Jujuntik ja bʼa jastik alxikan oj ekʼuk wa xtax ja bʼa rekwagro it wa sjeʼa jastik bʼa ekʼ junxta tyempo. Spetsanil wa sjeʼa aytik sakʼan ja bʼa «stikʼanil ja tyempo» (Dan. 12:4).

• Teksto(ik) bʼa Biblia: Apoc. 11:7, TNM; 12:13, 17; 13:1-8, 12.

  Ja jas alubʼalkan. «Ja kʼakʼal chan» ibʼ kʼabʼal ayuj ja kristyano bʼa jitsanxa sigloʼik. Ja bʼa stikʼanil ja tyempo, wa xyajbʼesji ja sjukil. Mas tsaʼan, ja yolomi wa xtojbʼi sok spetsanil «ja ba luumi» jawa snochowe ja chan. Ja Satanás ja wa xya makunuk ja chan it bʼa och ‹pleito sok ja janekʼto wa xkan ja bʼa intilali›.

  Kʼotel smeranil. Tsaʼan ja bʼa niwan Bʼutʼ Jaʼ, kʼe ajyuk gobyernoʼik bʼa skontraʼane ja Jyoba. Jitsan sigloʼik tsaʼan, yajni wan ekʼel ja bʼajtan guerra bʼa spetsanil ja luʼum, ja gobyerno bʼa Gran Bretaña mey yip kani. Pe cha staʼa yip ja yajni koltaji yuja Estados Unidos. Ja bʼa stikʼanil ja tyempo, ja Satanás wa xya makunuk spetsanil ja jastik ti chʼikan soka politika bʼa skontraʼajel ja xchonabʼ ja Dyos.

• Teksto(ik) bʼa Biblia: Dan. 11:25-45.

  Ja jas alubʼalkan. Ja bʼa stikʼanil ja tyempo, ja mandaranum bʼa norte soka mandaranum bʼa sur wa xtiroʼaniye.

  Kʼotel smeranil. Ja Alemania wa xtiroʼani soka Gran Bretaña soka Estados Unidos. Ja bʼa 1945 ja Unión Soviética soka matik tey bʼa sparte wa xkʼotye ja mandaranum bʼa norte. Ja bʼa 1991 wa xchʼay ja Unión Soviética, sok ja tyempo, ja Rusia soka matik teye bʼa sparte wa xyiʼajekan ja cholal jastal mandaranum bʼa norte.

• Teksto(ik) bʼa Biblia: Is. 61:1; Mal. 3:1; Luc. 4:18.

  Ja jas alubʼalkan. Ja Jyoba wa sjeka ja ‹akʼa ekʼ rason› bʼa oj sjam ja bʼej bʼajtanto oj kujlajuk ja Gobyerno bʼa satkʼinali. Ja ‹akʼa ekʼ rason› wa xkʼe stul-e «yaljel yabʼye ja mansoʼik ja lekil notisya».

  Kʼotel smeranil. Man 1870, ja Charles Russell soka smojiki kʼe spaklaye ja Biblia bʼa yiljel ja jasa meran wa sjeʼa. Ja bʼa 1880, ja yaʼtijumik Dyos kʼe yil-e ja stʼilanil bʼa xcholjeli. Yawe eluk artikuloʼik jastal «Se solicitan 1.000 predicadores» sok «Ungidos para predicar».

• Teksto(ik) bʼa Biblia: Mat. 13:24-30, 36-43.

  Ja jas alubʼalkan. Jun winik stsʼunu trigo ja bʼa yalaji. Tsaʼan jak ja skontra sok stsʼunu mal kʼul. Ja mal kʼuli kʼiʼi sok smusukan ja trigo. Yajni styempoxa bʼa sjachʼjeli, wa xpilxi ja trigo ja bʼa mal kʼuli.

  Kʼotel smeranil. Man skʼeʼulabʼil ja jabʼil 1870, kʼe chiknajuk bʼay ja mero yaʼtijumik Dyosi soka bʼa miyuki. Ja bʼa stikʼanil ja tyempo, wa xtsomxi ja meran yaʼtijumik Dyosi sok wa xpilxi ja bʼa mi meranuki.

• Teksto(ik) bʼa Biblia: Dan. 2:31-33, 41-43.

  Ja jas alubʼalkan. Ja yokik bʼa hierro sok barro tini chʼikan ja bʼa niwan imajen tojbʼel sok tuktukil takʼin.

  Kʼotel smeranil. Ja barro ja wa senyaʼan ja kristyanoʼik ibʼ kʼabʼal aye yuja Gran Bretaña soka Estados Unidos bʼa mi skʼanawe oj ajuke mandar yuja sgobyernoʼe. Yuja kristyanoʼik jaw, ja gobyernoʼik it mi xbʼobʼ yawe makunuk spetsanil ja yipe.

• Teksto(ik) bʼa Biblia: Mat. 13:30; 24:14, 45, TNM; 28:19, 20.

  Ja jas alubʼalkan. «Ja trigo» wa stsomowe sok wa snolowe «bʼa yoj jrancho», sok wa xyaweyi «ja moso jel toj sok wa spensaraʼan leki» bʼa wa x-ajiyi «bʼa skʼabʼ ja aʼtijumik bʼa naʼits». Ja xcholjel ja «lekil rasonik sbʼaja sGobyerno ja Dyosi» kʼe pukxuk «bʼa yibʼanal ja luʼumkʼinali».

  Kʼotel smeranil. Ja bʼa 1919 wa x-ajiyi ja cholal ja moso jel toj bʼa oj stalnay ja xchonabʼ ja Dyos. Man tyempo jaw, ja Paklanumik bʼa Biblia yawe kʼiʼuk ja xcholjeli. Ja bʼa jtyempotik, ja taʼumantiʼik bʼa Jyoba wane xcholjel bʼa mas ja 200 paisik sok lugarik, sok wa xyawe el juʼunik bʼa Biblia bʼa mas ja mil kʼumalik.

• Teksto(ik) bʼa Biblia: Dan. 12:11; Apoc. 13:11, 14, 15.

  Ja jas alubʼalkan. Jun kʼakʼal chan bʼa chabʼ skacho wa xnikwani bʼa «oj scʼuluque jun nihuan dios jastal ja splanta ja tan tigre chan» sok wa xyayi «icʼ» bʼa oj ajyuk sakʼan.

  Kʼotel smeranil. Ja chonabʼ mas ayip ja Gran Bretaña soka Estados Unidos wa xnikwani bʼa oj kujlajuk ja Sociedad de Naciones. Tuk paisik wa skoltaye. Soka tyempo, ja mandaranum bʼa norte cha och bʼa sparte ja kʼole jaw, pe kechan bʼa 1926 man 1933. Ja Sociedad de Naciones ajiyi ja toyjelal bʼa kechan yeʼn wa sbʼajin ja sGobyerno ja Dyos, jastalni ekʼ tsaʼan soka Naciones Unidas.

• Teksto(ik) bʼa Biblia: Dan. 8:23, 24.

  Ja jas alubʼalkan. Jun mandaranum bʼa jel kʼakʼ ja splanta wa ‹x-ixtalani bʼa jun modo jel xiwela sbʼaj›.

  Kʼotel smeranil. Ja chonabʼ mas ayip ja Gran Bretaña soka Estados Unidos jel ixtalanele. Jun sjejel, ja bʼa xchabʼil guerra ekʼ bʼa spetsanil luʼum, ja Estados Unidos sjipayi chabʼ bomba atómica june ja bʼa skontra ja chonabʼ akwerdoʼay soki.

• Teksto(ik) bʼa Biblia: Dan. 11:31; Apoc. 17:3, 7-11.

  Ja jas alubʼalkan. Ja kʼakʼal «chan chac ja yelahuili» wan eleljan bʼa kʼeʼen sok lajune ja skacho, yeʼn kʼotel ja swaxakil mandaranum. Ja libro bʼa Daniel jani wan stajel tiʼal ja mandaranum it jastal «ja jasunuk jel kistal bʼa wa xchʼakwani».

  Kʼotel smeranil. Ja Sociedad de Naciones wa xchʼak ja yip ja bʼa xchabʼil guerra ekʼ bʼa spetsanil ja luʼum. Tsaʼan yajni ekʼ ja guerra, yawe kujlajuk ja ONU. Jastalni ekʼ soka Sociedad de Naciones, ja ONU wa x-ajiyi stoyjelal bʼa kechanta ja wa sbʼajin ja sGobyerno ja Dyos. Ja ONU oj yixtalaʼuk ja relijyonik.

• Teksto(ik) bʼa Biblia: 1 Tes. 5:3, TNM; Apoc. 17:16.

  Ja jas alubʼalkan. Ja chonabʼik wa xyalawe ay «lamanil sok mi jas xiwela sbʼaj», tsaʼan ja ‹lajune kacho› sok ja «tan chan» wa xkʼe yixtalaʼuke ja «men ixuc» sok wa xchʼayawe snajel. Tsaʼan tixa oj ajuk chʼaysnajel ja chonabʼik.

  Kʼotel smeranil. Ja chonabʼik oj yal-e yaweta ajyuk lamanil sok mixa jas xiwela sbʼaj. Tsaʼan, ja chonabʼik wa skoltaye ja ONU wa xchʼayawe snajel yibʼanal ja relijyonik mi meranuk. Jach wa xkʼe ja bʼajtan xetʼan ja bʼa niwan wokoli. Ja wokol it oj chʼakuk yajni xchʼaysnajel bʼa Armagedón ja janekʼto wa xkan ja sluʼumkʼinal ja Satanás.

• Teksto(ik) bʼa Biblia: Ezeq. 38:11, 14-17; Mat. 24:31.

  Ja jas alubʼalkan. Ja Gog oj ochuk ja bʼa sluʼum ja xchonabʼ ja Dyos. Tsaʼan, ja anjelik oj stsom ja matik «tzaubal».

  Kʼotel smeranil. Ja mandaranum bʼa norte soka skoltanel ja tuk gobyernoʼik bʼa luʼumkʼinali, wa xyixtalan ja xchonabʼ ja Dyos. Jun tyempo tsaʼan ja yajni kʼeta ja ixtalanel it, oj tsomjuke bʼa satkʼinal ja matik oj wajuke bʼa satkʼinal bʼa tito aye ja bʼa Luʼumi.

• Teksto(ik) bʼa Biblia: Ezeq. 38:18-23; Dan. 2:34, 35, 44, 45; Apoc. 6:2, TNM; 16:14, 16; 17:14; 19:20.

  Ja jas alubʼalkan. Ja maʼ kajan ja bʼa «sakal kawuj» wa stsʼiktes «ja skʼakʼaneli» yajni xchʼaya snajel ja Gog soka soldadoʼiki. Wa xjipjikon ja tan «chani» ja bʼa «cʼacʼ» sok wa xbʼuyji ja niwan imajeni.

  Kʼotel smeranil. Ja Jesús, ja mandaranum ja bʼa sGobyerno ja Dyos, wa x-el skoltajel ja xchonabʼ ja Jyoba. Lajan soka 144,000 soka anjeliki, wa xchʼayawe snajel yibʼanal ja tsome chonabʼik, bʼa jani yibʼanal ja gobyernoʼik bʼa politika yamanyuj ja Satanás.