Ja jas kechanta wa xbʼobʼ yaʼ perdon ja jmultiki jani ja stsʼakol stupu soka xchikʼel ja Jesusi (Efes. 1:7). Ama jachuk, ja Biblia wa xyala ke «ja Dyosi ajyi spasensya sok yaʼa perdon ja mulalik kʼulaxita» (Rom. 3:25). Ja it wa stojolan kʼe yaʼa perdon ja mulaliki bʼajtanto ke oj yaʼ ja sakʼanil ja Jesús. ¿Jastal oj bʼobʼ skʼuluk ja jaw ja Jyoba snochjel ja bʼa jastik toj yaʼunej kujlajuki?

Bʼa Jyoba, man skʼapa jun ‹intilal› bʼa oj skoltay ja kristyanoʼik bʼa wa xyawe ajyuk skʼuʼajel bʼa yeʼn, lajansok yaʼatani ja slokʼoli (Gén. 3:15; 22:18). Ja Jyoba seguroni ay lek ke yajni x-ekʼ ja tyempoʼi, ja Yunini puestoni oj ajyuk bʼa oj yaʼ ja sakʼanil jastal slokʼol (Gál. 4:4; Heb. 10:​7- 10). Yajni ja Jesús ti ajyi ja bʼa Luʼum jastal maʼ jekubʼal bʼa sparte Dyos, ajyiniyuj ja cholal bʼa yajel perdon ja smul ja kristyanoʼik bʼa ayiʼoje skʼuʼajel. Anima mito xtupxi ja slokʼoli, wani skʼulan yuja wa snaʼa ja jas oj stup ja yajni xyaʼa ja sakʼanili (Mat. 9:​2-6).