujuntik yaʼtijumik ja Jyoba?

 ¡JELNI tsamal snajel ke «ja Jyoba jel gusto ay soka xchonabʼi»! (Sal. 149:4). Pe bʼobʼta ay ekʼele jujuntik wa skʼulan sbʼaje desanimar sok wa spensarane: «Ama ja Jyoba gusto aysok yibʼanal ja yaʼtijumiki, pe ¿lek maʼ wa xyilawon ja keʼni?». Jitsan yaʼtijumik Dyos ja bʼa najate cha ajyi ekʼele bʼa wokol skʼuʼane ta lek wa x-iljiye yuja yeʼni (1 Sam. 1:​6-10; Job 29:​2, 4; Sal. 51:11).

2. ¿Matik lek wa xyila ja Jyoba?

² Ja Biblia wa xyala jaman lek ke ama mulanumotik wani xbʼobʼ yilotik lek ja Jyoba. ¿Jasa tʼilan oj kʼuluktiki? Jani sjejel ke wa xkʼuʼantik bʼa Jesukristo sok oj kitik jaʼ (Juan 3:16). Jachuk wa xjeʼatik bʼa stiʼ sat ja tuk ke sutxita kʼujoltik ja bʼa jmultiki sok jkʼapatiktayi ja Dyos bʼa skʼulajel ja jas wa skʼana (Hech. 2:38; 3:19). Ja Jyoba jelni xgustoʼaxi yajni wa xkʼulantik ja jastik it bʼa oj kʼot kamigoʼuktik. Ta wa xkʼujolantik bʼa yajel kʼotuk ja jas jkʼapunejtikyiʼi, ja Jyoba lekni oj yilotik sok oj yamigoʼukotik (Sal. 25:14).

3. ¿Jastik sjobʼjel oj katikyi sjakʼjel ja bʼa artikulo it?

³ Anto, ¿jas yuj ay ekʼele jujuntik wa spensarane ke mi lek x-iljiye yuja Jyoba? ¿Jastik modo wa sjeʼakitik ke lek wa xyilawotik? ¿Sok jasa oj skoltayotik bʼa oj kʼuʼuktik ke lek wa xyilawotik?

¿JAS YUJ JUJUNTIK WA SPENSARANE KE MI LEK X-ILJIYE YUJA JYOBA?

4, 5. ¿Jasa wa xbʼobʼ jkʼuʼuktik lek ama wa xkabʼtik mi la makunitik?

⁴ Jitsan bʼa keʼntik man yal jchʼiniltik bʼobʼta kabʼunejtik ke mi la makunitik (Sal. 88:15). Jun hermano sbʼiʼil Adrián wa xcholo: «Tolabida jpensaraʼunej ke mini tʼun la makuniyon.  Wa xjul jkʼujol ja yajni chʼinonto wa xkʼanayi ja Jyoba ke ja jpamilya aʼajyuk sakʼan ja bʼa Tsamal Lugari, pe ja keʼn seguro ayon ke mini xbʼajin ajyel ja tiwi». Ja Tony wa xyala sbʼaja jastal aji kʼiʼuk yuja snantati, bʼa mi kʼoteluke Testigo: «Mini yalawekabʼ ke gusto aye jmok ma wa skʼanawone. Wani xyawe kabʼ ke mi xlajxikuj ja jas wa skʼanawe bʼa keʼna».

⁵ Ta ay ekʼele wa xkʼulantik luchar bʼa wa xkabʼtik ke mi la makunitik, la juljkʼujoltik ke yeʼnani ja Jyoba ja maʼ yiʼajotikjan ja bʼa xchonabʼi (Juan 6:44). Ja yeʼn jani wa xyila ja lekil jmodotiki ama ja keʼntik bʼobʼta mi xkilatik, sok wani snaʼa jastal meran kʼotelotik (1 Sam. 16:7; 2 Crón. 6:30). Ja yuj, yajni wa xyala ke jel chaʼanyabʼal kʼotelotik, wani xbʼobʼ jkʼuʼuktikyi (1 Juan 3:​19, 20).

6. ¿Jastal yabʼ ja Pablo yajni spensaraʼan sbʼaja smuliki?

⁶ Bʼobʼta jujuntik bʼa keʼntik wanto xkabʼtik jel mulal aytik yuja jastik jkʼulantik bʼajtanto oj natik sbʼaj ja smeranili (1 Ped. 4:3). Tuk bʼobʼta jitsanxa tyempo wane yaʼteltajel toj lek ja Jyoba pe wanetoni skʼulajel luchar soka kʼankʼunelik bʼa koʼel mulal. Jaxa weʼn, ¿ayma ekʼele waxa wabʼ ke me xyaʼawa perdon ja Jyoba? Ta jachkʼa, ojni ya kulana kʼujol snajel ke ajyi tuk yaʼtijumik toj ja Jyoba bʼa jachni cha yabʼye. Jun sjejel, ja jekabʼanum Pablo yabʼ jel ajula sbʼaj yajni spensaraʼan sbʼaja smuliki (Rom. 7:24). Ama sutxita skʼujol sok yiʼajta jaʼ, wantoni xyabʼ ke yeʼn kʼotel «ja mas skoʼelal ja bʼa jekabʼanumiki» sok ‹ja mas ekʼxel› ja bʼa mulanumiki (1 Cor. 15:9; 1 Tim. 1:15).

7. ¿Jasa wa xbʼobʼ ajyukotik seguro ta sutxi jkʼujoltiki?

⁷ Ja kala tatik bʼa satkʼinali wani skʼapa oj yaʼotik perdon ta wa sutxi jkʼujoltiki (Sal. 86:5). Ja yuj, ta wa xnaʼatik meran malaya yuja jmultiki, mini ay kiʼojtik rason bʼa oj kʼultik dudar bʼa oj ya kʼotuk ja jas wa xyala: seguro ke yaʼawotikta perdon (Col. 2:13).

8, 9. ¿Jasa oj skoltayotik bʼa yajelkan spensarajel ke mi malanuk xyabʼ ja Jyoba ja jas wa xkʼulantiki?

⁸ Jpetsaniltik wani xkʼanatik oj katikyi ja Jyoba ja jasa mas lek bʼa keʼntik. Pe bʼobʼta jujuntik wa xyabʼye ke mini malanuk ja janekʼ wa skʼulane bʼa lek oj iljuke yuja Dyosi. Jun hermana sbʼiʼil Amanda wa xyala: «Wani xpensaran ke bʼa oj kayi ja jas mas lek ja Jyoba tikʼanxtani oj kayi mas. Ja yuj, jitsan ekʼele wa xkʼulan jbʼaj obligar bʼa oj kʼuluk mas. Anto, yajni mi xlajxikuji, wani xkʼuʼan ke ja Jyoba triste ay jmok jastal ja keʼni».

⁹ ¿Jasa oj skoltayotik bʼa yajelkan spensarajel ke mi malanuk xyabʼ ja Jyoba ja jas wa xkʼulantiki? La katik juljkʼujoltik ke ja yeʼn mini skʼulanotik exigir, jaʼuktoma wani x-och rason, sok mini skʼanakitik ja jas mi oj lajxukujtik yajelyiʼi. Ta ja jas wa xkʼulantik bʼa yeʼna jaʼa janekʼ wa xlajxikujtik, sea chʼin ma niwan, jelni chaʼanyabʼal xyila. Cha la jpensaraʼuktik bʼa sjejelik bʼa Biblia bʼa yaʼteltaye ja Jyoba sok spetsanil skʼujole. Jun sjejel, ja Pablo jel tsats aʼtiji jitsan jabʼil sok bʼejyi jitsan mil kilometro sok ya kujlajuk jitsan kongregasyonik. Pe kʼot jun tyempo bʼa tukbʼi ja jastal wa xtaxi sok mixani jel bʼobʼ xchol jastal ajyi. ¿Lekto maʼ ilji yuja Jyoba? Lektoniʼa. Ja Pablo mini yaʼakan skʼulajel ja janekʼ bʼobʼyuji sok ja Jyoba yani koʼyi slekilal (Hech. 28:​30, 31). Cha junxtani ja keʼntiki, mini tolabida oj katikyi junxta ja Jyoba, pe ja jasun mas lek wa xyila jani jas yuj wa xkʼulantiki. Ja wego oj kiltik jujuntik jasunuk bʼa wa sjeʼakitik ja Jyoba ke lek wa xyilawotik.

 ¿JASTIK MODO WA SJEʼAKITIK JA JYOBA KE LEK WA XYILAWOTIK?

10. ¿Bʼa jas modo wa xyalakabʼtik ja Jyoba ke lek wa xyilawotik? (Juan 16:27).

¹⁰ Ja yeʼn yaʼunejkitik ja Biblia. Ja Jyoba jelni skʼulan gusto sjejelyi ja yaʼtijumik ke wani skʼana sok lek xyila. Ja bʼa Biblia wa staʼa tiʼal chabʼ ekʼele bʼa yala yabʼ ja Jesús ke yeʼnani ja Yunin jel skʼana sok lek xyila (Mat. 3:17; 17:5). ¿Wan maʼ xa kʼana ke oj yalawabʼ ja Jyoba ke lek xyilawa? Ja smeranili mini skʼumanotik man bʼa satkʼinal. Pe wani skʼumanotik yajel makunuk ja Yabʼali. Yajni wa xkʼumantik ja jastal tsamalxta skʼuman ja Jesús ja snebʼumaniki, wani xkabʼtik lajansok yeʼn wa skʼumanotik ja Jyoba (kʼuman ja Juan 16:27). Ja Jesús snochoni tsʼikan lek ja smodo ja sTati. Ja yujil, yajni wa xkʼumantik ja jas yala yabʼ ja tojik snebʼumaniki bʼa wani skʼana ama yuja spaltaʼile, wani xbʼobʼ ekʼ bʼa jpensartik ke jach wa xcha yala kabʼtik ja Jyoba (Juan 15:​9, 15).

11. ¿Jas yuj mi xbʼobʼ kiltik ja pruebaʼiki bʼa juni senya ke mixa lek xyilawotik ja Dyosi? (Santiago 1:12).

¹¹ Ja jastik wa skʼulani. Jun sjejel, ja Jyoba wani skʼana oj skoltayotik yajelkitik ja jastik wa xmakunikujtiki. Pe ay ekʼele wa xyaʼakan oj ekʼ jbʼajtik wokolik, jastalni ekʼ sbʼaj ja Job (Job 1:​8-11). Mokni kiltik ja pruebaʼik jastal jun senya bʼa mixa lek xyilawotik ja Dyosi. Jaʼuktoma, juni ekʼele bʼa wa xjeʼatik ke jelni xyajtaytik sok wa xjipa jkʼujoltik ja yeʼni (kʼuman ja Santiago 1:12). Sok ja bʼa ekʼeleʼik jaw jel wokoli ojni kiltik jastal wa stalnayotik sok wa skoltayotik bʼa oj kuchkujtik.

12. ¿Jasa wa sjeʼakitik ja yexperiencia ja Dimitri?

¹² La kiltik ja jas ekʼ sbʼaj jun hermano bʼa Asia sbʼiʼil Dimitri. Ja yeʼn chʼayuj ja yaʼteli. Yuja wanxta ekʼel ja ixawiki sok mi staʼa jun yaʼtel, spensaraʼan oj spil mas tyempo ja bʼa xcholjeli bʼa sjejelyi ja Jyoba ke wa sjipa skʼujol bʼa yeʼna. Pe ekʼni ja ixawiki sok mi staʼa jun yaʼtel. Tsaʼan, kʼe maloʼaxuk bʼa mixani xbʼobʼ kʼeʼuk ja bʼa xchʼati. Anto kʼe spensaraʼuk ke mini jun lekil tataluk sok mini jun lekil tatamaluk, sok ja Jyoba tristexani ay yuj yeʼna. Pe jun akwal, ja yal yakʼixi skʼulan imprimir bʼa jun juʼun ja yaljelik it bʼa Isaías 30:15: «Ojni ajyuka wipex ta wala ajyiyex laman sok waxa jeʼawex waxa jipa akʼujolex». Tsaʼan, yiʼaj ochyi sok yala yabʼi: «Kala tat, yajni triste aya ajuluka kʼujol ja teksto it». Ja Dimitri yaʼa sbʼaj  kuenta ke stsʼakatal ja Jyoba, ja spamilya aytoni skʼuʼe, swaʼele sok snaje. Wa xyala: «Ja jas tʼilan oj kʼuluki jani oj ajyukon laman sok mi oj kakan sjipjel jkʼujol ja bʼa jDyosi». Ta ja weʼn jach wan ekʼelabʼaj, wani xbʼobʼa kʼuʼuk lek ke ja Jyoba wa xcham skʼujol bʼa weʼna sok oj yawi ja ipal bʼa oj kuchukawuj.

13. ¿Jas pilan modo wa xchikteskitik ja Jyoba ke lek wa xyilawotik?

¹³ Ja yeʼn wa xya makunuk ja hermanoʼiki. Ja Jyoba wani xbʼobʼ snik ja yaʼtijumiki bʼa oj yalwekabʼtik jastik bʼa wa stsatsankʼujolanotik ja bʼa mero styempoʼil mas wa xmakunikujtiki. Jani jaw ja jas ekʼ sbʼaj jun hermana bʼa Asia. Ja yeʼn chʼayuj ja yaʼteli sok jelni tsats yamji chamel. Tsaʼan ja statami koʼ bʼa jun chaʼan mulal sok elkan jastal ansyano. Ja jas wan ekʼel sbʼaji jelni wokol sok ja hermana yala: «Mini xkabʼ stojol jas yuj wan ekʼel jbʼaj yibʼanal ja iti. Jpensaraʼan ke ayni jas mi lek jkʼulan sok mixa lek xyilawon ja Jyoba». Anto ja yeʼn spatayi skʼujol bʼa ajejukyi ke wantoni xkʼanjiyuj sok jakʼjiniyi ja yorasyoni. ¿Jastal? Ja yeʼn wa xcholo: «Staʼawone loʼil ja ansyanoʼiki sok skoltayone bʼa oj kil ke wantoni syajtayon ja Jyoba». Ekʼ ja tyempo cha yalyabʼ ja Jyoba ke wa skʼana oj yil ja skoltaneli. ¿Jasa ekʼi? Ja yeʼn wa xcholo: «Ja bʼa kʼakʼu jaw ajiki jun tsamal karta bʼa jitsan hermanoʼik ja bʼa kongregasyoni. Yajni jkʼumani, kabʼ ke smaklunejon ja Jyoba». Jastalni wa xkilatik, jitsan ekʼele ja jastik tsamal wa xyalawe ja tuki wani xchiktes ke lek wa xyilawotik ja Jyoba (Sal. 10:17).

14. ¿Jas pilan modo wa xya makunuk ja Jyoba ja hermanoʼik bʼa wa xchiktes ke lek wa xyilawotik?

¹⁴ Ja Jyoba cha wa xchiktes ke lek wa xyilawotik yajni wa xya makunuk ja kermanotik bʼa wa xyawekitik rason ja yajni  wa xmakunikujtiki. Jun sjejel, ja bʼa bʼajtan siglo ya makunuk ja jekabʼanum Pablo bʼa oj stsʼijbʼukyi 14 kartaʼik ja snochumanik Kristo, bʼa ti chʼikan tsatsal rasonik pe sok yajalkʼujolal. ¿Jas yuj ja Jyoba yaʼakan ja Pablo aya ja rasonik jaw? Yujni jel lek sok jel xyajtani, sok wa xtojwani «jastalni wa skʼulanyi jun tatal ja yunin jel skʼana» (Prov. 3:​11, 12). Ja yuj, ta ay maʼ yakitik jun rason bʼa Biblia mokni jpensaraʼuktik ke mixa lek xyilawotik ja Dyosi. Jaʼuktoma, juni senya ke wanto skʼanawotik (Heb. 12:6). ¿Jas tuk prebaʼik kiʼojtik bʼa lek wa xyilawotik ja Jyoba?

TUK PREBAʼIK BʼA LEK WA XYILAWOTIK JA JYOBA

15. ¿Matik wa xbʼobʼ yayi ja yip ja Jyoba sok jasa wa xbʼobʼ ajyukotik seguro?

¹⁵ Ja Jyoba wani xyayi ja yip ja matik lek wa xyila (Mat. 12:18). Ojni bʼobʼ jobʼ jbʼajtik: «¿Wan maʼ sjeʼa ja bʼa jsakʼanil ja modoʼalik wa xya ajyuk ja yip ja Dyosi?». Jun sjejel, ¿maxa maʼ aya pasensya ja wego ke bʼajtanto oja naʼ sbʼaj ja Jyoba? Ja smeranili, yajni mas waxa wila ke wana sjejel ja modoʼalik wa xyaʼa ja yip ja Dyosi, masni seguro wala ajyi ke lek wa xyilawa ja Jyoba. (Kʼela ja recuadro  Ja «satinel wa xyaʼa ja yip ja Dyosi jaʼa...»).

16. Jastalni wa xyala ja 1 Tesalonicenses 2:​4, ¿matik wa xya makunuk ja Jyoba bʼa xcholjel ja lekil rasoni? ¿Sok jastal waxa wabʼi?

¹⁶ Ja Jyoba wani xyayi ja aʼtel bʼa xcholjel yabʼ ja tuk ja lekil rason ja matik lek wa xyila (kʼuman ja 1 Tesalonicenses 2:4). La kiltik jastal yaʼa sbʼaj kuenta jun hermana sbʼiʼil Jocelyn. Jun kʼakʼu yajni kʼeʼi yabʼni ke jel elel sgana. Ja yeʼn wa xyala: «Mini ay kip xkabʼi wa xkabʼ mixani jas xbʼobʼ jkʼuluk. Pe kʼotelon precursora sok ja kʼakʼu jaw ojni elkon xcholjel. Ja yuj kayi orasyon ja Jyoba sok elyon». Ja bʼa saʼan sakbʼel jaw ja Jocelyn loʼilani soka Mary, jun ixuk bʼa jel lek smodo sok skʼana skʼulajel estudiar ja Biblia. Jujuntik ixaw tsaʼan, ja Mary xcholo yabʼ ja Jocelyn ke ja saʼan sakbʼel jaw kʼot ja bʼa snaji wani yajelyi orasyon ja Dyos bʼa skʼanjelyi ja skoltaneli. ¿Jasa jejiyi ja Jocelyn ja experiencia it? Ja yeʼn wa xyala: «Kabʼni ke jachni wan yaljelkabʼ ja Jyoba: ‹Lekni xkilawa›». Ja smeranili, mini yibʼanaluk ja kristyano oj smaklayotik, pe wani xbʼobʼ ajyukotik seguro ke ja Jyoba lek wa xyila ja janekʼ wa  xkʼujolantik bʼa yaljel yabʼ ja tuk ja lekil rasoni.

17. ¿Jasa wa sjeʼawi sbʼaja koltanel soka jas wa xyala ja Vicky? (Salmo 5:12).

¹⁷ Ja Jyoba wa sjeʼayi janekʼto chaʼanyabʼal ja koltanel sbʼaja matik lek wa xyila (1 Tim. 2:​5, 6). Pe ¿jaxa ta wokol xkabʼtik skʼulajel aseptar ke lek wa xyilawotik ja Jyoba ama ay kiʼojtik skʼuʼajel ja bʼa koltanel sok kiʼajtikta jaʼ? La juljkʼujoltik ke mini tolabida oj bʼobʼ jipjkʼujoltik ja jas wa xyala ja jkʼujoltiki, pe ojni bʼobʼ jipjkʼujoltik ja Jyoba. Bʼa yeʼna, tojni kʼotele sbʼaja matik ayiʼoje skʼuʼajel ja bʼa koltaneli sok wa skʼapa oj ya koʼyi slekilal (kʼuman ja Salmo 5:12; Rom. 3:26). Jun hermana sbʼiʼil Vicky jelni koltaji yajni spensaraʼan ja bʼa koltaneli. Ama wokol yabʼ skʼuʼajel ke wani xyajtajiyuj ja Jyoba, pe kʼotni snaʼ ja it: «Ja Jyoba jelni ajyel spasensya jmok bʼa jitsan tyempo [ ...]. Pe lajansok wanon yaljel yabʼi: ‹Ja yajtanela wiʼoj jmok mini malanuk bʼa keʼna. Ja sakʼanil yaʼa jawa wunini mini malanukta bʼa oj yaʼ perdon ja mulaliki›». Jastalni ja Vicky, ta wa xpensarantik ja bʼa koltaneli, cha ojni kabʼtik jastal wa syajtayotik ja Jyoba sok ojni jkʼuʼuktik lek ke lek wa xyilawotik.

18. ¿Jasa wa xbʼobʼ ajyukotik seguro ta mi xkatikan syajtajel ja kala Tatik bʼa satkʼinali?

¹⁸ Ama xkʼujolantik bʼa oj katik makunuk yibʼanal ja jas jnebʼunejtik ja bʼa artikulo it, bʼobʼta ay ekʼele oj kʼul jbʼajtik desanimar sok oj jobʼ jbʼajtik ta lek wa xyilawotik ja Jyoba. Ta ja weʼn jach x-ekʼabʼaj, ajuluka kʼujol ke ja yeʼn lek wa xyila «ja matik mi xyawekan syajtajeli» (Sant. 1:12). Ja yuj moka wakan mojxel soka Jyoba sok leʼa modo yiljel spetsanil ja modoʼik bʼa wa sjeʼa ke gusto aya mok. Sok nunka mok chʼayuka kʼujol ke ja Dyosi «mini jel najatuk ay bʼa kada jujune ja keʼntiki» (Hech. 17:27).